¹ Eng' betusichoto kobun Jeiso mbarenikab beka eng' betutab sabato ak kiome rubet alamalyennyi ak kitoi kobor mesisekab beka ak koam. ² Ago kingoroo Paraisaik koleji inendet, "topen yaei alamamlyeng'ung' ne ma chamdaat eng' ng'atutik keyai eng' Sabato." ³ Ago kileji icheket, "Tomo osoman kito ne kiyai Daudi ye ki ngoame rubet, ak che ki mito ak inendet? ⁴ Kiwo gotab Jehovah ak koam makatinikab kabartaet, che ki ma chamdaat eng' ng'atutik koam inendet koboto che kimito ak inendet, kobate tisiik ichege. ⁵ Tomo osoman eng' ng'atutik, kele ing'waniti tisiik Sabato eng' hekalut, ama kiityini icheket tengekto? ⁶ Ago amwowok ale eng yu komi ne o kosiir hekalut. ⁷ Ago nda kionai kito ne kimwoe eng ni, 'Amache rirenetabge momoche tiseiywot,' nda ma ogikyini che malel kiy. ⁸ Amu Weritab chi ko Kiptaiyat ne bo Sabato." ⁹ Ak kiwo eng' oloto, agoi sunagoging'wai orit. ¹⁰ Ogeer anyun, kimi chi ne meat eut. Ak kiteebe Parisaik Jeiso koleji, "Tos chamdaat eng' ng'atutik kesoob chi eng' betutab sabato?" si kobiit komwaitae tengekto. ¹¹ Ak kileji ichek Jeiso, ano chi eng' akwee ne tinye kechiriet agenge, ak ngo ko rorokyi kebenet betutab sabato ko tos mabolu komong? ¹² Siirtoot anyun ne tia kamanutietab chito eng' kechiriet noto anyun chamdaat keyai ne kararan eng' betutab sabato." ¹³ Ak Kimwochi Jeiso anyun chichoto koleji ,"Chul eung'ugung". Ak kichul ak kosob kogergeitge ak eut nin age. ¹⁴ Ak kimanda anyun Paraisik ak koruoch agobo inendet ole bortoi. ¹⁵ Ak ye kingonai Jeiso, kwo eng' oloto, ak kirub inendet tuiyet ne o ak kisoob ichek tugul. ¹⁶ Ak king'at ichek kole, si maibarta inendet, ¹⁷ si kosulda ne ki kamwa maotiot Isaia kole, ¹⁸ "Oroo, otwogindennyu ne kialewen, chamanennyu, ne baibai sobondonnyu eng' inendet. Andeni inendet Tamirmiriennyu si komwochi bororiosiek kiruoget. ¹⁹ Mang'ichinige nda kobol; nda ko kas chi kutinnyi eng' ortinwekab nganaset . ²⁰ Mairii tegat ne sisot; ama imisi inendet kitambit ne iyeni agoi koyokto kiruoget ne iterterisie, ²¹ ak imang'u bororosiek kainennyi." ²² Kigimutyi anyun chito ne kitinyei oindet, ne korat, ak ne namaat kut; ak kisoob inendet kot to ngalal ak kogeerto chito ne kimagertoi. ²³ Kokwongio tuiyosiek tugul an kole, tos weritab Daudi nito? ²⁴ Ago kingogas Paraisik kole, "Maone chichi oiK, kobate eng' Beelsebul, ne o ne bo oik." ²⁵ Ak kingonai Jeiso kabwatutikwai, koleji icheket "Bororiet age tugul ne pcheegei ko ma tononi, ak nganaset nda ko got age tugul ne pcheegei ko matononi. ²⁶ Ak ngot ko ng'et Chesawil ko on chesawil, ko kapcheigee inegei. Tonondoi ano anyun baunatenyi? ²⁷ Ak ngot ko aone oik eng' Beelsebul, koone eng' ng'o werikwok? Eng nito anyun ko egu icheket che tun iruokwok. ²⁸ Ago ngaone oik eng' Tamirmirietab Jehovah ko kagoitwak anyun bounatetab Jehovah. ²⁹ Nda imuktoi ano kwo chi gotab chito ne kim si kosare