¹ Paulu fikisa odju na kes gentis di kel tribunal más altu di judeus y e fla-s: “Nhas irmons, N tem vivedu di akordu ku tudu bon konsiénsa dianti di Déus, ti dia di oji”. ² Asin ki Ananias, xéfi di saserdótis, manda kes ki staba di pé na ladu di Paulu, pa es da-l un soku na bóka. ³ Nton, Paulu fla-l: “Abo, paredi kaiadu! Déus sta sin di da-u pankada. Bu sta xintadu li pa julga-m konfórmi ki lei ta manda. Nton modi ki bu ta manda-s da-m pankada?” ⁴ Kes ki staba paradu paradu na ladu di Paulu fla-l: “Bu ta insulta xéfi di saserdótis di Déus?” ⁵ Paulu rasponde: “Nhas irmon, N ka dda kónta ma el éra xéfi di saserdótis, pamodi sta skritu: “Ka bu pâpia mal di un xéfi di bu povo”. ⁶ Paulu da kónta ma un párti di kel tribunal éra di grupu ralijiozu di saduceus, y otu párti éra di grupu ralijiozu di fariseus. Nton, e pâpia altu pa kel tribunal y e fla: “Nhas irmon, ami é farizeu, y fidju di farizeus. Ami sta li pa ser julgadu purkauza di nha speransa na rasureson di mortus”. ⁷ Sin ki e fla kel-li, labanta un diskuson entri kes saduseu y kes farizeu, y kel tribunal fika divididu. ⁸ (Pa un ladu, saduceus ta fla ma ka ta izisti rasureson, nen anju, nen spritu. Má pa otu ladu, farizeus ta kridita na tudu es kuza.) ⁹ Surgi un grandi gritaria. Nton, uns dotor di lei , di párti di farizeus, es labanta , y es protesta rixu. Es fla: “Nu ka atxa ninhun mal na es ómi li. Talvês un spritu ô anju pâpia ku el”. ¹⁰ Kel diskuson bira grandi, tantu ki kel xéfi di tropa fika ku medu ki kel multidon podeba ratxa Paulu padás-padás. Nton, e manda ses tropa dixi pa tra Paulu di ses meiu y leba-l déntu kuartel. ¹¹ Na kel noti, Sinhor bem fika sakédu pértu di Paulu y E fla-l: “Koraji! DI mézmu manera ki bu da tistimunhu di Mi li na Jeruzalen, bu meste ba ta tistimunhu di Mi la na sidadi di Roma tanbe”. ¹² Palmanhan, un grupu di judeus raúni pa trama un konspirason. Es faze un juramentu ma e ska ta kume, nen bebe, ti ki es mata Paulu. ¹³ Es éra más di korénta algen ki faze kel konspirason. ¹⁴ Es ba pâpia ku kel saserdóti principal y kes gentis grandi di povo judeu. Es fla: “Nu faze juramentu ma nu ka pode xinti gosto di nada na bóka ti ki nu mata Paulu. ¹⁵ Purtantu, anhos, djuntu ku tribunal más altu di judeus, nhos pidi xéfi di trópa pa e dixi ku Paulu ti nhos. Faze asin kómu si nhos krê baskudja midjór kes kuza sobri el. Anos gó, nu ta fika prontu pa mata-l, ántis ki e txiga pértu nhos”. ¹⁶ Má subrinhu di Paulu obi die s silada. Nton e ba ti kuartel. E entra la y e konta Paulu. ¹⁷ Nton, Paulu txoma un di kes komandanti romanu y e flal-l: “Leba es rapás ti xéfi di trópa, pamodi e tem un kuza pa konta-l”. ¹⁸ Purtantu, komandanti romanu toma kel rapás y e leba-l ti xéfi di trópa. Kel komandanti fla séfi: “Kel prizioneru, Paulu txoma-m pa N traze-u es rapás li, pamodi e tem un kuza pa konta-u”. ¹⁹ Xéfi di trópa pega rapás na mon y e afasta ku el pa particular. Dipôs e purgunta-l: “Kuzé ki bu tem pa konta-m?” ²⁰ Rapás rasponde-l: “Judeus dja konbina pa pidi-nho, manhan, pa nho dixi ku Paulu ti tribunal más altu di judeus, kómu si es ta baskudja midjór kes kuza sobrim el. ²¹ Purtantu, k anho dexa-s konvense-nho, pamodi tem másdi korénta ómi ki sa ta spéra pa Paulu kai na ses armadinha. Es faze juramentu ma e ska ta kume nen bebe ti ki es mata Paulu. Gósi li, dja es sta prontu, y es ta spéra sô pa nho konkorda ku ses pididu”. ²² Nton, xéfi di tropa da órdi pa kel rapás y e fla-l: “Ka bu fla ningen es kuza ki bu konta-m”. Dipôs e manda-l bai. ²³ Asin, xéfi di tropa txoma dôs di ses komadanti y e fla-s: “Nhos pripara duzéntus soldadu p abai ti sidadi di Sezaréia, djuntu ku seténta kabaleru y duzéntus ómi ku lansa. Es meste sta prontu pa sai nóvi óra die s noti li. ²⁴ Tanbe, ranja uns kabalu pa Paulu monta, pa leba-l siguru ti governador Félis”. ²⁵ Dipôs, xéfi di trópa skrebe un kart apa governador Félis ki ta fla: ²⁶ “Eselentísimu Governador Félis: ²⁷ Es ómi li panhadu pa judeus. Es staba kuazi pa mata-l óra ki Ntxiga ku nhas trópa pa sokore-l, pamodi N diskubri ma es staba ta akuza-l pa uns kiston di ses lei, má e ska tenba ninhun akuzason kita mereseba mórti y nen kadiâ. ²⁸ Kómu N kreba sabekal éra razon ki es staba ta akuza-l, N leba-l pa raunion di tribunal más altu di judeus. ²⁹ N diskubri ma es staba ta akuza-l pa uns kiston di ses lei, má e ska tenba ninhun akuzason ki ta mereseba mórti y nen kadiâ. ³⁰ Dipôs N rasebe informason ma es staba ta trama un konspirason kóntra es ómi. Kel óra mê, N manda-l ti nho. Tanbe, N da órdi pa kes ki staba ta akuza-l, pa es ba dianti di nho p afla kes kuza ki es tem kóntra el. Ku nhas mantenha, Kláudiu Lísias, xéfi di trópa na Jeruzalen”. ³¹ Nton, kes soldadu faze di manera ki es mandadu. Es toma Paulu, y duranti noti es leba-l ti sidadi di Antipátridi. ³² Na kel otu dia, kes kabaleru kontínua ku Paulu, y kes otu soldadu volta pa kuartel. ³³ Kantu kes kabaleru entra na sidadi di Sezaréia, es da kel karta pa governador y es intrega-l Paulu tanbe. ³⁴ Kandu governador kaba di lé kel karta, e purgunta Paulu: “Abo é di kal pruvínsia?” Kandu e obi ma Paulu éra di Silísia, ³⁵ e fla: “N ta obi bu kazu kandu bus akuzador txiga tanbe”. Dipôs e da órdi pa Paulu ser guardadu na palásiu di Eródis.