¹ Eng betunoto ko komanda Jeiso eng' got kwo kotebe tapanutab araraita. ² Ak kiiumjige inendet tuiyosiek che eechen, kolany moingetab beko anyun, ak kotebe ng'weny; ak kitonone tuiyet komugul tabandab araraita. ³ Ak kimwochi icheket tugul che Chang' eng' kalewenaik, koleji, "Ogeer, anyun kiwo kolindet koleita kesuwek. ⁴ Ak kingoto koleitoi, kobutyi kesuwek alak tabandab oret ak kibwa taritik koam ⁵ ak kibutyi alak ole mito koik, ole kima kotinyei ny'ung'unyek che chang'; ak kobityo ngunoto amu kima ko tia ny'ung'unyek. ⁶ Ago kingo til asista, komel ak kiyomyo amu kima kotinyei tigitik. ⁷ Ak kiibutyi alak katok; ak kobityo katok ak kogiich. ⁸ Ak kiibutyi alak ny'ung'unyek che kororon, ak koiyo alak bokol, alak tamonwogik lo, ak alak sosom. ⁹ Inendet ne tinye itik che kostoe, kogas." ¹⁰ Ak kibka alamalyet, ak koleji, "Kainee si ing'oloji iche eng' kolewenoik?" ¹¹ Ak kiwolji ichek koleji, "Kigegonok akwee onai ung'otik che bo bounatetab kipsengwet ago ma kigochi icheket. ¹² Amu age tugul ne tinyei ko tun kigochini si konoyor che chang' kosiir; ago age tugul ne matinyei kesore mbo che katinyei. ¹³ Noto anyun ang'ololjini eng' kalewenoik amu mbo nda keertoi ko mageere kiy, ak kostoi ama kose kiy nda koguiyo. ¹⁴ Ak isuldaat eng' ichek maoinatetab Isaia, ne len 'Eng' kaset ogase ago moguitosi mbo ngatigin, ak eng' keeret, ogeere ago mobestosi mbo ngatigin. ¹⁵ Amu kwalilenotin mugulelwekab bichu, ak mogostoi komie itikwai, ak kiger icheget konyekwai, si meroo eng' konyegkwai, nda kogas eng itikwai, nda koguiyo eng' mugulelwekwai si kowechge kogeny ak asoob ichek." ¹⁶ Ago boiboen konyekwok, amu tapentoi ak itikwok amu kostoi. ¹⁷ Amu amwowok iman, ale kimache maotik che chang' che bo imanda koroo tuguk che ogeere, ago kima keer, ak kimach kogas ng'alek che ogase ago kima kas. ¹⁸ Ogase anyun akwee kalewenet ne bo kolindet. ¹⁹ Ye kasei chi age tugul ng'olyotab bounatet ama iguiyo, ko chi anyun inendet, kochoni ne ya ak kosaree ne kiga kigolchi muguleldonyi. Nito ko kesuwot ne kigilechi tabantab oret. ²⁰ Ak inendet ne kigilechi ole mi koik nito inendet ne kose ng'olyot ak kotaach ngunoto eng' boiboiyet. ²¹ Ago matinyei tigitik inendet, ago tebche ne matia; ak ngojo nyalilda nda usisiet agobo ng'olyot kobut ngunoto. ²² Ak inendet ne kigigolji ole mi katok ko inendet ne kose ng'olyot ak kogiich ng'olyot kererwekab met che bo ng'weny ak kaberberisietab magomatet si mai logoek. ²³ Ak inendet ne kigilechi nyung'unyek che kororon ko i inendet ne kase ng'olyot ak koguiyo; ne iyie logoek iman, alak bogol, alak tamanwogik lo, alak sosom." ²⁴ Kiiborji kalewenet age ichek, koleji, kergei bounatetab kipsengwet ak chito ne kigolji kesuwek che kororon mbarenyi. ²⁵ Ago ye kita koruitos biko kocho bunyondennyi ak kogolji chemulbainik ole mito beka ak kwo. ²⁶ Ago ye kingo bityo ak koi beka, kotook agichek chemulbainik. ²⁷ Ak kibwa otwogik chebo chitab got ak kileji, 'Kiptaiyandani, kima igolji kesuwek che kororon mbareng'ung'? kibun ano anyun chemulbainik?' ²⁸ 'Ak kileji ichek, 'Kiyaei noto bunyot.' Ak kileji otwogik, 'Tos imache kebe kengusate?' ²⁹ Ago kile, achicha; si ma ng'o ngusu chemulbainik ongusu beka . ³⁰ Ingobityo tugul agoi kesisiet; ak eng' betutab kesisiet amwochi kesiik aleji "Oyum korok chemulbainik ak orat ratutik si