¹ Kilany Jeiso moingetab beko, ak kolanda nganasennyi. ² Ogeer anyun, kigimutyi inendet chito ne kimioni ne ki meat borto korue eng' kitogut. Ak kingogeer Jeiso kayaneng'wai, koleji chito ne ki meat borto, "Weri, nyiganitu. Kagenyoun kaat tengekwogiguk." ³ Ak ogeer, anyun kimwa alak che bo sirik eng' mugulelwekwai kole, "Mwoei chichi ng'alek che yaachen agobo Jehovah." ⁴ Ak kinai Jeiso kabwotutikwai ak koleji, "Kaine si obwat yaitiet eng' mugulelwekwok? ⁵ Amu nee ne nyumnyum, kemwa kele kagenyoun kaat tengekwogiguk; nda kemwa kele 'ng'eet ak iwe?' ⁶ Ago si onai ole tinye kimnatet weritab chi eng' ng'weny konyochi kaat biko tengekwogik" koleji anyun ne meat borto, "Ngeet ib kitogung'ung' ak iwe kang'ung.'" ⁷ King'eet anyun ak kwo kanyi. ⁸ Ago kingoro tuiyosiek, koiywei, ak kolos Jehovah, ne kikegochi kimnotet biko ne u noto. ⁹ Ak kingosiirto Jeiso eng' oloto, koroo chito ne kigiguure Matayo kotebe ole kitooge aisurut; ak kileji "rubwa" kong'eet anyun ak korub inendet. ¹⁰ Kingo tebi Jeiso ng'weny koamis eng' koot, ogeer anyun, kobga taagikab aisirut ak kipteng'eginik ak koamis koboto Jeiso ak alamalyennyi. ¹¹ Ago kingogeer Paraisik, koleji alamalyennyi, amu nee si koamisie konetindeng'wong ak taagik che bo aisurut ak kiptengeginik?" ¹² Ako kingogas Jeiso, koleji icheket, "Momochei biko che chomegei chepkerichot, kobate che miandos. ¹³ Ago oba akwee, obonetge kito ne iboru ng'olyondoni: 'Amache rirenetabge ago ma tiseiywot.' Amu kima nyo aguur chebo imanda, ago kiptengeginik." ¹⁴ Kibwonji anyun alamalyetab Johana ak koleji, "Amu nee si kerugutigei ache ak Parisaik konyil che chang' ago merugutigei alamalyeng'ung'?" ¹⁵ Ak kileji Jeiso, "Tos imuchi icheket che kogiguurji katunisiet konyolilyo koto komi ak sandet? Ago bwonii betusiek che tun kiistoe sandet icheket, ak korugutge anyun. ¹⁶ Maimuchi chi konapchi akwot ne leel ngoriet ne os, amu kereri akwot ne leel ngoriet ne os, ak koyait kosiir ole ko kererat. ¹⁷ Ama indenoi biko divaik che leelach lolotinwek che osen. Amu kereri lolotinwek ak kotartagee divaik ak kobek lolotinwek, ako kindeni divaik lolotinewek che leelach, ak koribogis tuwai." ¹⁸ Ye kingo takomwochini icheket ng'alechu, ogeero, kicho bounindo ak kong'urukyi inendet ak kole "Kagome cheptanyu raa, ago nyo igonoor inendet eung'ung si kosob inendet." ¹⁹ Ak king'eet Jeiso korub inendet, ak kiirub alamalyennyi agichek. ²⁰ Ogeero, chepyoset ne kimondoe korotik eng' kenyisiek taman ak aeng', kiirubu Jeiso eng' let, ak kotiiny tabandab ngorienyi. ²¹ Amu kimwa eng' muguleldonyi kole, "Ngot atiiny kityo ngorienyi, asobe." ²² Ago kiweechge Jeiso kogeer inendet, ak kole, "Chebi nyigantitu; kagobsoobin kayaneng'ung'." Ak kisob chepyoset kongete sainata. ²³ Ak kingoit Jeiso kaitab bounindet ak kogeer che kuute ndurerusiek ak biko che ki boldos. ²⁴ Koleji, "Oistege; amu mame chepto ago inuuchi." Ago kirorichi icheket inendet eng chotet. ²⁵ Ago kingo kageon tuiyet koba sang' kwo got ak konam eutab cheboto, ak kong'eet inendet. ²⁶ Ak kigos ng'olyondenoto eng' emonoto komugul. ²⁷ Ak kingosiirto Jeiso kwo eng' oloto korub inendet kipkoratinik aeng'u. Kiwogoti ak kolen, "Rirenech, eeh weritab Daudi!" ²⁸ Ak kingo kakwo got kobwonji inendet kipkoratinichoto. Ak koleji Jeiso, "Oyaani ole amuchi ayai nito? Komwa kole, "Eeh kiptaiyandeni." ²⁹ Kotwa anyun konyekwai ak kole, "Ingoek eng' akwee ko u kayaneng'wong'," ³⁰ ak kiyotogis konyekwai. Ak king'at Jeiso mising' koleji, "Amogany konai chi." ³¹ Ago kiba, ak koleetat ng'olyot agobo inendet eng' emonoto komugul. ³² Ak ye kingo bendi bichoto aeng, ogeero kigimutyi Jeiso chito ne namat kut ne kitinyei oindet. ³³ Ak kingo kageon oindet, kong'alal chito ne namat kut. Ak kikwong'io tuiyosiek kole" Kitomo kegeere ne u ni eng' Israel!" ³⁴ Ak kimwa Paraisik, kole "Onei oik koboisie kimantet nebo oik" ³⁵ Ak kitoi Jeiso kowendot eng nganasok tugul che eechen ak che mengeechen, Konetisioti eng' sunagogisiekwai, ak koamdaati logoiywek che tililen chebo bounatet, ak kosobooti che miandos eng' koroito age tugul ak eng' nyalulanet age tugul. ³⁶ Ago kingogeer tuiyosiek koriree icheket amu ki nyorotin ak koiyestootin, ko u kechirek che matinyei mestewot. ³⁷ Kileji anyun, alamalyennyi, "O kesisiet iman, ago ng'ering kiboitinik. ³⁸ Noto anyun osa kiptaiyat ne bo kesisiet, si kobiit koyokyi kiboitinik kesisienyi."