¹ Ak kiguur Jeiso alamalyennyi taman ak aeng' kobwonji inendet, ak kogochi kimnatet si koon tamirmiroik che muruonen, ak kosoob che miandos eng' koroito age tugul ak eng' nyalulnatet age tugul. ² Chu ko kainaik che bo che kiyoktoi taman ak aeng' nebo tai ko Simion, ne kiguure Petero, ak Andrea, wering'wai, Jacobo weritab Zebedi, ak Johana wering'wai; ³ Pilipu, ak Bartolamayo, Tomas ak Matayo taagindetab aisurut; Jakobo weritab Alpayo; ak Tadayo. ⁴ Simion kananindet, ak Judas Iskariot ne king'wektoi inendet. ⁵ Kiiyokto Jeiso chuto taman ak aeng' ak kong'at icheket koleji. "Amobe oret age tugul ne bo Bororiosiek, amobe nganaset age tugul nebo bikab Samaria. ⁶ Ago keigei obe ole mi kechirek che betyotin che bo kotab Israel; ⁷ Ak ng'obendi oamdaaji oleji, 'Kagoleitit bounatetab kipsengwet.' ⁸ Osoob che miandos, ong'eet che kigobek, otilil che tinye mogondosik, oon oik. Kagekonok buch, ogoite buch. ⁹ Amoibote tahabu nda ko feda nda ko sendeisiek eng' lolotinwekwok. ¹⁰ Amoib lolet eng bandang'wong, anan ko sumotik aeng' nda ko kweonik nda ko kirokto; amu muchini kiboitiot amitwogikyi. ¹¹ Ak eng' nganaset age tugul ne omongjini, oteb chito ne nyolu (ne taachey too), ak oteebe yoto agoi obe. ¹² Ak ye obe got orit ogatisie. ¹³ Ak ngo nyolu goyoto, ko ingotebee kalyeng'wong ago ngo manyolu ingoweekyokgei kalyeng'wong. ¹⁴ Ak age tugul ne matoochok nda kogas ng'alekwok, ko ngomande eng' goyoto nda nganasanato, olelekte temburiek eng' kelyekwok. ¹⁵ Amwowok iman ale kaigaitu emetab Sodom ak Gomora eng' betutab kiruoget kosiir nganasanoto. ¹⁶ "Ogeer anyun, kayoktook ko u kechirek eng' kwenutab suik, noto anyun ong'omegitu ko u erenok, ak otalaitu kou cheptugenik. ¹⁷ Ago oribge biko! Amu imutyinok kapkiruoget, ak kobirenok kipchoritisiek eng' sunagogisiekwai. ¹⁸ Ak kimutyinok taitab bounik ak laitorinik agobo ane si koek baornatet eng' ichek ak eng' bororiosiek. ¹⁹ Ago ngo goitook, ko mogerer met agobo ole ong'ololdoi, ak kito ne omwoei, amu kigonok eng' sainoto kito ne omwoei. ²⁰ Amu ma akwee che ong'alali, ago tamirmirietab kwandang'wong ne ngalali eng' akwee. ²¹ Ak kong'wekta chito wering'wai kong'wekyi meet, ak kong'wekta kwanda lekwenyi. Ak kong'eetyi leguk sigikwai ak kogoito kebar. ²² Ak kowechok biko tugul agobo kainenyu ago inendet ne muitoi agoi kagesunet kesoru. ²³ Ago ye kinyalilak eng' nganasani, omwechi age, amu amwowok iman ale, mobendi otare nganasok che bo Israel kotomo koit Weritab chi. ²⁴ "Masiirei chito ne keneti konetintenyi, ama siirei otwogindet kiptaiyandennyi. ²⁵ Ago yamei kotebi ne keneti kou konetindennyi, ak kotebi otwogindet ko u kiptaiyandennyi. Ak ngot ko kiguure icheket Beelsebul chitab kobo kaita, kotam nee ichekeket che bo gonnyi!. ²⁶ Moiywei icheket anyun amu noto, amu mami kiy ne tugot ne matun king'onyei ama mi kiy ne ung'at ne matun nayoksei . ²⁷ Ne amwowok eng' tuindo, ongalale eng' lapkeiyet, ak kito ne okase eng' itit, omwaite eng' korik barak. ²⁸ Amoiywei icheket che borei borto, ago ma imuchi kobar sobondo; ago kaigai oiywei inendet ne imuchi kobar sobondo koboto borto eng' oretab mat (Gehenna). ²⁹ Tos mogioldoe taritik aeng' che tiginen kebebertab taman nebo denarit?. Amaibutyini ing'weny agenge eng' icheket ko mainget Kwandang'wong'. ³⁰ Ago iitotin mbo sumeek tugul che bo metewoikwok. ³¹ Noto anyun amoiywei. Siire kamanutieng'wong' taritik che tiginen che chang'. ³² Noto anyun age tugul ne ng'onyo eng' taitab biko abortoi agine eng' taitab Kwandanyu ne mi kipsengwet. ³³ Ago age tugul ne ma mwaitoo eng' taitab biko atoe inendet agine eng' kipsengwet. ³⁴ "Mobwat ole kianyo aipchi ng'weny kalyet, ago kianyo aipchi rotwetab chok. ³⁵ Amu kiacho apesie chi ak kwanda, chepto ak kamet, asotiotab werit, ak kametab werit. ³⁶ Amu egu bunikab chi bikab konyi. ³⁷ Inednet ne chamei kwandanyi anan kamenyi kosiiro ko monyoljino ak inendet ne chamei werinyi anan cheptanyi kosiiro ko manyoljino. ³⁸ Ak inendet ne maibe kimurtoiyondennyi ak korubwa ko manyoljino. ³⁹ Inendet ne ribe sobondonyi kobeeti ak inendet ne ibeeti sobondonyi agobo ane ko tun nyoru. ⁴⁰ "Inendet ne toochok ko kataacha ak inendet ne toocho ko kataach ne kiyokwo. ⁴¹ Inendet ne tooche maotiot eng' kainetab maotio konyoru melektab maotio, ak inendet ne tooche chi ne bo iman eng' kainetab chito ne bo imanda konyoru melektab chito ne bo imanda. ⁴² Ak age tugul ne igochini agenge eng' chu tiginen kikombet ne bo beko che kaititen kityo eng' kainetab alamalyet amwowok iman ale mabetyini melektanyi ne matiny."