¹ Ye kingo kagotar Jeiso ng'alechuto tugul, koleji alamalyennyi, ² "Ongen ole ye ibata betusiek aeng'u koek *Paska, ak keng'wekta Weritab Chi kegartat eng' kimurtoiyot." ³ Ki yiumgei anyun tisiik che eechen ak boisiekab bichoto eng' seremutab gotab tisindet ne o, ne kiguure Caiaphas. ⁴ Ak kichaam ichek ng'alek kole si kobiit konam Jeiso eng' ng'alset, ak kobar inendet. ⁵ Ago kimwa kole, "Mayoei noto eng' betusiekab igorta, si mang'eet bolatet eng' biko." ⁶ Ak kingo mito Jeiso Betania, eng gotab Simion ne kiamei mogondosik, ⁷ konyo ole mi inendet chebyoset ne kitinyei chubait ne mi mwaita ne nyamdut ne bichii mising' alyennyi ak korong'ji metitab Jeiso ko kita koamisie. ⁸ Ago kingoroo alamalyet konerekcho kole, "Bo nee kaseroni? ⁹ Amu kota kialdoi mwai eng alyet ne o, ak kigochi kibananok." ¹⁰ Ago kingonai Jeiso, koleji, "Kaine si oiim chebyosoni? Amu kayaiywo boisiet ne kararan? ¹¹ Amu omi ak kibananok kotugul, ago mami ane kobotok kogutul. ¹² Amu kingo rong'ji mwaita bortonyu, ko kachopcho tubennyu. ¹³ Amwowok, iman, ale eng' oldo tugul ole tun kiamdaate logoiywechu kororon eng' ng'weny komugul kemwoei agine ne kagoyai chebyosonita koek ne kinondoe inendet." ¹⁴ Kiwo anyun agenge eng' choto taman ak aeng' ne keguure Judas Iskariot, ole mito tisiik che kindon (eechen) ¹⁵ ak kole, "Ochome ogono nee si andene inendet eunekwok?" Ak kiigamanji inendet fedaisiek sosom. ¹⁶ Ak kong'ete yoto kocheng' boroindo ne ng'wektoe inendet. ¹⁷ Ak kibwonji alamalyet Jeiso eng' betutab tai ne bo betusiekab makatinik che ma kindeno mermerek, ak koleji, "Imoche kechobun ano ole iome *Paska?" ¹⁸ Ak kile, "Oba nganaset ole mi chi anum, ak oleji, 'Kale Konetindet, "Kagorik sainnyu. Ayaei Paska eng' gong'ung koboto alamalyennyu." ¹⁹ Ak kiyai alamalyet ko u ye king'at Jeiso; ak kichob Pasaka. ²⁰ Ak ko kingoek koskoleny kotebi eng' amisiet koboto alamalyet taman ak aeng'. ²¹ Ak kingo to koamisie; kole, "Amwowok, iman ale ng'wektoo agenge eng' akwe." ²² Ak kiimge mising ak kotoi komwochi inendet age tugul koleji, "Tos ane, Kiptaiyandani?" ²³ Ak kiwol ak kole, "Inendet ne kagichukte tuwai eng' tabet noto ne ng'wektoo. ²⁴ Wendi Weritab Chi , ko u ye kigisir agobo inendet. Ago bwo eng chichoto ne king'wektoe Weritab Chi! Kita keigei eng' chichoto nda kima kisich." ²⁵ Ak kimwa Judas ne king'wekoi inendet kole, "Tos anee, Rabbi?" Koleji inendet, "Kaimwa inyegee." ²⁶ Ak kingo'amisie, konam Jeiso makatiat, ak koberur, ak kobutul ak kogochi alamalyet, ak kole, "Onam ak oam. Ni ko bortonyu." ²⁷ Ak kinam kikombet ak komwa kongoi ak kogochi icheket, ak koleji, "Oee, akwe tugul chuto. ²⁸ Omu