¹ Un dia Pedru ku Djon staba pa subi pa tenplu la pa três ora di tardi ora di orason: ² Na porton di tenplu ki ta txomadu Porton Formozu, tenba un omi ki era manku desdi bariga di se mai, tudu dia gentis ta karegaba el pa pô-L djuntu kel porton, pa e podi pidi zimóla pa tudu algen ki ta entraba na tenplu. ³ Óra ki el odja Pedru ku Djon ta ba ta entra na tenplu, e fika ta pidi-s: Nhos da-m zimóla. ⁴ Nton Pedru, ku Djon, finka odju na el i Pedru fal-l: Djobe-nu. ⁵ Nton Kel omi manku djobe-s ku atenson, i ku xintidu ma e ta ba rasebe algun kuza di es. ⁶ Ma Pedru fla-l: N ka teni prata ku oru, má kuza ki N teni N ta da-u: Na nomi di Jizus Kristu di Nazaré, labanta i bu anda. ⁷ ,I, Pedru pega-l na se mon diretu, i e djuda-l labanta; na kel óra mê, sê dôs pé ku se odju -pé bira firmi. ⁸ E labanta ku un saltu, e fika sakedu, i e kumesa ta anda i ta da volta, i e entra na tenplu djuntu ku es, ta anda, ta salta i ta loba Déus. ⁹ Tudu algen odja el, ta anda e ta loba Déus. ¹⁰ Es rakonhesi má era kel ómi ki ta xintaba na porton Formozu di tenplu pa pidi zimóla; i es fika dimiradu i spantadu ku kuza ki kontisi ku kel ómi. ¹¹ Sima kel ómi kuradu fika pegadu na mon di Pedru ku Djon, la na pátiu di tenplu, txomadu Pórtiku di Salomão, tudu algen fika spantadu i es kóri faxi pa la undi es sataba. ¹² Kantu Pedru odja gentis ta djunta na es, e purgunta-s: Gentis di israel, pamodi ki nhos sta dimiradu ku kes kuza li? Pamodi ki nhos sta spantadu ta djobe-nu tan, sima ki é ku nos própri puder ô bondadi ki nu poi kel ómi li ta anda. ¹³ Déus di Abron, di Izaki, i di Jakó i Déus di nós antepasadu, E glorifika se Sérvu Jizus, kel ki nhos intrega, i nhos nega na frénti di Pilátus, kantu Pilátus dja disidi larga-L. ¹⁴ Má invés di ke-la nhos nega kel ki é Santu i Justu, i nhos pidi Pilátus pa e larga-nhos un ómi ki era asasinu. ¹⁵ Nhos mata kriador di bida, má Deus rasusita-L di meiu di mortus, i anos própri é tistimunha di kes kuza. ¹⁶ Pamodi fé na nomi di Jizus, és ómi ki nhos sa ta odja li, i ki nhos konxi, e bira rixu balenti. Ku fé na nomi di Jizus, es ómi rasebi saúdi konpletu dianti di tudu nhos. ¹⁷ Má gosi, nhas irmon, N sabi má nhos, djuntu ku nhos xéfi, nhos fazi kes kuza pamodi iginoráncia. ¹⁸ Má Déus kunpri kel ki dja dura ki E tenba fladu pa bóka di tudu ses pruféta, antis ki kontise, má Kristu tenba ki sufri. ¹⁹ Purtantu, nhos rapendi, i nhos volta rostu pa Déus, pa nhos pekadu podi ser perduadu, i pa Sinhor ben da-nhos tenpu di ranobason di se prezensa. ²⁰ Asin, E ta manda Mísias, ki dja dura E skodje pa nhos, ki é Jizus. ²¹ Má Jizus meste fika na séu, ti ki ben tenpu di ranobason di tudu kuza, sima Déus dja flaba, désdi ténpu antigu, pa bóka di ses santu pruféta. ²² Moizes dja flaba pa nós antipasadu: Nhosdés ta ben labanta un pruféta sima min na meiu di nhas irmon; nhos obidesi tudu kuza ki E ta fla-nhos. ²³ Má ta kontise ki kalker algen ki ka ta obidese kel pruféta, el ta ser tradu di meiu di povu di Déus, i e ta ser distruídu. ²⁴ Tudu pruféta, Samuel ku tudu algen ki ben dipôis di el, ki anúsia palavra di Déus tanbé, es pápia di kes kuza ki kontise na kes dia li. ²⁵ Anhos é fidju di pruféta i nhos é erderus di kontratu ki Déus faze ku nhos antipasadu kantu E fla Abron: N ta bensua tudu povu di mundu através di disendénsia di-bo. ²⁶ Nton, kantu Déus rasusita se Servu, E manda-L primeru pa nhos povu di Israel, pa bensua nhos i pa poi kada u di nhos ta rabida di nhos kaminhu pervésu.