¹ kantu txiga dia di festa di pentikosti, es staba tudu djuntu na mesmu lugar. ² Bira asin ben un son di séu, sima barudju di un béntu fórti, ki intxi tudu kel kaza na undi ki es staba xintadu. ³ Logu asin es odja un kuza sima língua di lumi, ki ba ta raparti i ba ta xinta riba kaba un di es. ⁴ Nton, tudu es fika xeiu di Spritu Santu, i es kumesa ta pápia otu língua, konfórmi Spritu Santu ba ta da-s kapasidadi. ⁵ Tenba txeu Judeu, ki era ómi ralijiozu ki ben di tudu nason di mundu, ki staba ospradu na jeruzalen na kes dia. ⁶ Óra ki es obi kel barudju, txeu di esdjunta na un multidon; Es fika tudu trapadjadu, pamodi kada un staba ta obi kes pesoa ta pápia na língua di kes nason di undi ki es ben. ⁷ Es fika tudu spantadu i dimiradu, i es purgunta kunpanheru: Má modi? Kes pesoa li ka sa ta pápia, es e tudu pruvínsia di Galileia, ka é? ⁸ Nton, modi ki kada un di nos sa ta obi-s na língua di kes nason undi ki nu nase? ⁹ Staba la gentis di kel nason di Pátus, Médus i Elamitas, gentis ki ta mora na pruvinsia Mezopotâmia, tantu kes pruvinsia di Judeia ku Kapadósia, i Pontu ku Azia, ¹⁰ gentis tantu di kes pruvínsia di Fríjia, Panfília, ku Ijitu i kes banda di pruvínsia di Líbia pertu di Sireni, gentis vizitantis romanu istrajeru, tantu Judeus kómu gentis ki dja setaba ralijion di Judeus, ¹¹ gentis di ilia di Kreta i di pruvínsia di Arábia, nos tudu nu obi-s, na propri língua ta pápia di kuzas grandi ki Déus faze. ¹² Tudu kes gentis fika spantadu, i es ba ta purugunta kupanheru: Má kuzé ki ke-li ta signifika? ¹³ Otus gó , fika ta faze trósa, i es fla: Es sta tudu moko. ¹⁴ Nton Pedru, labanta djuntu ku kes otu ónzi apóstulu i e fika sakedu, e pápia altu i e fla ku kes gentis: Povu Judeu, i nhos tudu ki sta li na Jeruzalen, keli fika konxidu, i nhos sukuta nhas palavras ku atenson: ¹⁵ Dja é só nóvi ora di palmanhan, i kes omi li ka sta nada móku moda nhos pensa. ¹⁶ Má kel kuza ki kontisi li é kuza ki Déus dja flaba atravez di prufeta Joel: ¹⁷ Déus fla na kes últimu dia: N ta dirama nha Spritu riba tudu algén, i nhos fidju matxu ku nhos fidju fémia es ta prufetiza, nhos jovens ta ten vison, i nhas gentis grandis ta ten sonhus. ¹⁸ Tanbén na kes dia N ta dirama nha Spritu, mésmu riba nhas kriadu, matxu ku fémia i es ta ben ta bira ta prufetiza. ¹⁹ N ta mostra maravilhas riba la na séu, i sinais li di baxu na téra; N ta mostra sinal di sangi, lumi i un núven di fumu. ²⁰ Sól ta bira sukuru, i lua ta bira sima sangi, ántis ki tiga kel grandi i gloriozu dia di Sinhor. ²¹ Na kel tenpu tudu algen ki ta pidi ajuda, na nomi di Sinhor ta ser salvu. ²² Pedru kontínua ta pápia: Gentis di Israel, nhos sukuta kuzas ki N ta fla-nhos: Déus konfirma Jizus di Nazaré na nhos dianti através di txeu milagri, maravilha ku gradis sinais ki e fazi através di nomi di jizus. Anhos própri, nhos sabi kel la dretu, pamodi tudu fazedu na nhos meiu. ²³ Déus ki konxi tudu kuza antis ki e kontise, E disidi intrega es Jizus pa mon di gentis injustus, konformi se planu. Nhos