¹ Nton, Festu txiga y e toma pósi di governador di pruvínsia di Judéia. Três dia dipôs, e sai di sidadi di Sezaréia, y e subi pa Jeruzalen. ² Nton, kes saserdóti prinsipal, ku kes gentis grandi di povu judeu, es prizenta ses kexa kóntra Paulu pa Festu na Jeruzalen. Tanbe, es fika ta suplika, ³ ta pidi-l favor di manda traze Paulu pa Jeruzalen, pamodi dja es staba ta arma ses silada pa mata-l na kaminhu. ⁴ Ma Festu rasponde: "Paulu sta prézu na Sezaréia, y N ka ta dura pa N bai ti la. ⁵ Nton, alguns di nhos xéfi pode dixi ku mi ti Sezaréia, y si ten algun mal nes ómi, es pode prizenta ses kexa kóntra el la". ⁶ Festu ka dura la ku es na Jeruzalen más ki oitu ô dés dia. Dipôs e dixi pa Sezaréia. Na kel otu dia, e konvoka se tribunal y e manda traze Paulu. ⁷ Kantu Paulu txiga, kes judeu, ki tinha kabadu di txiga di Jeruzalen, es djunta na se volta, y es kumesa ta faze txeu kexa gravi kóntra el, ki es ka ta podeba prova. ⁸ Paulu difende se kabésa y e fla: "N ka faze ninhun ofénsa kóntra lei di judeu, nen kóntra Ténplu, y nen kóntra Inperador Romanu". ⁹ Ma kómu Festu kreba agrada judeus, e purgunta Paulu: "Bu sta dispostu pa subi ti Jeruzalen, pa N julga-u la, sobri tudu es kuza li?" ¹⁰ Paulu rasponde-l: "N sta li dianti di tribunal di Inperador Romanu, undi ki N debe ser julgadu. N ka faze ninhun ofénsa kóntra judeus, sima nho tanbe, dja nho sabe dretu. ¹¹ Si mi é kulpadu, y N fase algun kuza ki merese mórti, N sta prontu pa móre. Má si ninhun di ses akuzason kóntra mi é verdai, ningen ka pode intrega-m na ses mon. N ta rakóre pa Séza". ¹² Nton Festu pâpia ku se konsedju, y dipôs e fla: "Komu bu krê rakóre pa ser julgadu pa Inperador Séza, nton é pa Séza ki bu ta bai". ¹³ Agóra, alguns dia dipôs, rei Agripa, djuntu ku Berenisi, es txiga na sidadi di Sezaréia, pa es kunprimenta Festu, nobu governador. ¹⁴ Kómu ki es fika la pa txeu dia, Festu konsulta rei Agripa sobri kazu di Paulu, y e fla: "Sta li un ómiki Félis dexa prézu. ¹⁵ Kandu N bai pa Jeruzalen, kes saserdóti prinsipal, ku kes gentis grandi di povu judeu, es ben prisenta kexa kóntra es ómi, y es pidi-m pa N kondena-l ¹⁶ N fla-s ma ka é kustumu di povu romanu kondena algen ántis di akuzadu ka ser podu frénti-a-frénti ku ses akuzador, y e ta ser dadu oportunidadi di faze se diféza kóntra ses akuzason, ¹⁷ Purtantu , si ki es ben tudu djuntu pa li, N ka perde ténpu. Na kel otu dia, N konvoka tribunal y N da órdi pa es traze kel ómi. ¹⁸ Má kandu kes akuzador labanta, es ka prisenta ninhun akuzason di krimi gravi, sima N sa ta speraba. ¹⁹ Okontráriu, éra un kiston sobri ses própi ralijion ki es tenba kóntra el. Tenba tanbe un kiston sobri tal ómi ku nómi di Jezus, ki móre. Má Paulu sa ta raklama ma es ópmi sta bibu. ²⁰ Ami, N ka tenba sertéza di manera ki N debe faze invistigason sobri kel kiston. Nton N purgunta Paulu si e staba dispostu pa ser julgadu na Jeruzalen, sobri kes akuzason. ²¹ Má Paulu rakóre pa nu fika ta guarda-l ti disizon di Inperador. Nton, N da órdi pa guarda-l ti ki N ta pode manda-l pa Séza". ²² Nton, Agripa fla Festu: "Ami tanbe, N ten gana di obi es ómi". Festu rasponde-l: "Manhan bu ta obi-l" ²³ Na kel otu dia, Agripa ku Berenisitxiga ku tudu ses bazofaria. Es entra na sala di públiku, djuntu ku ses xéfi militar y kes ómi mas inportanti di sidadi. Dipôs, Festu da órdi y ses guarda traze Paulu. ²⁴ Y Festu fla: "Rei Agripa, y tudu nhos ki sta prizenti li ku nos, nhos odja es ómi li! Multidon di judeus, tantu na Jeruzalen, kómu li na Sezaréia, es sa ta prizenta-m ku kexa sobri es ómi li. Es ta grita ma e ka debe vive más. ²⁵ Má N ka atxa nada ki e fase pa e meresi mórti. Má komu el mê, e rakóre pa disizon di Inperador, N disidi manda-l. ²⁶ Má N ka ten nada difinidu ki N pode skrebi pa Inperador, sobri es ómi li. Purtantu, N traze-l dianti nho, rei Agripa. N ta spéra ma N ta ten algun kuza pa skrebe dipôs di es inkéritu li. ²⁷ Pamodi, ta parse-m abisurdu pa N manda un prézu sen un ralatóriu klaru sobri kes kexa ki ten kóntra el.