obeel; ak oyumji chogennyu beka."" ³¹ Ak kiiborji Jeiso kalewenet age koleji, "Kergei bounatetab kipsengwet ak kesuwotab mogoiwet, ne kiib chito ak kominji mbarennyi. ³² Kesuwoni ko kitigin iman eng' kesuwek tugul ago ngo kagoeet ko o eng' mbarennyi tugul ak egu ketit ne tebe taritik temenikyi." ³³ Kimwochi kalewenet age koleji. "Kergei bounatetab kipsengwet ak mermerek (biteek) che kinam chepyoso ak kongolta busiek che bo kitongok somok, agoi kogut tugul." ³⁴ Kimwochi Jeiso tuiyosiek tuguchito tugul eng' kalewanaik; ak kima ng'ololji ichek ama eng' kalewenet. ³⁵ Si kosulda ne kiga mwa maotiot kole "Ayate kutinnyu eng' kalewenoik. Amwoe tugul che kigiuny kong'ete kogakilumda ng'weny." ³⁶ Kibagakta Jeiso tuiyosiek, ak kwo kot orit. Ak kibwonji alamalyennyi koleji, "Iborueech kalewenetab kertit ne mi eng mbaret." ³⁷ Ak kiwolji Jeiso kole, inendet ne kikol kesuwek che kororon ko Weritab chi. ³⁸ Ak mbaret ko ng'weny; ak kesuwek che kororon ko werik che bo bounatetab Jehovah. Ak chemulbainik ko werikab inendet ne ya, ³⁹ ako bunyot ne kigole chuto ko chesawilyet. Ak kesisiet ko kagesunetab ng'weny, ak kesiik ko malaikaisiek. ⁴⁰ Ko u yo kiyumi chemulbainik ak kebeel eng' mat, ko u noto eng' kagesunetab ng'weny. ⁴¹ Iyoktoi Weritab Chi malaikaisiekyi koba koum komoong'une bounatennyi tuguk che inochi biko, ak icheket che yaei tengekto. ⁴² Ak kowirjini mat ne o, ole egu eng' oloto kateet ak nyeetab kelek. ⁴³ Ak ikweng'toi anyun che bo imanda ko u asista eng' bounatetab Kwandangwai. Inendet ne tinye itik, kogas. ⁴⁴ Kergei bounatetab kipsengwet ak tugukab kamanut che ung'otin eng' mbaret. Ne kinyor chito ak kouny. Eng boiboiyet kwo kogosotegei ak koalda tuguk che kitinyei tugul ak koale mbaranoto. ⁴⁵ Kogeny, kergei bounatetab kipsengwet ak chemung'araiyat ne cheng'ei sanaek che bo kamonut. ⁴⁶ Ak ye kingo kagonyor sanaiyat agenge nebo alyet ne o, kwo koalda tugul che kitinyei ak koal sanaiyandanoto. ⁴⁷ "Kogeny, ko kergei bounatetab kipsengwet ak regereiywot ne kiname njirenik, ni kigiwirji araraita, ak konam njirenik alak tugul che terotin. ⁴⁸ Ak ye kingo kagonyi, kochuut ramikab njirenik kocho tabandab araraita. Ak kotebi ng'weny koyumji che kororon kitongok, ago kowirta che yachen. ⁴⁹ Egu ko u noto eng' kagesunetab ng'weny. Tun bwoni malaikaisiek ak kobesio che yaachen eng' kwenutab che bo imanda. ⁵⁰ Ak kowirji mat ne lalei, ole tuun mi kateeiyet ak nyeetab kelek" ⁵¹ "Kaoguiye tugucho tugul?" koleji, alamalaikchi "Ee". ⁵² Ak kileji Jeiso ichek, "Amu noto anyun sirindet age tugul ne kikoek alamalyet ak kongen komie ng'alegab bounatetab kipsengwet, ko kergei ak chito ne bo kot, ne inget ole konore tugukyi che bo kamanuut." ⁵³ Ak kingo kagotar Jeiso kalewenoichu kwo eng' oloto. ⁵⁴ Ak kiit emennyi ak konet ichek eng' sunagoging'wai. Kikwong'io anyun ak kole, "Kanyorune ano chichi ng'omnotoni ak ak boisionichu kimen? ⁵⁵ Tos ma weritab muswogindet nito? Magiguure kamet Maria? Ak werik che tupcho ko Jakobo, Joseph, Simion ak Judas? ⁵⁶ Ak tibik che tupcho kotos ma kimi tugul ak icheget? Kinyorune ano anyun chichi tuguchu tugul?" ⁵⁷ Ak kiinach icheket ng'alekyi. Ago kileji Jeiso ichek, "Mabetyini maotio teegisto kobate eng' korenyi ak eng gonyi." ⁵⁸ Ak kima yai boisionik che chang' che bo kimnotet eng' oloto amu bistoengwai.