¹ Ak kingo kagoech, koruoch tisiik tugul che eechen ak boisiekab bichoto agobo Jeiso si kobar inendet. ² Ak ye kingo kagorat inendet, komut kwo kogochi Pilato, ne ki gavena. ³ Ye kingoroo Judas anyun, ne king'wektoi inendet, kole kagiruokyi Jeiso komwa ndara ak koweekyi tisiik che eechen ak boisiek fedaisiek sosom, ⁴ ak kole, "Kaayai ngokisto amu kaang'wekte korotik che matinye tengek." Ago kile ichek, "Botech nee ache? Iraroti inyenge." ⁵ Ak kiwirji fedaisek hekalut, ole tilil ak komanda, ak kiwo anyun kogetge. ⁶ Ak kinam tisiik che eechen fedaisiek ak kole, "Ma chamdaat eng' ng'atuiet kendeno chu ole kiumjini tuguk che kigoitoi amu bo korotik." ⁷ Ak kiiruoch, ak kial mbaretab cheptereniot si ketupchi toek. ⁸ Noto anyun, kigiguure mbaranato, "Mbaretab Korotik" agoi rani. ⁹ Kisulda anyun ne kiga kimwa eng' Jeremia maotiot, kole, "Kiib fedaisiek sosom, alyetab inendet ne kiga kigomonji, ne kigaman alak eng' legukab Israel, ¹⁰ ak kiigoito ichek koale mbaret nebo cheptereniot ko u yo king'ata kiptaiyat." ¹¹ Ak kitonon Jeiso anyun eng' taitab bounindet, ak koteebe bounindet inendet koleji, "Tos ii inye Laitoriatab Yahudik? Ak kileji Jeiso, "Kaimwa ko u noto." ¹² Ak kingotaam inendet tisiik che echeen ak boisiek ko mawol kiy. ¹³ Kimwochi anyun Pilato inendet koleji, "Megose ole teno baornatet ne baorianjinin bichu?" ¹⁴ Ak kima wolji kiy, mbo ng'olyot agenge ko to kwong' mising gavana. ¹⁵ Ak kicham kotiokyini bounindet kimonjororiat agenge nikacham biko icheket eng' betutab igorta. ¹⁶ Ak kitinyei kimonjororiat age ne kikorom ak kotoogunot ne kigiguure Barabas. ¹⁷ Kingo kakoumgei anyun koleji Pilato, "Ng'o ne omoche otiokwok? Baraba anan Jeiso ne kigiguure Kristo?" ¹⁸ Amu Kinai kole kagigoito Jeiso kegochi inendet eng' ng'etkongda. ¹⁹ Ak kingoto kotebe ng'echeretab kiruoget, koyokyi chepyosennyi ng'olyo kole, "Ameite kiy chicho matinye lelut. Amu kanyoru nyalilwogik che chang' rani eng' karuotitoet agobo inendet." ²⁰ Ak kibirji tisiik che echeen ak boisiek tuiyosiek kole kosom Baraba ak kobar Jeiso. ²¹ Ago kitebee gavana icheket koleji, "Omache atiokwok anono eng' chu aeng'?" Ak kile, "Barabas." ²² Kileji Pilato anyun icheket, "Aite nee anyun Jeiso ne kiguure Kristo?" Kowol anyun tugul, "Ingegartat inendet." ²³ Ak kile, "Amu nee, kayi nee ne ya?" Ago kibolyo mising ak kolen, "Igartat inendet". ²⁴ Noto anyun ko kingoroo Pilato mata komuch kiy, ago kitesak bolotet konam beko ak koun eunekyi eng' taitab tuiyet ak kole, "Matinye tengek eng' korotigab chichi bo iman. Ogeer akwege." ²⁵ Ak kiwol biko tugul kole, "Ingotebenech korotikyi ak eng' legukyo." ²⁶ Kiitiokyi anyun Baraba icheket, ago kibir Jeiso kipchoritit ak kogoito kegartat. ²⁷ Kiimut anyun asikarikab gavana Jeiso kwo got ne O ne bo bounatet ak koumjige inendet askarik tugul. ²⁸ Ak kiireegune ngoroikyi, ak kolookyi sambut ne birir. ²⁹ Ak kichob kutwet ne bo katok ak kondeno metinnyi, kondeno kiroktab tegat eunnyi ne bo tai. Ak kigutingio eng' tainnyi ak kochot kole, "Kigatin Laitoriatab Yahudik!" ³⁰ Ak kisingilji inendet ak konam tegat ak kokwerakweri metinnyi . ³¹ Ak ye kingo kago chot inendet, koreegune ngorionoto ak kolaakyi inendet ngoroikyi ak komut kegargat. ³² Ye kingomong'u, konyor chitab kurene, ne kiguure Simion, ak kibirji inendet koib kimurtoiyondennyi. ³³ Ye kingoit ole kiguure Golgota noto ko kele, "Oldab terta." ³⁴ Kogochi ichek inendet siki koee