¹ Noto anyun, tupchosiekyu, chamanik che atinye emosto akwe che oii boiboiyennyu ak kutwennyu olumdegee anyun eng kiptaiyat chorondokchu. ² Asome mising Euodia ak asome mising Sunuke, koek che bo kabwatet agenge eng Kiptaiyat. ³ Eeh, asomin aginye kiboitiot ne bo iman kobotoo, ale toret chepyosochu amu kigiboisiei tugul eng logoiywek che tililen koboto Klementi agine ak chun alak che kii kiboitinik tugul che mi kainaikwai Bukuitab Sobondo. ⁴ Oboiboitu eng Kiptaiyat kotugul. Ak amwae kogeny ale oboiboitu. ⁵ Ingonaak mutyoneng'wong eng biko tugul. Kagorik Kiptaiyat. ⁶ Amogerer met eng kiy age tugul, ago eng kiy age tugul ko eng saet ak somet koboto kongoi, ingonaak somutikwok eng Jehovah, ⁷ ak ribei kalyetab Jehovah , ne sirei kaguiyet tugul, mugulelekwok ak kabwatutikwok eng Kristo Jeiso. ⁸ Ne bo let anyun, che kitupche, tuguk alak tugul che bo imanit, alak tugul che bo tegisto, alak tugul che bo imanda, alak tugul che tililen , alak tugul che chamotin , alak tugul che kimwoitoe ne kararan, ngo mi mieindo age tugul ,ak ngo mi kolosunet age tugul, obwat tuguchuto. ⁹ Tuguk che kionetge ak che kiotaach ak che kiogas ak che kiogeer eng ane oyai tuguchuto, ak kotebi kobotok Jehovah ne bo kalyet. ¹⁰ Ago ki abaibaitu mising eng Kiptaiyat ale koonanaa kogeny nguno. Kicham onanoo iman agot eng tai ak kabwatanoto iman ago kimotinye boroindo. ¹¹ Mang'alali amu kele matinye kiy. Amu kianetge eng atebet age tugul yo atinye ak yo matinye ko u noto. ¹² Angen ole ateptoii eng bananda, ak angen ole ateptoii ye katesagis tuguk. Eng kiy age tugul, ak eng tuguk tugul ko kianetgei ung'otietab biyeng'do ak rugutet, anyor che chang ak abanan. ¹³ Amuchi ayai tuguk tugul eng inendet ne kono kimnatet. ¹⁴ Ago kioyai ne mie amu kiotinye yamdaet eng nyalildanyu. ¹⁵ Ak ongen akwegei akwee Philipik, ole eng taunatetab logoiwek che tililen, ye kinga mande eng Makedonia, ko mabiit kaniset ne kitinyei yamdaet kobotoo eng ngolyotab kagoitoet ak taaget, kobate akwegee kityo. ¹⁶ Amu agot eng Tesalonika ko kioyokwo atkei tugul tuguk che kiabanani kosir agenge. ¹⁷ Ma kele acheng'e konunet. Ago acheng'e logoek chee tesoksei eng koitoeng'wong ak kolosunoik che bunu Jehovah. ¹⁸ Ago atinye tuguk tugul, ak che siirtoot. Abiyong'ot amu kiataach eng Epradito tuguk che kibunwok. Tuguk che bo ng'uunet ne nyamdut, tiseiywot ne taagaksei ne iboiboii Jehovah. ¹⁹ Ago inyitwok Jehovah nenyu kit age tugul ne obonani ko u magornatosiekyi eng torornatet eng Kristo Jeiso. ²⁰ Nguno anyun ngobunji Jehovah nenyo inendet Kwandannyo torornatet koigeny ak koigeny. Amen. ²¹ Ogat age tugul ne tilil eng Kristo Jeiso. Igotok tupchosiek che mi kobotoo. ²² Igatok bikab Jehovah tugul che tililen, mising ko icheget che mi Kapkaisari. ²³ Ingotebi mieindab Kiptaiyat Jeiso Kristo koboto tamirmirikwok.