¹ Mmi Jeeso a va kazwi kwa teni cho kuya ku muzi kwa a zwa, varutwana vaakwe ni va mu shaala mu masulye. ² Insavata chiinga yaa sika, a va yeendi ku isinagoge cho ku ka ruta kwa teni. Vuungi vwa vantu va vaa zuwi choku komokwa. Va vaa wambi ni vaati, "A vaa waani kuhi a a maano?" "Ku talyifa nzi uku kwaa heerwa?" "Zintu nzi izi zi komosa zaa panga cha mayanza aakwe?" ³ "Lyaaho uzu ka heena muveezi, mwaanaswiisu wa Mariya, Mukulwa a Jemusi ne Josesi ne Judasi ne Sayimoni? ''Vanchizhaakwe ka ku veena hanu naaswe?" Mmi va vaa nyeezwa ne Jeeso. ⁴ Jeeso naa va cho kuti, " Muporofita kaa vulyi ku kutekwa mbwiteeri mu muzi mwaa azwa ne mukati ka vakwantu ne mu nzuvo yaakwe." ⁵ Ke naa a va siri ku woola ku chita misevezi mikaando kwanda o ku vika valweere manza ne ku va hoza. ⁶ Ku saa zumina kwaavo ku vaalyi ku mu komosa. Mmi na yenda mu mizi naaya vu hasa lyinzwi. ⁷ A vaa suumpi va woonda ikumi nne tooveere cho ku taanga ku va tuminiza, vuuveri-vuuveri, cho ku vaha ziho zo ku zwiisa inhuho imbilaala, ⁸ mane naa va laerera kuti sanzi va hindi chintu mu musipiri waavo kunze lye inkolyi: insinyi chinkwa, nandi chihindiro mane nandi malyi mu mabanti aa vo, ⁹ ne kuti va zwaate insangu, mmi va siye ku zwaata va hembe voovere. ¹⁰ Mmi naa va cho kuti, "Ha mu sika he inzuvo, mu ikalyirire heeyo inzuvo mbwiteeri heeti ni mu ka zwiire mwee cho chivaka. ¹¹ Mmi ha iva kwiina muzi weeti ne u vulye ku mu tambula nandi ku mu teeka, ha kuti che muzwa mu wulyi, mu kunkumune insaangu zeenu ku chitira vupaki ku valyi." ¹² Va vaa yendi ni va kaya vulwiira vantu kuti vazwe mu zivi zaavo. ¹³ Va vaa zwiisa madimona mangi, ne ku hoza vanngi ni va va sinnga mafuta. ¹⁴ Simwiine Herude a vaa zuwi che izi zintu, mukuti izina lya Jeeso chi lyi va izivinkeene kumwi no kumwi. Vamwi va vaalyi ku cho kuti, "Johani wo ku kolovezi chaa va vuswa mu vafu chingi iizi ziho ze zimakas o, zi tendete mwaalyi." ¹⁵ Vamwi ni vaati ''Nje Elija." Ni ku va vulyo vamwi va vaa voolyi ni vaa cho kuti, "Muporofita vulyo, sina iiri nje vaporofita ve inako za kalye." ¹⁶ Mmi Herude chiingaa zuwa vulyo naati, "Johani u ni vaa kosolyi insingo, chaa a va vuswa." ¹⁷ Mukuti Herude a vaa lawulyi kuti Johani a wondwa cho ku injirikwa mu intorongo che ivaka lya Herudiyasi (muka Filipo, mwanchaakwe), Mukuti a va hindi cho ku mu sesa. ¹⁸ Mu kuti Johani a vaa lwiirite Herude kuti, "Ku fosaheere ku sesa muka mwanchaako." ¹⁹ Mmi Herudiyasi a va nyeezwa iyi indava cho kuyi woonda che inkulo naa saka ku mu ihaya, mmi ni ku sa woolyeki, ²⁰ mu kuti Herude a vaalyi ku tiya Johani; a veezi