¹ Amoruokchi, si magirwokwok. ² Amu kiruoget ne oruochi ko tun keruogunenok noto, ak eng' kerutiet ne ogeree ko tu kegerunenok. ³ Ako kaine asi igeere betbetiat ne mi kondab ne otupche, ago megere musukwet ne mito kondang'ung' inyendet? ⁴ Ara imwochindoi ano ne otupche ilejini inganemun betbetiat (bambaniat) eng' kondang'ung'; ago mito musukwet kondang'ung inyendet? ⁵ Ee chombilindoni! icheru korok musukwet eng' kondang'ung' si igeer anyun komie inemu betbetiat eng' kondab ne otupche. ⁶ Amogochi tuguk che tililen sesenik, anan owirji torok sonoek che tinye kamanutiet ne o. Amu tieche eng' kelyekwai, ak koweekchogei ak kogererak. ⁷ "Osom, si kegonok. Ocheng' si onyoru. Ogonygony si keyotwok. ⁸ Amu age tugul ne some kegochini, ak ne chenge konyoru, ak inendet ne igonygonyi keotyini. ⁹ Nda mi ng'o eng' akwee ne ngo' som werinnyi makatiat, kogochi koita? ¹⁰ Anan ngo som njiriot ko tos igochi erenet? ¹¹ Ngot onget anyun akwee che o yachen ogochi legukwok kogochinoik che kororon ko tos siire mising ne tia kwandang'wong' ne mi kipseng'wet? Tos maigochini che some inendet tuguk che kororon? ¹² Noto anyun tuguk tugul che omoche koyaiwok biko, ko kanyol oyachi agiche ko u noto, amu nito ne mwae ng'atutik ak maotik. ¹³ Obun anyun kurget ne mariich. Amu kurget ne baraa ak oret ne tebes ko noto ne wendi ng'emisiet ago chang' che bune oranata. ¹⁴ Ago mariich kurget ak ko bichii oret, ne wendi sobondo, ak ng'ering' che nyoru. ¹⁵ "Oribge maotik chebo lembech, che bwonjinok eng' ngoroik che bo kechirek ago suik che ame bich. ¹⁶ Onae icheket eng' logoekwai. Tos iyumi biko sabibuk eng' katok, nda logoekab monmoonik eng' katablelinik? ¹⁷ Ko u noto anyun, ketit age tugul ne kararan koiye logoek che kororon, ago ketit ne ya koiye logoek che yachen. ¹⁸ Ma imuchi ketit ne kararan koi logoek che yachen ama imuchi ketit ne ya koi logoek che kororon. ¹⁹ Ketit age tugul ne maiye logoek che kororon ketile ak kewirji mat. ²⁰ Noto anyun, onae icheket eng logoekwai. ²¹ Ma tugul che kuro kole ' Kiptayandani, Kiptaiyandani,' che tun kochute bounatetab kipsengwet, ago icheget ichegee che yae magetab Kwanda ne mi kipsengwet. ²² Eng betunoto komwae che chang' kole, 'Kiptaiyandani, Kiptaiyandani, tos kima kiyai maoinatet eng' kaineng'ung', ak kigion oik eng' kaineng'ung' ak kigiae eng' kaineng'ung' boisionik che chang' che bo kimnatet?' ²³ Ak amwochini anyun icheket eng' yoto ale, 'Mangenok kong'ete agoi! Oistoenoge akwee che oyae yaityo!' ²⁴ "Noto anyun , age tugul ne kasei ng'alekyu ak koyae kegergei ak chito ne ng'om ne kiteech gonnyi ruandet barak. ²⁵ Ak kingo robon ak kous koristo neo, konyo kutyat ne ak korus koyoto, ago ma ilul amu kiga kiteekchi ruandet barak. ²⁶ Ago age tugul ne kasei ngalekyu ama yaei ko kegerkeite chito ne berber ne kiteech gonnyi eng' ng'aniek. ²⁷ Ak kingo robon, kobka bekab kutiat, ak kicho kibuket ak korus goyoto, ak kilul, ak kieet mising lulennyi." ²⁸ Ak kingotar Jeiso ng'alechu kokwong'io tuiyosiek akobo kanetisiennyi, ²⁹ amu kiinet icheket ko ne tinyei kimnatet, ama kergeit ak sirikwai.