¹ Kibwonji anyun Jeiso Paraisik ak sirik che kibunu Jerusalem. Koleji, ² "Amu ne si kobistoe alamalyeng'ung' bitonwekab boisiek? Amu amisie kotomo koun eunekwai". ³ Ak kiwolji koleji amu nee si obistoe ak akwee ng'atutietab Jehovah amu bitonwekwok? ⁴ Amu king'at Jehovah kole, 'Konyit Kwandang'ung' ak komet', ak 'Inendet ne mwoe ne ya agobo kwandannyi anan ko kamet komee iman.' ⁵ Ago amwoe ale, 'Age tugul ne leljini kwandannyi nda ko kamet kito age tugul ak kolejini, "Kito age tugul ne kata nyolu atoretenen ko koagochi Jehovah." ⁶ Ko mateeche inendet kwanda ak kamet; kaowal anyun ng'olyotab Jehovah koek buch amu bitonwekwok. ⁷ Akwe chombilik! kimaoten Isaiah komie agobo akwee kole, ⁸ 'Konyito bichu eng' kutuswekwai, ago looen mugulelwekwai eng' ane. ⁹ Ago iloswo buch amu ng'atutikab biko konetisiosiek che inetisie." ¹⁰ Ak kiguur inendet tuiyet kobwa ole mi ak koleji, "Ogase ak oguiye--- ¹¹ Ma mi kiy ne bunei kutit che imuruoni chito, ago che mong'une kutit choto che imuruoni chito." ¹² Kibwa anyun alamalyennyi koleji, "Tos inget ile kaginach paraisik kangogas mwaoni?" ¹³ Ago kiwol Jeiso kole, kesuwot age tugul ne kima kole Kwandannyu ne mi kipsengwet kengusu. ¹⁴ Obagakte icheget; kandoik chi koriotin ak ngondochi kipkoratiat kipkoratiat age kororokyini tuwai kebenet." ¹⁵ Ak kiwolji Petero koleji, "Mwowech kalewenonoto". ¹⁶ Ak kile, kaga mbo tomo oguiye ak akwee? ¹⁷ Ma onai ole kiy age tugul ne bune kutit kowendi moet komondoi sang'? ¹⁸ Ago tuguk che mong'une kutit kobunu muguleldo, choto che ing'woniti chito. ¹⁹ Amu mong'une muguleldo kabwatutik che yaachen, rumisiosiek, ibetabge, soksosiek, chorsosiek, baornatetab lembech, ngalek che king'alalegei. ²⁰ Chuto tuguk che ing'woniti chito; ago ngeamisie eunek che ma kiun koma ing'wanitu chi." ²¹ Ak kiwo Jeiso eng' oloto, kwo komoswek che bo Tyre ak Sidon. ²² Ak ogeer anyun kimong' eng' komoswechoto chepyoset ne bo canan, korir kole, "rirena eeh Kiptaiyandani inye Weritab Daudi! Tinye oik che chang cheptannyu mising." ²³ Ago kimowolji Jeiso ng'olyo. Ak kibka alamalyennyi ak kogaigai inendet koleji, "Oon kwo, amu karirjinotech." ²⁴ Ago kiwolji Jeiso kole, "Kima kiyokwo kobate anyonji kechirek che betyotin che bo gotab Israel." ²⁵ Ago kicho chepyosonata ak kogutunji inendet akolen, "Kiptaiyat toreto." ²⁶ Ago kiwol ak kole, "Ma kararan kesare leguk kimnyengwai ak kewirji sesenik." ²⁷ Ago kimwa kole," Ee kiptaiyandani, mbo sesenik koame che ibutos kong'ete mesetab bikab kobo". ²⁸ Kiwolji Jeiso anyun koleji, "Chepyosoni, o kayaneng'ung', ingoyaak ko u noto imoche." Ak kisob cheptonyi eng' sainata. ²⁹ Ak kiwo Jeiso eng' oloto agoi ole legite araraitab Galili. Ak kilany tulwet, ak kotebi ng'weny eng' oloto. ³⁰ Ak kibwonji inendet tuiyosiek che eechen, komutu solomonik, ak che koriotin, che nomotin kut, che bo mugungon, ak alak che chang' ak kondeno ole bo kelyekyi ak kisoob ichek. ³¹ Ak kikwong' tuiyet kingoroo kong'alalsot che ki nomotin kut, ko kagosobcho, che ki bo mugungon kobendoti, solomonik kobune kelyekwai, ak kotabentoi che ki koriotin. Ak kiilos Jehovah ne bo Israel. ³² Ak kiguur Jeiso alamalyennyi ak koleji, "Atinye rirenetabge agobo tuiyet, amu kogetebi tugul betusiek somok ama tinye kiy ne ame. Amamoche atiagta koba koamoti rubet si matanuiyo eng' oret." ³³ Ak kilenji alamalyet inendet, "Kinyorjini ano makatinik che te cho eng' emoni surkwen, si kegochi kobiyongio tuiyet ne te ni?" ³⁴ Ak kilenji Jeiso, "Otinye makatinik ata?" ak kile, "Tisab ak njirenik che tiginen che ng'ering'." ³⁵ King'at anyun Jeiso tuiyet kotebee ng'weny. ³⁶ Ak konam makatinichoto tisab ak njirenik; ak komwa kongoi ak kobutul ak kogochi alamalyet. Ak kigochi alamalyet tuiyosiek. ³⁷ Ak kiam biko tugul ak kobiyong'io. Ak kiiyum katuganik lolotinwek tisab che murmuranik. ³⁸ Ak kiek murenik che kiam elufusiek ang'wan ama kiit chepyosok ak leguk. ³⁹ Ak kitiagta Jeiso tuiyosiek koba ak kolany moingetab beko kwo tabanwek che bo Magadan.