ha alyi mukwaame yoo u loondokete mane naa jolola, chinngi a va a lyi ku mu vavalyera. Naangati teeka Johani ku vaalyi ku mu sasamisa, n iha ku va vulyo a vaalyi ku mu teeka cho ku sanngisa. ²¹ Ku vaavi ne chivaka cho kuti Herude a chite mukiti wa mazaalo aakwe mwaa va sumpite va veresi , valaulyi, ne vahitizi mwa Galaliya. ²² Inako ye zilyio ze chitengwana, mwaanakazana wa Herudiyasi a veeza cho ku va zaanina, mmi naa lyi tumeresa Herude ne veene vaakwe. Simwiine naa cho uzu mukazana kuti, "Ni kumbiire chimwi ne chimwi cho usaka mmi mu ni du kuhe." ²³ A vakoonki kwaalyi naati, "Chimwi ne chimwi cheeti u sake kwaangu, mu ni chi kuhe, ne imbaalyi yo muvuso waangu." ²⁴ Mmi naa yeenda ku vannyina cho ku ka va vuuza kuti "Ni ka kumbiire nzi kwaalyi?" Ni vaati, ''Mutwi wa Johani wo Mukolovezi." ²⁵ Hoo hwaaho cho ku ka injira kwa simwiine cho ku hweera naa ka kumbiira naati "Mu nihe mutwi wa Johani wo mukolovezi ni wu ka viikitwa mu impulyeeti." ²⁶ Nandi iyi indava i vaa sasamisa simwiine, a vaa kangwa ku kaana mukuti a vaa lyikanite mane ne ku tiya veene vaakwe va veena he itafulye. ²⁷ Simwiine a vaa tumi isolye lyimwi mu masolye a kwe kuti lyi ka mu lyeetere mutwi wa Johani. Isolye lyi vaa yendi cho ku ka kosola mutwi wakwe mu ntorongo. ²⁸ A vaa lyeeti mutwi wakwe mu impulyeeti ku mukazana, mukazana cho ku u twaalyira vaannyina. ²⁹ Varutwana vaakwe, chiinga vaa zuwa vulyo, va veeza cho ku hinda muviri wakwe cho ku ka u wuunnga mu ikumbu. ^{31 30} Maapositoloyi, chi va kungeene ne va zimbulukite Jeeso, ni va mu lwiira zonse zi va va chiti ne zi va vaa ruti. Naa va cho kuti, ''Mu zwiire noonweena ku chivaka chi lyi wungwiire kuti mu woolye ku ka huuza." Mukuti vunngi vwaavo va vaalyi ku yeenda vamwi ni va ka voola, lyinu ka na va veena mane ne chivaka cho ku lya. ³² Mmi ni vaa zwa cho vwaato cho ku ya ku chivaka chi lyi wungwiire ku ka va voo voona. ³³ Mmi vantu vava va voni chi vazwa vamwi cho ku va lyemuha, nni vaa ngombola cha mateende ku zwa mu mizi yaavo, cho ku ka va sikira intanzi ne ku ka kungana ha vusu vwaavo. ³⁴ Chiinga vaa sika he irizo, cho ku waana vuungi vuungi chiinga a va lola cho ku va fwiira inse mukuti va vaalyi ku kola imberere zi seena mulyisani. Mmi naa taanga ku va ruta zintu zinngi. ³⁵ Inako chiinga yaa yenda, varutwana vaakwe cho ku iza kwaalyi, cho ku mu cho kuti, ''Tu ina mu chivaka chi lyi wungwiire mane ne inako chi ya tu siya.'' ³⁶ Va lwiire va yendendere mu mizi ne mizizana ina hafwihizana va ka lyi sakire zilyo va lye." ³⁷ Iiye naa va itava kuti, "Unwe mu va he zilyo va lye.'' Va