¹ Kingo legit kobek betutab sabato, ko katoi koech emet, eng' betutab tai ne bo wigit, kobka Maria Magdalene ak Maria age kotopen kererit. ² Ak kibotan ng'weny mising, amu kiwol eng' kipsengwet malaikaiyatab kiptaiyat, ak kicho komilda koita ak kotebe koyata. ³ Ki u kalyelet itondanyi, ak ki leelach mising' ngoroikyi ko u teluji. ⁴ Kibotonio ribik amu kiiywei inendet ak kogergeitge ak biko che kagobek ⁵ Ak kiwolji malaikaiyat chepyosok koleji, "Amwoiywei akwe, amu anget ale ocheng'e Jeiso ne kigigartat. ⁶ Ma komi yu; amu kagong'eet ko u yo kiga mwa. Obwa otopen ole korue Kiptaiyat. ⁷ Ak obe ochakte omwochi alamalyennyi oleji kagong'eet eng che kigobek. Ak ogeero kagondoenak inendet kwo Galili.Ogere inendet eng' oloto. Ogas, kaamwowok." ⁸ Ak kiba kochakta eng' kererit eng' kaiyweisiet ak boiboiyet ne o kiruai koba komochi alamalyennyi. ⁹ Ak kituiye Jeiso icheket ak koleji, "Chamge!" Ak kibwa konam kelyekji ak kogutungji inendet. ¹⁰ Ak kileji Jeiso icheket, "Amoiywei. Oba omwochi che kitupche koba Galili. Ak kgeero eng' olindo." ¹¹ Ye kita kobendi, chepyosok ogeer anyun komong'ji nganaset alak eng' ribik, ak komwochi tisiik che eechen tuguk tugul che kagoyoogis. ¹² Ak ye kingo kagoumgei koboto boisiek ak koruoch kogochi askarik fedaisiek che chang' ¹³ ak koleji, "Omwa akwe ole kobwa alamalyennyi kemoi ak kochor inendet ak koib keruitosi.' ¹⁴ Ak ngo kas gavena ng'olyondonito, kegaigai inendet ak kesoruok eng' nyalilda." ¹⁵ Kotaach anyun fedaisiek ak koyai ko u ye kaging'at. Ak kimanda ng'olyondonito eng Yahudik agoi rani. ¹⁶ Ago kiba Galili alamalyet tamanu ak agenge, agoi tulwet ole kiga koarorji Jeiso. ¹⁷ Ye kingo keer inendet kogutungji ago kisage alag. ¹⁸ Ak kijonji Jeiso ichek ak kong'ololji koleji, "Kagegono kimnateet tugul eng' kipsengwet ak ng'weny. ¹⁹ Noto anyun oba, ak oyai bikab bororosiek tugul koek alamalaik, obatisan ichek eng' kainetab Kwanda ak ne bo Werit ak ne bo Tamirmiriet Ne Tilil. ²⁰ Oneet icheket korub tuguk tugul che kaang'atak. Ak otopen, ami kobotok eng' betusiek tugul, agoi kagesunetab ng'weny."