¹ Ngo mito anyun cheerset age tugul eng' Kristo, ngo mito kagaigaet age tugul ne bo chamnyet, ngo mito yamdaet age tugul ne bo Tamirmiriet, ngo mito rirenetab age ak rirenet, ² onyit boiboiyennyu si otebi eng' kabwatet agenge, otinye chamnyet agenge, omi kibagenge eng tamirmiriet agenge ak katarjinet agenge. ³ Amoyai kiy age tugul eng' makyinetabge anan eng' kalasunetabge. Ago eng' kamining'etabge ne bo naet ngoit chito age kole kei kei biko alak kosir inendet. ⁴ Ama ta rib chi makutikyi kityo eng' akwee, ago magutikab biko alak kora. ⁵ Ng'otebenok ateboni ne kimi agine eng' Kristo Jesio, ⁶ Ne nga nda k i u Jehovah ko ma iit kole kito ne bo kamanut kogergeitge ak Jehovah. ⁷ Ago kiyaigei inendet koek buch ak kinam itondab otwogin ak, kesich kogergeit ak biko, ⁸ komining'itge ak kogas iit agoi meet eeh agot meet ne bo kimurtoiyot! ⁹ Noto anyun kigotoror Jehovah inendet mising ak kogochi inendet kainet ne siire kainaik tugul , ¹⁰ asi kobiit kogutuny kutung'to age tugul ngogas kainetab Jeiso eng' kipsengwet ak eng ng'weny ak eng' ng'weny orit , ¹¹ ak kong'any ng'elyebta age tugul kole Jeiso Kristo ko Kiptaiyat, ak koityi torornatetab Jehovah Kwanda. ¹² Noto anyun, chamanikyu ko u yo ko ogase iit kotugul, ma yo amite kityo ago ogase iit kosir oloo mamite, ogilge oboisieji saruneng'wong kosulda eng' kaiyweisiet ak botanet. ¹³ Amu Jehovah inendet ne boisie eng' oriting'wong si osich magetab oboisie ak oboisie agobo magennyi ne kararan. ¹⁴ Oyai tuguk tugul ama eng' kang'unyng'unyosiek anan eng' tiiyosiek ¹⁵ si kobiit oegu che matinye tisia ago che libwoben, legukab Jehovah che matinye kunenden eng' kwenutab ebendo ne kunur ak komastaat, ne okwengtei eng' kwenung'wai ko u lapkeiyosiek eng' ng'weny. ¹⁶ Onam anyun mising ng'olyotab sobondo si kobiit abaibaitu eng' betutab Kristo ale kima labat buch ak maboisie ne bo buch. ¹⁷ Eeh mbo nda mi kerongchino kaptisisiet agobo otisietab kayaneng'wong, abaibaitu ak agasige kobotok akwee tugul. ¹⁸ Ko u noto ak akwee oboiboitu ak ogasge koboto. ¹⁹ Ago amang'u eng' Kiptaiyat Jeiso ale legit si ayokwok Timoteo, si kobiit kogaigaa agane ye agas agobo atebeng'wong. ²⁰ Amu matinye chi age ne kerge ak inendet, ne tinye kabwatutik ak tetutik che kororon agobo akwe. ²¹ Amu chenge tugul tugukwai, ma tuguk che bo Jeiso kristo. ²² Ago ongen kamanutiennyi komie, ole kigeboisie tuwai eng' logoiywek che tililen ko u werit ak kwan. ²³ Amang'u anyun ale ayokwok inendet nguno eng' sait ko kaageer ole ateptoi. ²⁴ Ago amang'u eng' Kiptaiyat ale achoni anendet agane ko negit. ²⁵ Ago abwati ale kararan ayokwok Epaprodito. Inendet ko ne kitupche ak keboisiei tuwai ne askarindet koboto ago ne kiyoktoi neng'wong ak kiboitiot eng' banandanyu. ²⁶ Inendet ne tinyenok emosto, ak kitinye nyigisindo kocho ole omite, amu kiogas kele kimian inendet. ²⁷ Eeh iman kimian kot ko ki legit kome. Ago kirire Jehovah inendet, ago ma inegei kityo mbo ane si maegu ne atinye kaimutik eng' kaimutik. ²⁸ Kayogu inendet anyun kocho kochok, si ngogeer inendet kogeny obaibaitu ak si kong'ering'itu eng anendet kaimutik. ²⁹ Otaach inendet anyun, eng' Kiptaiyat koboto kagasetabge tugul. Ak ogonyit biko che u inendet. ³⁰ Amu ki agobo boiesietab Kristo si ko ki legit kome inendet. Marire sobondonyi si konyiitwa kito ne ki rartaat eng' boisieng'wong ne kioboisiewo.