¹ Kingogeer Jeiso tuiyosiek, kolany tulwet barak. Ak kingo kagotebi ng'weny kobwonji alamalyenyi ole mi inendet. ² Ak kiyat kutinyi ak konet icheket koleji, ³ "Boiboen che bononsot eng' tamirmiriet amu neng'wai bounatetab kipsengwet. ⁴ Boiboen che iteitos amu tun kigoigoi. ⁵ Boiboen che talaen; amu tun bunjini ng'weny. ⁶ Boiboen icheket che ame rubet ak melelda agobo imanda, amu tun ko biyongdos. ⁷ Boiboen che tinye rirgei, amu tun nyoru icheket rirenet. ⁸ Boiboen che tililen eng mugulelwek, amu tun keerei Jehovah. ⁹ Boiboen che yaei kalyet, amu kiguure werikab Jehovah. ¹⁰ Boiboen che keusausi agobo imanda, amu neng'wai bounatetab kipsengwet. ¹¹ "Oboiboitu ye churok biko ak ye usausok ak komwaitaenak yaityo age tugul,ak kotamak agobo ane. ¹² Oboibaitu ak ogasgei mising amu oo melektang'wong' eng' kipsengwet. Amu kigiusaus ko u noto maotik che kimi eng tai. ¹³ "Oi munyekab ng'weny. Ago ngot ko kakobet anyinyindo munyek, keanyinyindoi ano kogeny? Ago ma kobo kiy, kobate ketarta koba sang ak kotiegat biko. ¹⁴ Oii lapkeiyetab ng'weny. Ago magimuchi keuny nganaset ne mi tulwet barak. ¹⁵ Ak mainoomi biko tait, ak kondeno kitonget orit, ago indenoi kito ne tonone ak kokwenji biko tugul che mito eng got. ¹⁶ Ingkokweng'ta lapkaiyeng'wong' ko u noto eng' taitab biko si komuch kogeer boisionikwok che kororon ak kotoror kwandang'wong' nemi kipsengwet. ¹⁷ "Amat obwat ole ki anyo ang'em ng'atutiet anan ko che bo maotik. Ki manyo abut ago asulda. ¹⁸ Amu amwowok iman ale agoi kosiirto kipsengwet ak ing'weny, ago masirtoi mbo tisiet anan kiy ne tigin eng' ng'atutiet, agoi tun kosulda tuguk tugul. ¹⁹ Noto anyun, chi age tugul ne butei ng'atutiet mbo agenge ne kitigin eng' ng'tutichu, ak konet biko ko u noto, keguure inendet ne tigin eng' tugul eng' bounatetab kipsengwet. Ago chi tugul ne yaei ak koneti choto keguure inendet ne o eng' bounatetab kipsengwet. ²⁰ Amu amwowok ale ngot ko masiir imandang'wong' imanda ne bo Sirik ak Parisaik, ko moite bounatetab kipsengwet matiny. ²¹ "Kiogas ole kigileji icheket che bo keny 'merumisiei,' ak 'age tugul ne rumisie ko kagorikyi kiruoget.' ²² Ago amwowok ale, age tugul ne nerkchini ne tupcho ko kagorikyi kiruoget; ak age tugul ne lejini ne tupcho, 'ii chi buch!' ko kagorikyi kapkiruoget; ak age tugul ne mwoe kole, "solwoni!" ko kagorikyi Gehenna oldab mat. ²³ Noto anyun ye imache igoite kagochinen'ung' eng' kaptisisiet, ak inan eng' oloto ile, ting'enen ne otupche ng'olyo, ²⁴ ibagakte eng' oloto kagochineng'ung' eng' taitab kaptisisio ak iwe anyun ochamnyege si ichoni igoitei kagochineng'ung'. ²⁵ Ochamyegei ak bunyondeng'ung' koto imi oret koboto inendet si ma imutyin bunyondeng'ung' kiruogindet, ak ribindet ak eng let ketoorjin korgoret. ²⁶ Amwaun iman ale, memong'u eng' oloto matiny agoi iyaakte sendiyot nebo let. ²⁷ Ki kogas kele kigimwa kele amoipge. ²⁸ Ago amwowok ale age tugul ne kerei chepyoso, ak kogase kuruiyo tuwai ak inendet, ko kagoipge ak inendet eng' muguleldonyi. ²⁹ Ak ingoyain kondang'ung' nebo tai iterteren, ibalu ak iwirte. Amu keigei eng' inye ngo betenen kebeberta agenge eng' borto kosir ketorji oretab mat (gehena) bortong'ung' komugul. ³⁰ Ak ngo nachin eung'ung 'nebo tai itil ak iwirte. Amu keigei eng' inye ngo betenen kebeberta agenge eng' borto kosir kwo oretab mat bortong'ung' tugul. ³¹ Kigimwa kogeny kele, 'Age tugul ne onei chepyosenyi kogochi anyun siret nebo besiet.' ³² Ago amwowok ale age tugul ne one chepyosenyi ama eng' sokset, ko kayai inendet koek chebaigeiyat. Ago age tugul ne ituni chepyosonata ne kigeon, kogayai ibetabge. ³³ Kiogas kogeny, kele kigemwachi icheget chebo keny, keleji 'Amemurte eng' 'lembech, ago yachi kiptaiyat kayosiosiekguk.' ³⁴ Ago amwowok ale, amomurte mbo ngatigin, agobo kipsengwet, amu ng'echeretab Jehova noto; ³⁵ nda ko agobo ng'weny, amu keldebesaikab kelyekyi; anan agobo Jerusalem amu ng'anasetab laitoriat ne o. ³⁶ Nda imurte agobo meting'ung' amu memuchi iyai sumeiyot agenge koleelit anan kotuuit. ³⁷ Ago ingoek ng'alaleng'wong' Ee ko Ee, oloo ko oloo ak kiy age tugul ni sire chuto kobunu inendet ne ya. ³⁸ "Kiogas kele, kigimwa kele 'konda eng' konda ak keldet eng' keldet.' ³⁹ Ago amwawok ale, amogerte chito ne ya. Ago age tugul ne irobochin togilgilietab tai komatirabach togilgilietab tai, ako iweekyi korabach komosta niin age. ⁴⁰ Ak ngomache komutyin chi age tugul kapkiruok komoche kosarenin sumbeng'ung', igooji ko ib ngorieng'ung' kora. ⁴¹ Ak age tugul ne birjinin iwe mailit agenge obe tuwai malisiek aeng'. ⁴² Igochi inendet ne somin, amotubtochi batai inendet ne mechei kobesenenin . ⁴³ "Kiogas kele kigimwa kele, " Cham chitab kokweng'ung' ak isas bunyondeng'ung'. ⁴⁴ Ago amwowok ale, ocham bunikwok ak osochi icheket che inyolilok, ⁴⁵ asi oegu werikab kwandang'wong' ne mi kipsengwet. Amu igochini asistanyi kotilji che yaachen ak che kororon, ak iyokchini ropta che bo imanda ak che mo bo imanda. ⁴⁶ Amu ngot ko ochome icheket che chomok ko nee melekto ne otinye? Tos mayoe ko u noto mbo taagikab aisurut? ⁴⁷ Ak ngot ko ogatii che otupche kityo, ko koyai nee ne siirei alak? Tos mayae ko u noto bororiosiek? ⁴⁸ Noto anyun oegu akweget che igesunotinge ko u ye igesunotge Kwandang'wong' ne bo kipsengwet.