¹ Dipôs di sinku dia, Ananias, xéfi di saserdótis, djuntu ku uns gentis grandi di judeu, y un tal divogadu, ku nómi di Tértulu, es dixi pa sidadi di Sezaréia. La es prizenta ses kexa kóntra Paulu pa governador Félis. ² Dipôs ki Paulu txomadu p adjunta ku es, Tértulu kumesa ta akuza-l y e fla: “Eselentísimu Governador Félis, nos povo dja tenba txeu pas duranti ténpu di governason di-nho, y purkauza dimkes rafórma ki nhu sa ta faze na es téra, através di vizon di-nho. ³ Pa tudu kau, y di tudu manera, nu ta rakonhese kel-li, y nu ta fla-nho: Obrigadu. ⁴ N ka krê toma txeu ténpu di-nho, má ku jentiléza di sinhor, N ta pidi-nho pa nhu sukuta-m un bokadinhu. ⁵ Nu ta atxa ma es ómi é un pesti. E sa ta traze dizórdi na meiu di tudu judeu, na tudu párti di mundu. Tanbe, el é xéfi di seita txomand nazarenu. ⁶ Tanbe, e tenta profanaTénplu. Nton, nu prende-l. (Nu kreba julga-l di akordu ku nos lei. ⁷ 7 Má, Lísias, xéfi di trópa romanu, bem y e rabata-l di nos mon, ku txeu forsa. ⁸ Dipôs, Lísias, da órdi pa kes ki sa ta akuzaba Paulu, pa es bem prizenta ses kexa dianti di nho). Nhu pode purgunta-l, anho mézmu, y e ta konfirma tudu kes akuzason ki nu sa ta faze.” ⁹ Judeus la konkorda ku kes akuzason tanbe, y es fla ma tudu ki Tértulu tinha fladu éra verdade. ¹⁰ Kandu governador Feélis faze sinal pa Paulu pâpia, e pasponde y e fla; “N sabe ma dja tem monti anu ki Sinhor é juís sobri nos povo. Purisu, N ta prizenta nha diféza ku kunfiansa. ¹¹ Sinhor pode verifica, nhu mézmu, ma ka tem más di dozi dia ki N subi pa N adora Déus na Jeruzalen. ¹² Nhas akuzador ka atxa-m ta diskuti ki ningen na ténplu, nen na kalker sinagoga. Nen es ka atxa-m ta ranja konfuzon na multidon, y nen na kalker párti di sidadi. ¹³ Y nen e ska pode da-nho prova sobri kes kuza ki es sa ta akuza-m gósi li. ¹⁴ Má un kuza N ta konfesa-nho: N ta sirbi Déus di nos antipasadu, di akordu ku Kaminhu, ki es ta txoma seita. N ta kridita na tudu kuza di akordu ku lei di Moizes, y na tudu kuza ki prufétas skrebe. ¹⁵ N tem speransa na Déus, moda kes ómi li ta spéra tanbe, ma te bem tem un rasureson, tantu di kes algen ki é justu, kómu di kes algen ki ka é justu. ¹⁶ Purisu, N ta faze di tudu pa N konserva manenti un konsiénsia linpu dianti di Déus, y dianti di tudu algen. ¹⁷ Nton, dipôs di alguns anu fóra di Jeruzalen, N volta pa N traze ajuda finanseru pa nha própi povo, y pa N faze uns oferta di sakrifísiu pa Déus. ¹⁸ N staba na prusésu di faze kes oferta, dipôs ki N tirmina sirimónia di purifikason, kandu alguns judeu di Ázia atxa-m na Ténplu. Ka tenba nen multidon, y nen rabolisu. ¹⁹ Nton, é kes judeu di Ázia ki mesti sta li dianti di nho pa akuza-m, si é ki es tem algun kuza kóntra mi. ²⁰ Ô, kes mézmu ki sta li gósi, es debe ponta kal culpa di krimi ki es atxa kandu N podu dianti di tribunal más altu di judeus. ²¹ Kandu N staba na ses meiu, úniku kuza ki es podeba akuza-m, é ki N fla na vós altu: “Ami sta li oji pa ser julgadu, dianti di nhos, purkauza di nha speransa na rasureson di mortus”. ²² Nton Félis, ki staba bem informadu sobri Kaminhu, e âdia kel julgamentu, y e fla: “Kandu Lisías, xéfi di trópa, txiga, N ta dissidi nhos kazu”. ²³ E da órdi pa komandanti romanu fika ku Paulu na se gurada, y pa e da Paulu algun liberdadi. E fla tanbe pa e ka stroba ninhun amigu di Paulu ki krê bem djuda-l. ²⁴ 24 Dipôs di alguns dia, Félis parse ku Drusila, se mudjer, ki éra judeu. E manda Txoma Paulu, y e fika ta obi Paulu pâpia sobri fé na Jezus Kristu. ²⁵ Má óra ki Paulus taba ta pâpia di justisa, di dumina nos própi, y di julgamentu ki ta bem, Félis fika ku medu y e rasponde: “Agora, dja basta! Bu pode sai. Kandu N tene ténpu, N ta manda txomo-u”. ²⁶ Dipôs die s inkontru, Félis manda txoma Paulu txeuotu bés, pa e konbersa ku el. Má e faze asin tanbe, pamodie staba ta spéra ki Paulu ta ofereseba el dinheru pa e ser libertadu. ²⁷ Y sin passa dôs anu. Dipôs Pórsiu Festu bem fika na lugar di governador Félis. Má Félis kreba agrada judeus kandu e sai, nton e dexa Paulu fika prézu.