¹ At kingobata betusiek lo komut Jeiso Petero, ak Jakobo, ak Johana wering'wai, kolany tulwet ne koi koba ichegei. ² Ak kiwalak eng' taing'wai. Ak kiikwengta togennyi ko u asista, ak kileelagitu ngoroikyi kou lapkeiyet. ³ Ak ogeer anyun kitook eng' taingwai Musa ak Elijah kong'alalsot ak inendet. ⁴ Ak kiwolji Petero Jeiso, koleji "Kiptaiyandani kararan eng' ache kemite yu. Ngichome, amuchi ateech eng' yuto keriosiek somok nengung' age, bo Musa age ak kobo Elijah age". ⁵ Ak king'oto kong'ololi, kouur icheket boldet ni iluu; ak ogeer anyun kimong'une kutit boldet kole, "Ni ko Werinnyu ne achame, abaibai mising ing' inendet. Ogas iit inendet." ⁶ Ak kingogas alamalyet, kobutyo kotobeni ng'weny ak kocholyo mising. ⁷ Ak kicho Jeiso ak kotwa ichek koleji, "Ong'etye amoiyweisie." ⁸ Ak kingong'et met ko ma iroo chi kobate Jeiso inege. ⁹ Ak kingoto kowolu eng' tulwet, king'at Jeiso icheket koleji, "Amomwochi chi koborunonito, agoi tun kong'eet Weritab Chi eng' che kikomeyo." ¹⁰ Ak kitebee alamalyennyi inendet kole, "Amu nee anyun si komwoe sirik kole choni Elijah korok kondou?" ¹¹ Ak kiwol Jeiso kole Oman indou Elijah, ak koweech tuguk tugul. ¹² Ago amwowok ale kigocho Elijah ak kima nai iche inendet, ago kiechi inendet kiy age tugul ne kimochei mbo ko u nyoto tun nyalili weritab chi agine eng' eunekwai. ¹³ Konai anyun alamalyet kole king'ololjini ichek agobo Johana kabotisonindet . ¹⁴ Ak kingo kagobka ole mi tuiyet, kochonji inendet chito, ak kogutungji ak kole, ¹⁵ "Kiptaiyandani riree werinnyu, tinye cheptoleit, ak nyalili mising. Amu ibutyini mat konyil che chang' ak kobutyini beko konyil che chang'. ¹⁶ Ak koamutyi alamalyeng'ung' ak ma imuch kosoob inendet." ¹⁷ Ak kiwol Jeiso kole, "Ee ebendo ne matinye kayanet ak komastaat, atebche ak akwe agoi au? Amuitoi agoi au agobo akwe? Imutwa inendet." ¹⁸ Ak kitor kong' Jeiso oindet, ak komanda oindet eng' inendet ak kosob weroto eng' sainata. ¹⁹ Kibwonji anyun alamalyet ole mi Jeiso eng' ung'ot ak kole, "Kaine si ma kimuch ache keon komanda?" ²⁰ Ak kileji, "Amu kayaneng'wong' ne tigin. Amu amwowok iman ale ngot otinye kayanet ne te kesuwotab mogoiwet ko nda ngomwochi tulwoni oleji inakte ui olin konoktoi, ak mami kiy ne maimugakse eng' akwe. ²¹ Ago mamondoi ne u ni kobate eng' saet ak karugutetabge. ²² Ak ye kingo ta kobenie eng' Galili, komwachi Jeiso alamalyennyi koleji, "Kindenoi weritab chi eunekab biko, ²³ ak kobar icheket inendet ak king'eet kogeny eng' betutab somok." Kiimgei anyun mising' alamalyennyi. ²⁴ Ak kingo kagoit Kapernaum, kobwonji Petero ichek che kitoochei drachma aeng che bo aisurut, ak kole, "Magonu konetindeng'wong' drachmaisiek aeng che bo aisurut?" ²⁵ Komwa kole, "Eeh". Ak kingwo Petero got orit, kong'ololji Jeiso inendet ak koleji, "Ibwati nee inye Simion?Llaitorinik che bo ng'weny konyorune ng'o aisurut ? Eng' werikwai nda eng' che bo biko alak?" ²⁶ Ak kiwol Petero kole, "Eng' biko alak," Koleji Jeiso inendet, "Ara anyun itiogotin werik." ²⁷ Ago, si ma kinach icheket, iwe araraita ak iwirji kipkomondet, ak njiriot ne kamong' eng' tai, inam; ak ngi yaat kutinyi inyoru sekeliat. Nam noto, ak igoite aisurut agobo ane ak inyendet."