¹ Kantu Pedru ku Djon staba ta pápia ku kes gentis, txiga na es uns saserdóti, uns di grupu di saduseus i xéfi di guarda di ténplu. ² Es staba rei di xatiadu pamodi Pedru ku Djon staba ta inxina gentis, i konta-s sobri rasureson di mortus através di Jizus. ³ Es bota-es mon, i es pô-s na kádia ti kel otu dia, pamodi sol staba ta kanba. ⁴ Má txeu di kes ki obi palavra, es kridita; i ses nunbru foi di kuazi sinku mul ómi. ⁵ Dipôs, na kel otu dia, kes xéfi i gentis grandi i dotoris di lei, di povu Judeu, es reuni na Jeruzalen. ⁶ Anas ki era xéfi di saserdótis, Kaifás, Djon, Alexandri i tudu kes ki era di famíli di xéfi di sacerdotis, es staba la tanben. ⁷ Es poi Pedru ku Djon na ses meiu, i es pergunta-s: Ku kal puder, i na nomi di kenha ki anhos fazi es kuza li? ⁸ Nton Pedru xeiu di Spritu Santu, e fla-s: Anhos, otoridadi di nos povu, ku nos gentis grandi, ⁹ nhos traze-nu li pa nhos ser obrigadu rasponde pa un kuza dretu ki fazedu pa um ómi manku; i pa menera ki e kuradu; ¹⁰ Si e asin nhos fika ta sabe, anhos ku tudu povu di Israel, má é na nomi di Jizus Kristu, di Nazaré, ki nhos krusifika, i ki Déus rasusita di morti, ki es ómi sta li sakédu, nhos dianti prontu san di saúdi. ¹¹ Sin, é sobri es Jizus ki skritura ta fla: Kel pedra ki nhos kostrutoris rajeta; E bira pedra angular prinsipal. ¹² Ka ten salvason na ningen mas, pamodi ka ten ninhun otu nomi ki Déus da pa umanidadi ki nu meste pa ser salvu. ¹³ Kes ménbru di kel tribunal más altu di Judeus sabeba ma Pedru ku Djon era gentis sinplis ku poku skóla. Nton, es fika dimiradu óra ki es odja ses koraji, i es rakonhesi ma Pedru ku Djon tenba andadu ku Jizus. ¹⁴ Sima ki kel ómi kuradu tanbe staba sakedu djuntu ku es, es ka pudeba fla ninhun kuza kontra Pedru ku Djon. ¹⁵ Nton kes menbru manda-s sai di sala di tribunal, pa ki es pudeba diskuti es-ku-e, ¹⁶ es kumesa ta purgunta kupanheru: Kuze ki nu ta faze ku kes ómi li? Pamodi tudu algen na Jeruzalen sabe ma es faze un grandi milagri, ki ka ta da pa nu nega. ¹⁷ Má pa nobidadi ka spadja más na meiu di povu, nu miasa-s pa es ka pápia pa ningen más na nomi di Jizus. ¹⁸ Nton es txoma Pedru ku Djon i es da-s órdi pa es ka pápia nen inxina na nomi di Jizus, di ninhum manera. ¹⁹ Má, Pedru, ku Djon raspondi-s: Nu ta dexa pa nhos disidi dianti di Déus, si é dretu pa nu obi ku nhos, ô pa nu obi ku Déus. ²⁰ Má anos gó, nu ka podi dexa di pápia di kuzas ki nu odja i nu obi. ²¹ Nton es miasa-s más txeu, má es dexa-s bai, pamodi es ka atxa ninhun razon pa kastiga-s.Tanbe, gentis staba ta ngaba Déus pa kuza ki kontise. ²² Modi ki kel ómi ki staba manku pa más di korenta anus di se bida, fika kuradu pa milagri. ²³ Lógu ki Pedru ku Djon largadu, es volta pa ses kupanheru, i es konta-s kes kuzas ki kes saserdoti prinsipal i gentis grandi di povu Judeu tenba fladu. ²⁴ I óra ki es, obi kes kuza, es labanta vos ku un só xintidu pa Déus, i es ora: Nhordés, Abo ki faze séu, ku téra, ku ma i tudu kuza ki sta na es. ²⁵ Através di bu Spritu Santu, Nhu fla pa bóka di bu sérvu Davidi, nos pai, kantu e fla: Pamodi ki kes nason, ki ka é Judeu, ta labanta ku raiba, i ses povu ta makina ses planu kabale? ²⁶ Reis di téra ja prepara pa géra, i tudu otoridadi dja djunta unidu kontra Sinhor, i kontra se Unjidu. ²⁷ Na verdadi tantu Eródis, i Pônsiu Pilátus, komu kes ki ka era Judeu i povu di Israel, es djunta na es sidadi kontra bu santu Sérvu Jizus, ki Abo própri bu unji. ²⁸ Asin, es djunta pa faze kontise tudu kes kuza ki Abo dja disidiba ki ta ben kontisi através di bu puder i vontadi. ²⁹ Gosi Sinhor, odja pa ses amiasa i djunta bu servu pa konta bu palavra ku tudu koraji; ³⁰ Stendi bu mon pa kura, i pa ki maravilhas ku grandi sinal podi fazedu na nomi di bu santu Servu Jizus. ³¹ Dipôs kes ora, kel kau undi ki es staba djuntadu foi sakudidu, es tudu fika xeiu di Spritu Santu, i es kumesa ta konta palavra di Déus ku koraji. ³² Pa tudu kes ki dja kreditaba na Jizus, es era sima un só pesoa, nas ses pensamentu i na ses vontadi; Ningen ka ta falaba: Es kuza li é di meu. Má invés di ke-la, es ta rapartiba tudu ses kuza es-ku-es. ³³ Apóstulus ta kontaba di rasureson di sinhor jizus ku grandi puder; i grandi grasa staba riba di es tudu. ³⁴ Na ses meiu ka tenba ninhun koitadu, pamodi kes ki temba txon, ô kaza , es staba ta bende-s, i ta traze dinheru di benda, pa pô-l na pé di apóstulus, ³⁵ ki ta rapartiba pa kada un di akordu ku ses nisisidadi. ³⁶ Asin un ómi txomadu Juzé, un levita di Xipri, ki apóstulus poi nomi di Barnabé (ki traduzidu ta signifika algen ki ta da ánimu), ³⁷ e bendi un txon di se-l i e traze kel dinheru pa pô-l na pé di apóstulu.