anyun tugukchi, kotomo korat inendet? Si komuc anyun kochore tugukchi che mi gonnyi. ³⁰ Inendet ne magimi tuwai, kogirindaa ak inendet ne makiyumi tuwai koseeri. ³¹ Noto anyun amwowok ale kinyochini kaat biko tengekto age tugul, ak ng'olyot age tugul ne ya, ago ne mwaei ng'olyo ne ya agobo Tamirmiriet ko makinyochin kaat. ³² Ak age tugul ne mwoitoe yaitio weritab chi kenyochini kaat; ago age tugul ne mwoitoe yaitio Tamimiriet, ko ma kinyochini kaat eng' ng'wenyuni kimi anan ko eng' ne nyoni. ³³ Oyai ketit kogararanit ak logoekyi koek che kororon, nda oyai ketit koyait anan logoekyi, amu kinae ketit logoekyi. ³⁴ Akwee legukab erenok amu oi cholwokik, omuktei ano akwee che oyachen, omwa tuguk che kororon? Amu ng'ololi kutit che nyiitat muguleldo. ³⁵ Chi ne kararan korong'u tugul che kororon che bunu konoruennyi ne bo mugulelndannyi, ak rang'u chito ne ya tuguk che yaachen kobun konoruennyi ne bo muguleldo ne ya. ³⁶ Ak amwowok ale ngolyot age tugul ne bo buch ne mwoei biko ko tun tetu tuguchoto eng' betutab kiruoget. ³⁷ Amu kiityinin imanda eng' ng'aleguk, ak kigikyinin eng' ngaleguk." ³⁸ Kiteeb anyun alak chebo sirik ak Parisaik kole, "Konetindoni, kimache kegeer kaborunet ne iboruech." ³⁹ Ago kiwolji Jeiso koleji,"Eeh akwee ebendo ne ya ne cheng'e kaborunet ak magigochin kaboruno age tugul, kobate koborunetab maotiot Jona. ⁴⁰ Amu ko u ye kimito Jona betusiek somok ak kemousiek somok moetab njiriot ne o mising; ko u noto tun tebe Weritab chi betusiek somok eng' muguleldab ng'weny. ⁴¹ Tun tonondos murenik chebo Ninebe koboto ebeni eng' kiruoget ak kogikyi amu kisik eng' mwaitaet nebo Jona; ak oroo, mi ne o kosiir Jona eng yu. ⁴² Ng'eete tun laitoriat chepyoset ne bo murot ne bo tai koboto ebeni eng' kiruoget, ak kogikyi icheket. Amu kibun tabanwekab ng'weny chepyosoni si kogas ng'omnatetab Solomon, ak ogeer anyun mi yu ne o kosiir Solomon. ⁴³ Ago ngo kakomong'une chi tamirmiriet ne muruon, kwo kobunot ole yaamat, kocheng'oti ole imung'e amanyoru. ⁴⁴ Noityo komwa kole 'Awektige gonnyu ole kiamong'une; ak ngoit konyor ko mami kiy-- ak ko ibugot ak ko chobot. ⁴⁵ Kwo anyun komut tamirmirik alak tisab che yacheen kosiir inendet ak kochut ak komeny oloto, ak eng' let koyaitu atebtab chichoto kosiir ne kibo tai. Egu ko u noto eng' ebeni ya." ⁴⁶ Kingoto kong'ololjini Jeiso tuiyosiek, ogeer, kitonondos eng' sang' kamet ak che tupcho, kocheng'ee kong'ololji inendet. ⁴⁷ Ak kimwochi anyun chito age koleji, "Keero tononi eng' sang' komet ak che otupche chenge kongololun." ⁴⁸ Ago kiwolji Jeiso chito ne kimwochini inendet koleji, "Ng'o kamennyu ak che werik che ketupche?" ⁴⁹ Ak kochul eunnyi kotokyi alamalyennyi, ak kole, "Otopen, chu kamennyu ak che kitupche! ⁵⁰ Amu age tugul ne yaei magetab Kwanda ne mi kipsengwet, noto werit ne ketupche, ak chepto ne kitupche, ak kamennyu."