prega-L na krus i nhos mata-L; ²⁴ Déus rasusita-L, E trá di angústia di morti; pamodi morti ka tinha puder di prende-L; ²⁵ Rei Davidi dja papiaba ke-li sobri El: Sénpri N te odja Sinhor pa nha dianti, pamó E sta senpri na nha ladu diretu, pa nada ka abala-M. ²⁶ Purisu nha korason ta fika konténti, nha língua ta pápia palavras di alegria, i nha korpu tanbén ta diskansa na speransa. ²⁷ Pamó bu ka ta abandona nha alma na mundu di mortus, nen bu ka ta larga bu santu Sérvu, pa disfaze na kóba. ²⁸ Bu po-M konxi kaminhu di bida; bu prezénsa ta intxi-M di alegria. ²⁹ Pedru ba ta fla-s: Nhas irmon, N ta fla nhos, ku tudu kunfiansa ki nos pai Davidi móri, i interadu i se kóba sta djuntu ku nos ti dia di oji. ³⁰ Purtantu, rei Davidi era pruféta, i e sabeba, má Déus dja tinha fétu un prumésa pa el ku juramentu ma un fidju di se jerason ta ben xinta na se tronu. ³¹ Konformi ki Davidi dja odjaba pa futuru e papiaba sobri rasureson di Kristu i modi ki: Déus ka larga-L na undi fika kes mortu, nen E ka dexa se korpu disfaze na kóba. ³² Es profesia ta papiaba di es Jizus ki Déus rasusita; i nos tudu é tistimunha. ³³ Purtantu, E podu la riba na altura, na ladu diretu di Déus, i moda se pai dja prometeba pa el, Spritu Santu, ki dirama riba nos, sima nhos sa ta odja i nhos sa ta obi gósi li: ³⁴ Pamodi Davidi ka subi séu, ma, el propia fla: Sinhor Déus fla nha Sinhor: Xinta na nha mon diretu, ³⁵ ti ki N ta poi bus inimigu pa ser bankinhu dixadu bu sóla pé. ³⁶ Asin tudu kaza di Israel debe sabe, ku serteza, ma es ómi, Jizus ki nhos krusifika Déus faze Sinhor i Misías. ³⁷ Ora ki gentis obi tudu kes kuza li, ses kurason fika pertadu, i es purgunta Pedru, ku kes otu apóstulu: Nhas irmon! kuze ki nu debi faze? ³⁸ Nton Pedru fla-s: Kada un di nhos meste rapende, i ser batizadu na nomi di Jizus Kristu, pa nhos pekadu ser perduadu; i nhos ta rasebi don di Spritu Santu ki Déus ta da-nhos. ³⁹ Pamodi kel promesa li é pa nhos, ku nhos fidju, i pa tudu kes ki ta lonji, tudu kes ki Nhordés txoma pa txiga na el. ⁴⁰ Ku txeu otu palavra, Pedru ba ta da se tistimunhu, E staba ta txoma-s atenson i es fla-s: Nhos libra nhos bida di perdison di gentis mau di es jerason! ⁴¹ Nton, kes ki seta se palavra foi batizadu; i serka di três mil algen djunta ku el na kel dia. ⁴² Es fika firmi na inxinametu di kes apóstulu, i es toma parti na komunhon ku kopanheru, Es ta kumeba i es ta oraba djuntu. ⁴³ I txeu algen tenba txeu reverénsia na ses alma; i kes apóstulu ta fazeba txeu milagri ku grandi sinal. ⁴⁴ Tudu kes ki kridita ta djuntaba na komunhon ku kupanheru, es ta bendeba ses txon i kuzas di valor. ⁴⁵ I es ta vendeba ses kuzas tudu i Es rapartidu ku tudu algen, konfórmi nisisidadi di kada un. ⁴⁶ Dia pa dia Es ta manteba djuntu na tenplu di Jeruzalén ku un só xintidu, Es ta rapartiba pon na ses kaza, i ta rasebeba kumida ku kotentamentu i ku kurason umildi. ⁴⁷ Es ta lovaba Déus, Tudu algen fika kontenti ku es. I dia pa dia Sinhor ta ba ta krisenta se igreja ku kes ki rasebi salvason.