¹ Kigas anyun eng' betusiechoto bounindet Herod logoiywek agobo Jeiso. ² Ak koleji otwogikyi, "Nito ko Johana Kabatisonindet; ne kagong'eet eng' che kigobek. Noto anyun boisie eng' inendet kimnatosiechu." ³ Amu kiga konam Herod Johana korat, ak kondeno korgoret agobo Herodias chepyosetab Pilipu wering'wai. ⁴ Amu kileji Johana inendet, "Etat eng' ng'atutik obaigei ak kwonyito koek chepyoseng'ung". ⁵ Ak kimachei Herod kobar inendet, ago kiiywei biko amu kigiit kele inendet ko maotiot. ⁶ Ago kingoit betut ne bo sigetab Herod, koureren cheptab Herodia eng' kwen, ak kiibaibait Herod. ⁷ Ak kiiyosiechi kogochi kiy age tugul ne kasoom. ⁸ Ak ye kingo kagong'at kamet komwa kole, "Konoo metitab Johana kabatisanindet eng' tageito". ⁹ Kiimgei anyun laitoriat eng ng'olyondoni; ago amu konyit ne kiting'e icheket che kitebsot ak inendet eng' amisiet, kong'at kegochi. ¹⁰ Ki iyokto anyun ketil metitab Johana eng' korgoret. ¹¹ Ak kigiib metinnyi eng' tageito kigochi chepto; ak koipchi kamet. ¹² Kibwa anyun alamalyennyi koib musto ak kotub. Ak kiba komwochi Jeiso. ¹³ Ak kingogas Jeiso kwo eng' oloto kolany moingetab beko,ak kwo agoi surkwen kotabangei. Ak kingogas tuiyosiek, korub inendet kobun kelyek kong'eete nganasok che echeen. ¹⁴ Ak kingo mong' kogeer tuiyet ne o. Ak kirire icheket, ak kisoob bikwai che kimiandos. ¹⁵ Kingoek koskoleng,' kobwonji alamalyennyi koleji, "Surkwen koroni, ak kagoimen; mete tuiyet koba nganasok, si koaljige amitwogik". ¹⁶ Ago kileji Jeiso "Manyoljini koba, ogochi kwomis." ¹⁷ Ak kileji, "Kitinye eng' yu makatinik muut ak njirenik aeng" ¹⁸ Ak kolelji Jeso, "oibwo". ¹⁹ Ak king'at tuiyosiek kotebi ng'weny eng' suswek. Ak kinam makatinichoto muut, ak njirenik aeng'. Ak kinyal kipsengwet, koberur ak kobutul ak kogochi alamalyennyi makatinik ak kogochi kasubik tuiyosiek, makatinik. ²⁰ Ak kiamis tugul kobiong'io. Ak kiium katuganik che kinyi kitongesiek taman ak aeng'. ²¹ Icheget che ki amis ko ki legit murenik elufusiek muut ama kiit chepyosok ak leguk. ²² Ak kiichirchir eng' Noto alamalyennyi kolany moingetab beko, ak kobate bitonin kondoe inendet; ye kito koyomisi tuiyosiek koba. ²³ Ak kingo kagotiagta tuiyosiek koba, kolany tulwet kwo kosa ;akoi koimenji oloto kimito inegei. ²⁴ Ago kiga koit moingetab beko araraita kwen, kotumtumen eng' mildaetabgei ne bo beko, amu kigirindoi icheget usonet. ²⁵ Ak eng' ripset ne bo ang'wan ne bo kemoi kwo ole mi icheget, kobunei araraita barak. ²⁶ Ak kingogeer alamalyennyi inendet kobune araraita barak koiyweis ak kole, "Nito ko tamirmiriet"; ak kowokcho amu kaiyweisiet. ²⁷ Ago king'oloji Jeiso icheget eng' yoto koleji, "Onyiganitu! ane Nito! Amoiyweisie! ²⁸ Ago kiwolji Petero koleji "Kiptaiyandani, ngot ko inye ing'ata ajonjin abun beko barak." ²⁹ Ak kile Jeiso, "Nyoo." Ak kiwol Petero eng' moingetab beko, kobun beko barak kwo ole mi Jeiso. ³⁰ Ago king'oro usonet koiywei. Ak kingotoi kochut beko kowach kole "Kiptaiyandani sorwo!." ³¹ Ago kichuul Jeiso sainata eunnyi, konam inendetok koleji; "Ee inye ne itinyei kayanet ne tigin, kaine asi isage?" ³² Ak kingo kagolany ichek moinget, kosis usonet. ³³ Ak kigutungji inendet icheket che ki mi moingetab beko kole iman ii Weritab Jehovah." ³⁴ Ako kingo kagolanda, koit emetab Gensaret. ³⁵ Ako kingonai bikab koronoto inendet koyokto emonoto komugul komutyi inendet tugul che kimiendos. ³⁶ Ak kiigaigai inendet kole kotiny mbo tabandab ngoriennyi, ak kisopcho tugul che kitiny.