¹ Ne bo let anyun, che kitupche, oboiboitu eng Kiptayat. Ma kaiimut iman eng ane asirwak tuguchuto, ago toretok akwee . ² Oribgee sesenik, oribege yaikab yaitio, oribege icheket che tilegei. ³ Amu ki ii kamuratanet achee--- che saei eng Tamirmirietab Jehovah ak kilosuge eng Kristo Jeiso , ama kitinye kamang'unet eng borto. ⁴ Ago ngobwati chi age tugul kolen tinyei kamang'unet eng borto, ko atinye ne sirtoot. ⁵ Kigimuratana eng betut nebo sisit, a bo keswekab Israel, aboo oretab Benjamin, Hebranindet nebo Hebranik, eng ngalekab ng'atutiet ko aii Parisaindet. ⁶ Eng Kagiiletabge, ko kianyalilii kaniset; eng imanda ne mi eng ng'atutiet ko kimatinye lelut. ⁷ Ago tuguk che ki boratet eng anee ko kiaiit chuto koek tugun buch amu Kristo. ⁸ Ee iman, ak aiiti tuguk tugul koek tugun che matinye komonut amu kelunatet ne bo naetab Kristo Jeiso kiptayandennyu. Kigobetyo tuguk tugul amu inendet, ak aitii ale buch tugul---si kobiit anyor Kristo, ⁹ ak kenyoruo eng inendet, ko matinye imandannyu, noto ko ne bo ng'atutiet, ago noto ne bunu kayanet eng Kristo--- imanda ne bunu Jehovah eng kayanet. ¹⁰ Ago nguno amache anai inendet ak kamuktaet ne bo ng'eetiennyi ak yamdaet ne bo nyalilwokikyii ak kekerkeutu tuwai eng meenyi, ¹¹ si kobiit anyor eng oret age tugul aiityi ng'eetyetab che kibek. ¹² Ma kele kianyoru ama kele kiaegu ne igesunotgei, ago agiljinige tai si kobiit anam noto ne kiyai Kristo Jeiso koguuro. ¹³ Che kitupche, ama aitii ane ale kaaityi noto. Ago ayae kito agenge, autie tuguk che mi let eng ane, ayogojinige tuguk che mi tai. ¹⁴ Agiiljinige tai, ait ole mito melekto ne bo kursetab barak ne bo Jehovah eng Kristo Jeiso. ¹⁵ Achee tugul che kage eechegitu anyun, ongibwat ko ogebwat ko u nito; ak ngobwat kiy ne ter eng ng'olyo age tugul, ko ng'angwok Jehovah noto agine. ¹⁶ Ago ne sire noto, ko ongebendate kosubge ak kanetisiet ne kigeityi. ¹⁷ Che kitupche, oegu che yaei tuguk che ayaei. Ak ogeer icheket che bendoti ko u kaborunet ne ogeerenech. ¹⁸ Amu bendoti che chang---- che kiamwowok kotugul agobo icheget, ak nguno amwawok eng rirek----ale icheget ko bunikab kimurtoiyotab Kristo. ¹⁹ Ne kagesuneng'wai ko luset. Ne cheptaileling'wai ko moeng'wai, ak kotororige eng tuguk che kililandoi. Che ibwati tugukab ng'weny. ²⁰ Ago kii bikab kipsengwet, che kiganyi yetindet kowechgei, inendet Kiptaiyat Jeiso kristo. ²¹ Ne tun walei kolelakitu borwekchoo che bo nyorotiet, si kobiit kogergeit ak bortanyi ne bo torornatet, eng kamuget noto imuchi koyai tuguk tugul kogas it inendet.