va mu cho kuti, ''Tu woola ku ka va wulyira chinnkwa cha madenarii a lyikana mwaanda yo uvere kuti ze va lye?'' ³⁸ A va va cho kuti, ''Mukweete zinnkwa zoo nngayi?'' Mu yende mu ka vone.'' chinnga va va ka waana, va veeza cho kuti, ''Zinnkwa zi mana iyaanza ne nswi zoo uvere." ³⁹ A vaa lawiiri vantu vonse kuti va ikalye che zitopazana he insangani. ⁴⁰ Va va ikalyi mu zitopazana; zitopazana zo mwaanda ne za makumi a mana iyaanza. ⁴¹ A vaa hindi zinkwa zi mana iyaanza ne inswi zoo vere, naa lola ku iwulu cho ku zi tohonolofaza cho ku kauhanya ziinkwa naa ziha varutwana vaakwe kuti va ka zi viike ha vusu vwa vantu. Mmi naa hinda inswi zoovere chi ku va kauhanyeza vonse. ⁴² Va vaalyi vonse mbwiiteeri chiinga ve ikuta. ⁴³ Va vaa kunganya ziinkwa zonse zi vaa shaalyi, mane ne inswi cho ku izuza matundu a mana ikume ne vuuveri. ⁴⁴ Vakwaame va vaalyi zinkwa va vaalyi ku lyikana mwaanda i mana iyaanza. ⁴⁵ Ku zwaa aho vulyo naa chita kuti varutwana vaakwe va tante mu vwato va yendere ku vusu kwi imwi imbalyi, kwa Bethesaida, mmi iye cho ku lwiira ikunnga kuti lyi patalalye. ⁴⁶ Chiinga vaa yenda vonse,Jeeso naa yendera ku irundu ku ku chencherera. ⁴⁷ Chiteengu chi vaa siki, ne vwaato chi vu vaalyi ku yendera ha kati ke iwate, mmi iye naa sheere yeeyena mu lukaanda. ⁴⁸ Mmi naa vona vukaavo vu va veena mu vulyi vu ku zuha mu kuti luhuho lu vaalyi ku hapaana naavo. Hakusasani a hulu ni ku siri ku luunza a veeza ku valyi, naa kaya vu yenda ha iwulu lya menzi, naa sa ku hita ha valyi. ⁴⁹ Mmi ha va mu voona u kaya vu yenda ha iwulu lya menzi, va va zezi kuti isaku cho ku lyirira ku iwulu, ⁵⁰ mukuti mu ku mu vona va vaa tiyi. Hoo hwaa hoo naa va cho kuti, ''Mu siye ku va ne lyoowa! Njee Ime! Mu siye ku tiya!'' ⁵¹ A va injiri naavo mu vwaaato, ne luhuho cho ku ziima ku huunnga. Ni vaa shala va komokeerwa mu makaando. ⁵² Mukuti ka hena va vaa woolyi ku taluhanya kuti ziiinkwa zi vaalyi ku talusa inzi. Kwandaa a vulyo, inkuulo zaavo zi vaa zuminini. ⁵³ Chiinga vaa luutira kwii ishiira lyimwi, va veeza ku sika ha ikanda lya Ghenasareta cho ku siika vwaato vwaavo. ⁵⁴ Mu va mana vulyo ku suuka, cho ku mu lyemuha. ⁵⁵ Ni vaa ngombweera ku mwi ne kumwi mu chisi choonse ni va ka lyeeta valweere kwaalyi mu ma matirasi, kumwi ne kumwi ku va va zuwirire kuti u keeza kwa teni. ⁵⁶ Konse kwaa a vaalyi ku ya ,mu mizizana, mizi mikando, ne mu zisi va vaalyi ku lyeeta valweere ku mawuzikizo, mmi ni va mu kumbiira kuti a va sirike nandi vulyo kuti va wonde mungudu we chizavalo chaakwe. Vunnginngi vonse vu vaalyi ku mu wonda vu vaalyi ku hozwa.