che kiging'olda tuguk che ng'wonen. Ago kingo kagochamcham, kotai koee. ³⁵ Ak ye kingo kagogartat inendet, kopchechige ngoroikyi eng' kaseretab barbarek, ³⁶ ak kitebi ng'weny korib inendet eng' oloto. ³⁷ Ak kiindeno metinnyi barak kataamset agobo inendet ne kigisir kele "NI KO JEISO LAITORIAT NE BO YAHUDIK". ³⁸ Ki Kigigartat inendet ak choriik aeng', agenge eutab tai ak age eng' euut ne bo kaatam. ³⁹ Kichurachur inendet che kisiirtoi kowirwiri metewaikwai ⁴⁰ ak koleen, "Inye ne ing'eme hekalut ak iteech eng' betusiek somok saruge! Ngot ko ii weritab Jehovah wolu eng' kimurtoiyot." ⁴¹ Kichurchur ko u noto agiche tisiik che eechen koboto sirik ak boisiek koleen, ⁴² "Kisor alak; ame much kosorge inendet laitoriatab Israel. Ngowol raa eng' kimurtoiyot si keyan inendet. ⁴³ Koimong'u Jehovah, ngosor inendet raa, ngoto moche Jehovah kotiach inendet. Amu kile agot, Aii Weritab Jehovah." ⁴⁴ Kichurachur agiche ko u noto choriik che kiga kigartat koboto inendet. ⁴⁵ Kituit anyun emonoto komugol kong'eete sait lo agoi sait sogol. ⁴⁶ Ak ye kingoit olo bo sait sogol koguurso Jeiso eng' kutit ne o kole " Eli, Eli lama sabaktani?" noto ko, "Jehovah nenyu, Jehovah nenyu kaine si ibagakta?" ⁴⁷ Ak kingogas alak eng ichek che kitonodos eng oloto, kole, "Kuure chichi Elija." ⁴⁸ Eng' yoto kolabat age eng' ichek kwo konem sibonjit, ak konyiit siki ak kondeno tegat ak kogochi koee. ⁴⁹ Kimwa anyun chun alak kole, "Obagakte. Ongetepchi ng'o choni Elija si kosor inendet." ⁵⁰ Ak kiguurso Jeiso kogeny eng' kutit ne O ak kogoito tamirmiennyi. ⁵¹ Ogeer, anyun kigerer anget ne kigitiche hekalut koek aeng' kongete barak agoi ng'weny, ak kitumtumen ng'weny ak kibetogis ruandosiek. ⁵² Kiyotogis kererisiek, ak kiging'eet borwekab biko chechang' che tililen che kiruitos. ⁵³ Kingo kagong'eet Jeiso komong' bichoto agiche eng' kererisiekwai komong'ji nganaset ne tilil koborjige che chang. ⁵⁴ Ye kingo keree kiptaiyatab bogol ak icheget che kimi koboto inendet kogeere Jeiso kogeer botanetab ng'weny ak tuguk che kiyoogis koiywei mising' kole, "Iman Weritab Jehovah chichi." ⁵⁵ Kimi eng' oloto chepyosok che chang' che kitopeni eng' ole loo che kiga kobendat ak Jeiso kong'ete Galili koboisiechinoti inendet. ⁵⁶ Ki Maria, Magdalene, age eng' chepyosochoto koboto Maria kametab Jakobo ak Joses, ak kametab werik chebo Sebedi. ⁵⁷ Kingo kagoek koskoleny' kocho mogoriot nebo Arimatea, ne keguure Josep ne ki alamalyetab Jeiso agine. ⁵⁸ Kiwo chichoto olemito Pilato kwo kosom mustab Jeiso. Ak king'at Pilato anyun kegochi. ⁵⁹ Ak kiib Josep musto, ak kotaae angetab katanit ne tilil, ⁶⁰ ak komogon eng kererinnyi ne leel ne kiga kobal eng' ruandet. Ak komilji koita ne o kurget ne bo kererit, ak kwo. ⁶¹ Ak kimito yoto Maria Magdalene, ak Maria age, kotebsot eng' taitab kererit. ⁶² Eng betut ne bo aeng,' noto betut ne kiirube chobet, koumjige Pilato tisiik che eechen ak Parisak. ⁶³ Ak koleji, "Kiptaiyandani, kinoni, kele kimwa kenindenoto koto kosobe, kole, 'Ngo bata betusiek somongu ang'eet kogeny.' ⁶⁴ Ng'at anyun kerib kererit kemoi ago betut nebo somok si mabwa alamalyennyi kochor inendet koib, ak komwochi biko koleji, 'Kagong'eet inendet eng' che kigomeiyo,' si mayait kenisiet ne bo let kosir nebo tai." ⁶⁵ Koleji Pilato icheket, "Otinye ribik. Oba oreng'wong ak orib komie ko u yo omuchi." ⁶⁶ Koba anyun, ak korib kererit komie, kong'och koita komi ribik koboto icheket.