chuto ko korotikyu che bo arorutiet che kitumdoi agobo che chang agobo nyoetab kaat ne bo tengekwogik. ²⁹ Ago amwowok ale, kong'ete raa, koma aee kogeny che bo logoechu bo sabibuk, agoi betunoto ne aee che leelach kobotok eng' bounatetab Kwanda." ³⁰ Ak ye kingo kagotien tiendo, komanda koba Tuliwetab Emitik. ³¹ Koityo komwochi Jeiso ichek koleji, "Kinochok akwe tugul agobo ane kemouni amu sirat kole, 'tun akwere mestwot ak koyesta kechirek che bo okwet.' ³² Ago tun ko kageng'eeta, andoenok awendi Galili." ³³ Ago kimwoji Petero koleji , "Mbo nginach tugul agobo inye, ko magoi kinacha ane." ³⁴ Koleji Jeiso, "Amwaun iman ale kotomo kochei kipsoiywet kemouni, iesio konyil somok." ³⁵ Koleji Petero, "Agot ngo nyolu ame koboten ko motoin." Kimwa ko u noto alamalyet tugul. ³⁶ Ak kiwo anyun Jeiso koboto icheget ole kiguure Getsemane ak koleji alamalyennyi, "otebi eng' yu si ko to awo yun asa." ³⁷ Ak kiimut Petero ak werik aeng' che bo Zebedii ak kotoi koimge ak konyigisit muguleldonyi mising. ³⁸ Kimwochi ichek anyun koleji, "Iimegei mising sobondanyu agoi meet. Otebee yu ak oripse koboto." ³⁹ Ak kiwo tai ng'atigin, ak kobutyi ng'weny ak kosa, kole, "Ee Kwanda, ngomugoksei kosiirtoeno kikombani ago, ma ko u ye amoche ane, ago ko ye imache inye." ⁴⁰ Ak kicho ole mi alamalyet ak konyor ichek koruitos ak koleji Petero, "Nee momuchi mbo oripse koboto sait agenge? ⁴¹ Oripse ,ak osae si mochut tiemutiet. Chamei tamirminet iman, ago nyalulilat borto." ⁴² Kiwo kogeny ne bo aeng ak kisa kole, "Eeh Kwandanyu, ngo ma chamdaat kosiirtoeno kikombani, ama aee, ko ingoyaak anyun mageng'ung." ⁴³ Ak kicho kogeny, ak konyor icheket koruitos, amu kinyigisen konyekwai. ⁴⁴ Ak kibagach icheket kogeny, kwo nebo somok, ak kisa koketyi ng'alegita. ⁴⁵ Ak kinyonji anyun Jeiso alamalyet, ak koleji, "Torutosi kora ak omunnyi? Ogeer, kait sait, ak kangeng'wekyi Weritab Chi eunekab kiptengeginik. ⁴⁶ Ong'eetye kebe. Ogeer kagolegitit inendet ne ng'wektoo." ⁴⁷ Ak kingoto kong'ololi, koit Judas, agenge eng' taman ak aeng,' koboto biko che chang' che tinyei rotonikab chok ak kurungusiek kobunu oldab tisiik che eechen ak boisekab biko. ⁴⁸ Ak kiiborji ichek kaborunet, inendet ne king'wektoi Jeiso kole, "Inendet ne ang'ututu ko inendet noto. Onam." ⁴⁹ Ak kichonji Jeiso eng' yoto, ak kole, "Chamge, Rabbi!" ak kong'utut inendet. ⁵⁰ Ak kileji Jeiso, "Choruani, yai kito ne kechonjini." Ak kibwa anyun bichuto, ak koyogoito eunekwai konam Jeiso. ⁵¹ Ak ogeer anyun, kiiyogoito eunyi age eng' ichek che kimi koboto Jeiso ak kong'us rorwenyi bo chok ak kotil otwogindetab tisindet ne O, kong'eti itinnyi. ⁵² Koleji