¹ Kibwa anyun Parisaik ak Sadukaik ak kotiem inendet kosom koborji kaborunet ne bunu barak. ² Ago kiwolji koleji "Yo kagoek koskoleny, omwoe ole, 'moeni mutai' amu birir barak.' ³ Ak eng kariron, omwoe ole, 'Usei rani, amu birir ak kotong'unot barak.' Onget obesie ole teptoi togetab barak, ago momuchi obesie kaborunoikab betusiek. ⁴ Cheng'e kaborunet ebendo ne ya ne bo ibetabge, ago magiborjini kaborunet kobate kaborunetab Jona." Ak kibagaka ichek ak kwo. ⁵ Ak kingoit alamalyet bitonin age, ko kiutie koib makatinik. ⁶ Ak kileji Jeiso, "Oribge mermerek che bo Parisaik ak Sadukaik." ⁷ Ak king'ololjigei ichegei kole,"Tos amu ma kiibu makatinik" ⁸ Ak kingonai Jeiso komwa kole, "Ee akwee che bo kayanet ne tigin, kaine si ong'ololjige, amu motinye makatinik? ⁹ Maonai nda maobwati makatinik mut ak kerebonik che te che kioumji? ¹⁰ Nda makatinik tisab eng' biko elufusiek angwan, ak lolotunwek che te che kioumji? ¹¹ Kiine si monai ole mangololwok agobo makatinik? Ago oribge mermerek chebo Paraisik ak Sadukaik. ¹² Konam anyun kole kama iyomis ichek koribege mermerekab makatiat , ago konetisietab Paraisik ak Sadukaik. ¹³ Ak kingo che Jeiso komoswekab kaisarea Pilipi kotebe alamalyennyi kole, mwoe biko kole ng'o weritab chi? ¹⁴ Kole, mwaei alak kole, Johana kabatisenindet; len alak, Elijah kolen alak, Jeremia nda age eng' maotik. ¹⁵ Koleji ,ago Olen akwek a ng'o ? ¹⁶ Ak kiwol Simion Petero kole i Kristo weritab Jehovah ne sobe . ¹⁷ Ak kiwolji Jeiso koleji, "Iberurot inye Simion weritab Jona, amu ma ng'ang'un borto nda ko korotik, ago Kwandanyu ne mi kipsengwet. ¹⁸ Ak amwoun agane ale, ii Petero, ak ateeche kanisennyu eng' koita nito. Ak maneneti kimnatosiekab oldab che kigobek. ¹⁹ Agonin yateiywek che bo bounatetab kipsengwet. Ak kiy age tugul ne irate eng' ng'weny kerote eng' kipsengwe,t ak kiy tugul ne itiachi eng' ng'weny kitiochi eng' kipsengwet." ²⁰ King'at mising anyun alamalyet kole ama mwachi chi age tugul kole inendet ko Kristo. ²¹ Kong'ete yoto kotoi Jeiso komwochi Jeiso alamalyennyi koleji agoi kwo inendet Jerusalem, si kenyalil eng' tuguk che chang' eng' eunekab boisiek ak tisik che eechen ak sirik, ak kebar ak king'eet eng' betutab somok. ²² Ak kimut Petero inendet kwo taban ak kotoi koger Kong', kole "Ngolooit eng' inye, ng'alechu, Kiptaiyandani! Matajonjin nito agoi!" ²³ Ago kiwechgei, Jeiso ak koleji Petero, "Wui let eng' ane,Chesawilyeni! Keegu kanagutiet eng' ane, amu maibwoti inye tukugab Jehovah ago tuguk che bo biko." ²⁴ Ago Kileji Jeiso ayun alamalyennyi, ngo mochei chi korubka, kotaige ak kosut kimurtoiyonennyi ak korubwa ²⁵ Amu age tugul ne mochei kosor sobondoyi kobeeti; ak age tugul ne ibeti sobondonyi agobo ane konyoru. ²⁶ Amu keljini nee chi, ngonyor ing'weny komugul ak kobeet sobondonyi? nda to igoito ne chi kowale sobondonyi? ²⁷ Amu tun choni weritab chi eng' torornatetab Kwandanyi koboto malaikaisiekyi. Ak koyookyi anyun chi age tugul ko u boisionikyi. ²⁸ Amwowok iman, ale mi alak eng' che tonondos eng' yu che mochomjomi meet mating, agoi kogeer kochoni weritab chi eng' bounatenyi."