¹ Kibwonji alamalyet Jeiso eng' sainato, koleji "Ng'o anyun ne o eng' tugul eng' bounatetab kipsengwet?" ² Ak kiguur lakwet ne tigin kocho ole mito inendet ak kotonone kwenungwai, ³ ak kole, "Amwowok, iman ale ngot ko mowologisie ogergeitu leguk che mengechen, ko moite bounatetab kipsengwet. ⁴ Noto anyun age tugul ne imining'itige ko u lekwani tigin, ko o noto kosir tugul eng' bounatetab kipsengwet. ⁵ Ak age tugul ne toochei lekwet agenge ne tigin ne u ni eng' kainennyu ko kataacha. ⁶ Ago age tugul ne inachi agenge eng' chuto mengechen, ko keigei kechugta inendet kaatinnyi koitab bai ne kindet ak ketorji orititab araraita. ⁷ " Bwo ng'weny amu kanagutik! Amu bwonii kanagutik iman; ago bwo eng' chichoto bunu kanagutik! ⁸ Ak ngonachin eung'ung' nda keldong'ung' itil ak ak iwirte. Amu keigei eng' inye imongji sobondo i bo mugung' nda i bo kelok kosiir itinye eunek aeng' anan ko kelyek aeng ak kewirjin mat ne bo koigeny. ⁹ Ak ngonachin kondang'ung' i bolu ak iwirte. Amu keigei eng' inye imongji sobondo ibo kong'ak kosiir itinye konyek aeng' ak kewirjin Gehenna oldab mat. ¹⁰ Orib si mosas age tugul eng' chuto tiginen. Amu amwowok ale, eng' kipsengwet ko mito malaikaisiekwai kotugul togetab Kwandanyu. ¹¹ Amu kicho weritab Chi kosor ne kiga kobet. ¹² Olin nee akwek? ngo tinye chi kechirek bogol, ak kwo age kobetot, kotos mabogoktoi chun tomonwogik sogol ak sogol, ak kwo tulondok ak kocheng'at ne betot? ¹³ Ak ngonyor, amwowok, iman ale baibaitu agobo noto kosiir chun tomonwogik sogol ak sogol che mabetyo. ¹⁴ Mbo ko u noto ko ma magetab kwandang'wong' ne mi kipsengwet kolus agot agenge eng' chu tiginen. ¹⁵ "Ak ngo lelun ne otupche, iwe ikerkong inendet, iborji lelutiennyi omite tuwai akwege. Ngo kasin, ko kagogelun ne otupche. ¹⁶ Ago ngo magasin, imut agenge anan ko aeng' alak, amu si kogimit ng'olyot age tugul ko eng' kutuswekab baorinik aeng' nda ko somok. ¹⁷ Ak ngo tai kogas icheget, imwochi kaniset. Ako ngo tai kogas kaniset agine, ko ingoige sikoran eng' inye nda taagindetab aisurut. ¹⁸ Amwowok, iman, ale tuguk alak tugul che orate eng' ing'weny kerote eng' kipsengwet; ak tuguk alak tugul che otiochi eng' ing'weny ketiochi eng' kipsengwet. ¹⁹ Amwowok kogeny, ale, ngo chomnyechi aengu eng' ing'weny agobo kiy age tugul ne some koyonchini Kwanda anyun ne mi kipsengwet. ²⁰ Amu ole katuiyechi aengu anan ko somok eng' kainennyu, amite kwenung'wai eng'." ²¹ Kinyo anyun Petero, ak kotep kole," Kiptaiyandani, nyolu anyoochi kaat ne ketupche konyil ata ye kalelwo?". Agoi konyil tisab?" ²² Komwoji Jeiso kole," Momwoun ale konyil tisab, ago, agoi tomonwogik tisab konyil tisab. ²³ Noto anyun kigergeite bounatetab kipsengwet ak laitoriat agenge, ne ki machei koiit tuguk koboto otwogikyi. ²⁴ Ye kingotoi koiit, kemutyi agenge ne kibesen talentaisiek elufusiek taman. ²⁵ Ak amu kimotinye kiy ne yooktoe kong'at kiptanyandenyi kealda inendet, osotyonnyi, leguk ak tugul che ki tinyei, si koyaaktae besendo. ²⁶ Ak kiibutyi ng'weny anyun otwogindenoto kosaisai kole, kiptaiyandani, muitaiwa kitigin, si ayaagun tugul. ²⁷ Ak kirire kiptaiyatab otwogindenoto, kotiach inendet ,ak Konyochi kaat eng' besendo. ²⁸ "28 Ago kimanda otwogindenoto ak konyor age ne kiboisie tuwai ne kibesen inendet denarisiek bogol; ak kinam inendet kaatit ak kole , 'Yookwo che kiibeseneno'. ²⁹ Kibutyi ng'weny anyun ne kiboisie Kuwai, kosom inendet, kole kang'wo korok si ayaagun.. ³⁰ Ak kima cham; ago kiwo kotoorji korgoret, agoi koyaak tugul che kiga besen. ³¹ Ak king'oroo anyun che kiboisie tugul tukuk che kiyoogis kocholio mising ak kobka komwochi kiptaiyandeng'wai tuguk tugul che kagoyaagis. ³² "Ngo ityo koguur anyun kiptaiyandennyi inendet kocho ak koleji, 'Ee otwogindet ne kimegeiya, kianyoun kaat eng' besento tugul amu kiisomo. ³³ Tos kima nyoljini aginye irire ne kioboisiei tuwai, ko u yo kiarirenin?' ³⁴ Ak kinerech kiptaiyandennyi, ak kondeno inendet eunekab biko che birei agoi koyook tugul che kiga besen. ³⁵ U noto aiywok agine Kwanda ne bo kipsengwet, ngo monyochi kaat age tugul eng' mugulelwekwok ne otupche".