¹ Kiimut anyun Tamirmiriet Jeiso kwo agoi surkwen si kotiem inendet oindet. ² Ak ye kingo kagorugutgei betusiek artam ak kemousiek artam, koam inendet rubet. ³ Ak kinyo tiemindet ak koleji inendet, "Ngot ko ii weritab Jehovah, ing'at koichu koek makatinik." ⁴ Ago kiwolji Jeiso kole, "Sirat kole, 'masobei chito eng' makatiat inege, ago eng' ng'olyot age tugul ne mong'une kutitab Jehovah."' ⁵ Yeityo komut Chesawilyet inendet kwo nganaset ne tilil ak komut kolany ole toror mising nebo kotab hekalut, ⁶ ak koleji inendet, "Ngot ko ii weritab Jehovah, iwirjigei ng'weny, amu sirat kole, "Ng'ate inendet malaikaisiekyi asi koribin inye,' Ak ko kalapten eng' eunekwai, si matui koita keldang'ung."' ⁷ Kileji Jeiso inendet, "Sirat kogeny kole, 'Metiem Kiptaiyat Jehovah neng'ung."' ⁸ Kogeny, ko kiimut Chesawilyet inendet kwo tulwet ne kooi mising ak koborchi bororosiek tugul che bo ng'weny koboto torornateng'wai. ⁹ Ak koleji, inendet, "Agonin tuguchu tugul, ngot ibutyi ng'weny ak ikutungcho." ¹⁰ Kileji Jeiso anyun inendet, "Ui eng yu Chesawilyeni ! Amu sirat kole, "Kutungji Kiptaiyat Jehovah neng'ung, ak iboisiechi inendet inegei." ¹¹ Ak kibagakta Cheswilyet inendet anyun, ogeero, kibwa malaikaisiek ak koboisiechi inendet. ¹² AK ko kingogas Jeiso kole ki kerat Johana kwo inendet Galili. ¹³ Ak kibagach Nasaret ak kwo kotebe Kapernaum, ne mi tabandab araraita eng' emetab che bo Sebulun Naptali. ¹⁴ Si kosulda ne kiga mwa maotiot Isia kole, ¹⁵ "Emetab Sebulun ak emetab Naptali, emet ne legite araraita, Jordan bitonin, Galili ne bo bororiosiek! ¹⁶ Biko che kitebee tuindo ko kakogeer lapkeiyet ne o, ak che mito ngnaset ak che kitebsot eng' koreet nebo urwetab meet, ko kichoorchigei lapkeiyet." ¹⁷ Kong'ete yoto kotoi Jeiso koamda ak kole, "Osigu, amu kagorik bounatetab kipseng'wet." ¹⁸ Ak ngo wendote tabandab araraita ne bo Galili, kogeer biko aeng che tupcho, Simion ne kiguure Petero ak Andrea wering'wai, kowirjinoti regereiywot (borowonik) ne kinome njirenik eng araraita, amu ki ramikab njirenik. ¹⁹ Ak koleji, "Obwa, orubwa anee si ayaak oegu ramikab biko." ²⁰ Ak kibagakta ngunoto regereiywekwai ak korub inendet. ²¹ Ak kingoto kowendi eng' oloto, koroo biko aeng che tupcho Jakobo weriab Sebedi, ak Johana wering'wai. Kimito moingetab beko koboto Sebedi kwandangwai, konabe regereiywekkwai. Ak kiguur icheket, ²² ak kibagakta eng' sainoto moinget ak kwandngwai ak korub inendet. ²³ Ak kiwendot Jeiso eng' Galili komugul, konetisioti eng' sinagogisiekwai, ak koamdaati logoiywek che tililen che bo bounated, ak kosoobi che tinye korotwek alak tugul ak mianwek alak tugul eng' kwenutab biko. ²⁴ Ak kimanda ngalek agobo inendet eng' Syria komugul, ak kigimutyi inendet biko tugul che miandos che kinam korotwek ak ng'woninwek che terotin, ak che kitinye oik, ak che kitanuitos, ak che ki meiyotin borwek, ak kisoob icheket tugul. ²⁵ Ak kirub inendet tuiyosiek che eechen che kibunu Galili, ak Dekapoli, ak Jerusalem ak Judea ak bitetabJordan.