Jeiso anyun, "Wekyi rotweng'ung ole kami' amu begu eng' rotonikab chok tugul che namei rotonikab chok. ⁵³ Nda ileen ma muchi asoom Kwandanyu, ak koyokwo malaikaisiek che siirei lugosiek taman ak aeng?' ⁵⁴ Ago isuldoitoi ano anyun sirutik che leen egu ko u nito ne matiny?" ⁵⁵ Kileji Jeiso tuiyosiek eng' sainoto, "Komong'u obwa onama, ko u yo osetyini inendet ne rebindet? Cham kemite tugul ak anetisiei eng hekalut ama onama ⁵⁶ Ago kayaagis chu tugul si kobiit kosulda sirutik che bo maotik." Ak kibagakta inendet anyun alamalyet tugul ak komweiyo. ⁵⁷ Ak icheget che kiga nam Jeiso ko kiimut inendet kwo gotab tisiindet ne O ne kiguure Kaiapa, ale kiga koumjige sirik ak boisiek. ⁵⁸ Ak kirubat Petero inendet eng' ole loo agoi kiyeng'utab tisiindet ne O. Ak kiwo got, ak kotebi ng'weny koboto askarik, kole, si koroo ole wetoi. ⁵⁹ Ak kicheng' tisiik che eechen ak kapkiruoget komugul baornatet nebo lembech agobo Jeiso, si kobiit kobar inendet. ⁶⁰ Ak kimanyor, nga nda kibwa baorinik che chang' che bo lembech. Ago eng' let kobwa aeng'u ⁶¹ ak kole, kimwa chichi kole, "Amuchi ang'em heklut ak atech eng' betusiek somok". ⁶² Ak kitonon tisiindet ne O, ak koleji ,"Mewolu kiy? Nee baornatani baorionjinin bichu?" ⁶³ Ak kisis Jeiso. Ak kileji tisiindet ne O "Ang'atin eng' Jehovah ne sobei ale mwowech ngot ii Kristo, weritab Jehovah" ⁶⁴ Koleji Jeiso, "Kaimwa inyendet. Ago amwowok ale, kong'ete rani ak tun ogere Weritab Chi kotebchei eng' eutab tai ne bo kamuktaet ak kochoni eng' barakutab bolik che bo kipsengwet". ⁶⁵ Kigerer anyun tisiindet ne O ngoroikyi kole "Kagomwa ne ya ta kemage nee baorinik alak? Ogeer anyun, kaogas raa mwaet ne ya? ⁶⁶ Olen nee?" kowol kole, Nyoljini kome." ⁶⁷ Yeityo kosingilji togennyi ak koluch ak korabach alak ⁶⁸ ak kolejini, "Maotenwech, inye we Kristo. Ng'o ne ne kakwerin?" ⁶⁹ Ak kitebchei Petero eng' kiyeng'utab got, ak kiwo kiboitio ne chepto ole mito inendet, ak koleji, "Kemite aginye koboto Jeiso Galilindet." ⁷⁰ Ago kitai eng' taitab tugul kole, "Monget noto imwoe." ⁷¹ Ak kingo kagomanda kwo Chepketer, koroo chepto age inendet ak koleji ichek che kimito oloto kimito, "Chichi agine ko komito koboto Jeiso Nasaretindet." ⁷² Ak kitai kogeny eng' kayosioet kole, "Mongen chichito!" ⁷³ Ak ne matianit, kobwa che kitonondos eng' ole legit ak koleji Petero, "Iman ii agenge ne bo bichoto, amu kang'angten ole ing'alaltei." ⁷⁴ Ak kitoi anyun kochubis, ak komurto kole, "Mongen chichito," ak sainata kochei kipsoiywet. ⁷⁵ Ak kibwat Petero ng'oloyot ne kiga komwa Jeiso kole kotomo kochei kipsoiywet itoo konyil somok. Ak kimanda sang' ak korir eng' ng'wanindo.