¹ Ak ko kingowol Jeiso eng' tulwet korub inendet tuiyosiek che eechen. ² Ak ogeer anyun kicho chi ne kiome mogondosaik ak kogutungji indet, kole, 'Kiptayandani, ngimache, imuchi itililo. ³ Ak kiiyogoito Jeiso eunnyi ak kotiiny inendet, kolen, "Atinye maget. Tililitu" Ak kitililit chichoto eng' sainata eng' mogondoisik. ⁴ Ak kimwochi Jeiso chichoto koleji, "ripge amat imwochi chi age tugul. Ago ui ak iborjige tisiindet, yeitio igoite tiseiwot ne king'at Musa, si koek barnatet eng' icheget." ⁵ Ak ye kingo kagomongji Kapernaum, kochonji Kiptayatab bogol kosaisai inendet ⁶ ak koleji, "Kiptaiyandani , imioni ago meat bortab otwongindennyu eng' gaa kasat mising" ⁷ Ak kileji Jeiso inendet, "Anyoni asoobi inendet." ⁸ Ak kiwolji, kiptayandanoto bo bogol kole, "Kiptaiyandani, manyolunot inyoo gonnyu. Ago mwa ng'olyo kityo ak kosobe otwogindennyu. ⁹ Amu aii chi mbo ane ne kiboiwo, ak atinye asarik che abou, ak ngomwochi ni, alenji ui kwo; ak ngomwochi age aleji nyo, kocho ak ngomwochi otwoginendennyu aleji yai ni koyae." ¹⁰ Ago kingogas Jeiso nito kokwong' ak koleji icheket che kirube inendet, "Amwowok, iman ale tomo anyoru chi ne tinye kayanet ne tee ni eng' Israel. ¹¹ Ak amwowok ale, bwonii che chang' eng' kong'asis ak cherongo kobwa kotebi ak Abraham, ak Isak, ak Jakob eng' bounatetab Kipsengwet. ¹² Ago kitoorjini werik che bo bounatet tuindo ne bo sang; ole mito rirek ak nyeetab kelek. ¹³ Kileji anyun Jeiso kiptaiyandanoto, "Ui gong'ung'! Ingeyaun ko u ye kaiyan." Ak kisob eng' sainata otwogindennyi. ¹⁴ Ye kingwo Jeiso kaitab Petero kogeer chebyosetab igoi nebo Petero ne kiruei kotinye cheptigoniet. ¹⁵ Ak kitiiny inendet eut , ak kibagakta inendet cheptigoniet. Ak kingeet koboisiechi inendet. ¹⁶ Ak kingo moche koimen, komutyi Jeiso biko icheket che chang che kitinye oik. Ak kioon tamirmirik eng' ng'olyot ak kosoob tugul che kimiandos. ¹⁷ Si kobiit kosulda ne kigamwa maotiot Isaia, kole, "Kisut inendet nyalulnatennyo, ak kokesen mianwekcho." ¹⁸ Ak kingoro Jeiso tuiyosiek che eechen koga imuut inendet, kong'at kole kwo kwoiyo bitet niin age bo araraitab Galili. ¹⁹ Ak kinyo sirindet age ak koleji "Konetindeni, arubin eng' wui age tugul ole iwendi". ²⁰ Ak kileji Jeiso, "Tinye lelwek kebenonik, ak tinye taritikab barak keswonik, ago matinyei weritab chi ole ichuktoi inendet metinnyi." ²¹ Ak kimwochi age ne bo alamalayet koleji, "Kiptaiyandani, chomwo korok awo atub kwandanyu." ²² Ak kileji Jeiso, "Rubka bakakte che meiyotin kotub chekwai che meiyotin." ²³ Ak kingo kagolany moingetab beko korub inendet alamalyennyi. ²⁴ Ogeero, king'et koristo ne kindet eng' araraita kot koluum moingetab beko. Ako kiinuchi Jeiso. ²⁵ Kibwa anyun alamalyenyi kong'eet inendet koleji, "Soruech, Kiptaiyandani; kagibegu!". ²⁶ Kilenji Jeiso icheget, "Kaine si oiywei anyun, akwee che otinye kayanet ne tigin?" King'eet anyun ak koger kong' koristo ak kisis anyun araraita mising. ²⁷ Ak kikwongio murenichoto, kole "Chi nee chichi, ne kasei iit inendet mbo koristo ak araraita?" ²⁸ Ak ye kingoit Jeiso bitoniin emetab Gadarenik, kotuiyo inendet ak biko aeng' che kitinyei oik. Ak kibunu oldab kererisiek ago ki koromen mising, koto kime muchi chi kosiirto oranato. ²⁹ Ak ogeer anyun, kiwaakcho, kole, "Kiting'egee nee ak inye Weritab Jehova? Kecho yu inyalilech kotomo koit betut?" ³⁰ Ak ki kimi akwet nebo torook che chang che kiageti eng' ole loo. ³¹ Ak kisom Jeiso oik kole, "Ngionech kemandee, iyoktech kebe kechut akwet ne bo torook." ". ³² Ak kileji Jeiso ichek, "Oba!". Ak kimanda koba kochut torook, ak ogeer ne matianit koruai mising akwet komugul koregto chepng'esut koba araraita, ak kobekji beko. ³³ Ak kiyesta che kiiyoki torook choto koba ng'anaset ak komwaita kiy age tugul ak mising kito ne kiga kiyachi che kitinye oik. ³⁴ Ogeer anyun, kimong' sang' nganaset komugul kobka kotuiyo ak Jeiso. Ak kingogeer inendet kosom kwo eng' koreng'wai.