¹ Ak ko kingo kagong'at Jeiso alamalyennyi taman ak aeng', kwo eng' oloto konetisiot ak koamdoi eng nganasokwai. ² Ak kingogas Johana eng' korgoret boisionik che bo Kristo, koyoktoe alamalyennyi ng'olyo ³ ak kotebe inendet kole, "Tos ii inendet ne choni nda kigonye age?" ⁴ Ak kiwolji Jeiso koleji, "Oba bandang'wong' ak omwochi Johana tukuk che ogose ak che ogeere. ⁵ Kertoi che koriotin, ak kobendoti che solomonik, kitilili che tinyei mogondosaik ak kastoi che ming'iotin ak king'eeti che kikomeiyo, ak keamjini kibananok logoiywek che tililen. ⁶ Ak baibai age tugul ne makinagi agobo ane". ⁷ Ak kingo takobendi bichu bandang'wai, kotoi Jeiso komwochi tuiyosiek agobo Johana koleji, "Kingomande surkwen oroo nee--tegat niitumdumi usonet? ⁸ Ago kiomande oroo nee--chito ne ilochi ngoroik che tangusen? Tos iman, olo, icheket che iloochi ngoroik che tangusen komenye gorikab laitorinik. ⁹ Ago kiomandei obe ogeer - maotiot? Ee, amwowok ale siirei inendet maotiot. ¹⁰ Nito ko inendet, ne kigisir kele, 'ogeer anyun, ayoktoi kiboitiondennyu kondoenin ne chobei oreng'ung eng' taing'ung'.' ¹¹ Amwowok iman ale tomo kobiit ne siirei Johana kabatisanindet eng' che kisich kwonyik. Ago inendet ne mining mising eng' bounatetab kipsegwet ko o kosiir inendet. ¹² Ak kong'ete betusiek che bo Johana kabatisanindet agoi raa koruechini biko bounatetab kipsengwet, ak namei biko che koromen eng' kimnatet. ¹³ Amu kimaotenyo maotik tugul ak ng'atutik agoi koit betusiekab Johana; ¹⁴ ak ngomoche otaach ko u nito, ko Elijah nito ne nyonii. ¹⁵ Inendet ne tinye itit che kostoe kogas. ¹⁶ Ago agergeite nee ebeni? kerge ak leguk che tebsot eng' orisiekab aldaisiet ak koguure alak, ¹⁷ ak kole 'kigeguutwak kurerut ak ki ma ourerenie; kigiteiye ak kima oririe.' ¹⁸ Amu kicho Johana ak kima amis nda koee divaik ak ki omwa ole "tinyei oindet.' ¹⁹ Kicho weritab chi koamis ak koeiso ak komwa biko kole, 'otopen chito ne chemoetyo ak eeindetab divaik choruetab togikab aisurut ak kipteng'eginik!' Ak naat ng'omnotet kele bo iman eng' boisionikyi." ²⁰ Kitoi anyun koger kong' nganasok che kigiyoe boisionik che bo kamuktaet che chang' kosiir, amu kimosik. ²¹ "Bwo eng inye we Korasin! Bwo eng inye we Betsaida! Amu nda kiga kiyai eng' Tyre ak Sidon boisionik che bo kamuktaet che kigiyai eng' akwee nda kiga kosik keny kolaach kuniok ak koiilege aronik. ²² Ago amwowok ale, kaigaitu tun Tyre ak Sidon eng' betutab kiruoget kosiirok. ²³ Ak inye, Kapenaum, ko tos kitororin agoi kipsengwet? Olo, ichortoige agoi oldab che kigobek. Amu nda kiga kiyai eng' Sodom boisionik che bo kamuktaet che kigiyai eng' inye ko nda mito agoi rani. ²⁴ Ago amwowok ale tun kaigaitu emetab Sodom eng' betutab kiruoget kosiirin." ²⁵ Eng' betusiechoto komwa Jeiso kole, "Alosun inye, we Kwanda, Kiptaiyatab kipsengwet ak ng'weny amu kiiung'e tuguchu che ng'omen ak che iguitos, ak kiing'onji icheket legoi che mengechen. ²⁶ Ee Kwanda, amu kicham inye eng' kereng'ung'. ²⁷ Kigogono tukuk tugul Kwanda ama mi ne inget Werit, kobate kwanda, ama mi ne inget kwanda kabate Werit, ak chi age tugul ne chamei Werit kong'ongjini. ²⁸ Obwonjo akwee tugul che oiimige ak che ogeseni tuguk che nyigisen, si agonok kamuung'et. ²⁹ Olaach kaat choginnyu ak onetenage, amu atalaa ak atinye kamining'itetabge eng' mukuleldo, asi onyoru kamung'eet eng' sobonwekwok. ³⁰ Amu nyumnyum chokinnyu ak wisis milennyu."