¹ Gálata ka nhós ser inosénti, kenha ki inxina nhós mariadu? É ka krus di Kristi ki foi aprizentadu dianti di odju di nhós tudu? ² N kre pa nhos fra-m un kuza só: nhós resebe spiritu di Déus pa obra di lei, ô pa kel ki nhós obi? ³ Nhós sa ta dá pa dódu? Nhós kumesa na Spiritu, pa gósi nhós finda na kárni? ⁴ Inton tudu ki nhós súfri é pa sisi? Nhós ka prende nada ku kél-la? ⁵ Kel ki da nhós Spiritu, i ki ta opera grandis obras na nhós, El ta faze pa meiu di Lei ô pa kel ki nhós sa ta obi pa fé. ⁶ Sima Abron ‘El kre na Déus i kela foi sufisienti pa se justisa”, ⁷ Obi, kenha ki ta kre é fidju di Abron. ⁸ Skritura, sabia ki Déus ta justifikaba ómi pa meiu di sé fé, El dá kel notisia li pa Abron, E fla: “Pa meiu di bo, N ta bênsua tudu nason” ⁹ Asi, kel ki ten fé, ta ser bensuadu sima Abron, ómi di fé. ¹⁰ Tudu kes ki ta kúnfia na obra di Lei, sta dibaxu di un maldison, pamódi sta skritu: ‘maldisuadu é tudu kel, ki ka sa ta pratika tudu kuza ki sta skritu na livru di Lei” ¹¹ Gosi li sta klaru ma Déus ka ta justifika ninguén pa Lei, pamódi “Justu ta vive pa fé”. ¹² Lei é ka pa fé, mas, “kel ki ta faze obra di Lei, ta vive pa Lei. ¹³ Kristu libra-nu di forsa di maldison di Lei, El torna maldison na nós lugar, sima sta skritu: “maldisuadu é tudu kes ki ta prindadu na pó”. ¹⁴ Pa ki bênson di Abron ben pa nós na Kristu Jizus, pa nu pode resebe promesa di Spiritu pa meiu di fé. ¹⁵ Nhas irmon, gosi N ten ki fala ku nhós sima ómi. Mézmu na testamentu ki ómi ta faze, ningén ka ta anula i nen omenta nada, sima lei ta fla. ¹⁶ Kes promesa foi fetu pa Abron ku se disendenti. Ka sta skritu “disendentis”, pamodi é un, “se desendenti” ki é Kristu. ¹⁷ Gosi, dexa-m fla nhós: Lei, ki ben kuatrusentu i trinta anu dipós, ka dexa di ladu Testamentu ki Déus daba. ¹⁸ Si eransa ben pamodi Lei, inton promesa ka ten valor. Ma Déus dá eransa pa Abron pa promesa. ¹⁹ Inton, pa kuzé ki Lei ta sirbi? El foi dadu pamodi pekádu, ti ki kel desentendi di Abron txigaba, kel ki promesa foi fetu. Lei foi aprizentadu pa anju i un mediador. ²⁰ Má, kel mediador ta implika ser mas di ki un alguen; má Déus é un so. ²¹ Inton, Lei é kontra promesa di Déus? Nau! Si tinha un lei ki ta daba vida, justisa sertamenti ta binha pa Lei. ²² Má Skritura ta pui tudu kuzas debaxu di pekadu. Deus ki faze si, pa ki promesa di salvason pa fé na Jizus Kristu dadu pa kenha ki kre. ²³ Má, antis di nós fé na Kristu, nu staba prezu i kondenadu dibaxu di Lei, ti fé ser reveladu. ²⁴ Lei torna nós tutor, ti ki Kristu txiga, pa nu pode ser justifikadu pa fé. ²⁵ Gosi ki nu sta na fé, nu ka sta dibaxu di un tutor. ²⁶ Nhós tudu é fidju di Déus, pamodi fé na Kristu Jizus. ²⁷ Nhós tudu ki é batizadu na Kristu sta xeiu di Kristu. ²⁸ Ka ten judeu nen gregu, nen skrávu nen livri, nen ómi nen mudjer; pamodi nhós tudu é un na Kristu Jizus. ²⁹ Si nhós é di Kristu, inton, nhos é fidju de Abron, erderus sima promesa ta fla.