¹ Vafarasayi naa vamwi va ma Sikiribe va vaalyi ku ka zwa kwa Jerusalema va veeza ku kungana ne va mu zimbulukite. ² Mmi va vaa voni vamwi va varutwana vaakwe ne va kweete ku lya chinkwa cha manza a pangite zi fosaheere, njo ku cho kuti, a saa sambite. ³ (Mukuti Vafarasayi ne Majuda onse ka va lyi mbwiiteri ha va samba manza, mukuti va si kweterere mu chizo cha vakulwaana vaavo. ⁴ Vafarasayi chi va ka zwa ku mawuzikizo, ka va lyi mbwiiteri ha va samba. Mane kwiina imwi milao miingi i va shaala mu masulye cho ku koza, ku swana ne ku shanza inkomoki, impoto, tusuva to ulooto, ne masofa ha va lyiira.) ⁵ Vafarasayi ne Masikiribe va vaa vuza Jeeso kuti, ''Chinzi varutwana vaako ha va saa yendi ku ya che chizo cha vakulwaana, ka kulyi ke te va lya chinkwa cha manza a saa sambite?'' ⁶ Naa va cho kuti, ''Isaya a va mu porofiti sinte uunwe muvalyizinantizi. A va ngolyi, 'Aava vantu va ni kuteka cho tuholo twaavo, mmi inkulu zaavo ziina kulye naame. ⁷ Va ni rapera ni i saalyi cho vusakusima, ni va ruta milao ya vantu ne ilyi ituto zaavo.' ⁸ Mu viikira ku imbaalyi milawo ye Ireeza cho ku woonderera zizo za vantu.'' ⁹ Naa va cho kuti, ''Unwe mu veene mukaana milawo ye Ireeza cho ku shaala zizo zeenu mu masulye! ¹⁰ Mu kuti Moshe a vaati, '' Mukuteke va isheenu ne va nnyineenu, 'mane, yoo u wamba vuvilaala chi veesi ne vannyina kaa fwee cho vusakusima.' ¹¹ Mmi mu cho kuti, '' Muntu haa cho veesi nandi vannyina, '' Ituso yeeti ni mwaa tambula ku zwa mwaangu nje Corban,''' ( njo ku cho kuti, 'Iheewa Ireeza')- ¹² lyinu ka usi mu zuminini ku chitira veesi ne vannyina chintu. ¹³ Mu maniisa ziho ze mulawo we Ireeza che chizo cheenu. Ne zimwi zi swana naazo zi mu panga.'' ^{14 16} Naa voola a sumpi ikuunga mane nna va cho kuti, ''Mu ni teeke, mu vonse, mane mu zuwisisa. ¹⁵ Ka kwiina chiina kunze lyo muntu chi woola ku mu viihaza ha chi injiira mwaalyi. Chi zwa mu muntu nje chi mu viihaza.'' ¹⁷ Ivaati Jeeso cho u zwa he ikunga cho u injiira mu inzuvo, varutwana vaakwe va va mu vuuza che ingulyi. ¹⁸ Jeeso naati, 'Naanwe ka mwiini ku zuwisisa? Ka mwiini ku vona kuti chi injira mu muntu ne chi zwa kunze keti che chi mu viihaza. ¹⁹ Mukuti keeti chi chi injira mwi inkulo yaakwe, mmi chi injira mwi ivumu lyaakwe mane cho ku zwiira ku chimbuzi?'' Cha aa manzwi Jeeso a va pangi kuti zilyo zi jololye. ²⁰ Naa cho kuti, "Chi zwa mu muntu nje chi mu viihaza. ²¹ Mukati ko muntu, ku zwa mu inkulu, ku iza minahano mivilala, vusahi, vusa, ku ihaya, ²² vuhuulye, kulakaza, vuvilala, ziziyeza, kulakalyisa, ku lakaza, ku twaala isuvi, ku lyi hindira he iwulu, vuholo. ²³ Vonse uvu vu vilaala vu zwa mukati, mane njo uvona vu viihaza muntu.'' ²⁴ A vaa katuki aho naa ya ku chisi cha Taya ne Sidoni. A veeza kwi injiira mwi inzuvo mane na asa suni kuti vantu ve izive kuti kweena, mmi ka kwiina mweeti naa va wungulwa. ²⁵ Hoo hwaaho mukulwaakazi, wo mwaanakazana yaa veena inhuho imbilala a vaa zuwi chaakwe, neeza, cho ku wa ha matende akwe. ²⁶ Lyinu uzu mukulwaakazi ivaalyi Muherika, ne ilyi MuSaerophoenician che chizo. Nna mu kumbira kuti a zwiisa madimona mu mwaanakazanaakwe. ²⁷ Nna mu cho kuti, ''Vahwiire valyiisikwa intanzi. Ka kuti ka ku shiyeeme kuhinda chinkwa cha vahwiire cho ku chiha vambwa.'' ²⁸ Mmi nna mu itava kuti, ''Nfwa, Simwiine, vambwa naavo va lya vufwaafwa vwa vahwiire kunsi lye itaafulye.'' ²⁹ Nna mu cho kuti, ''Mu kuti chi wa wamba vulyo, u sumunukite ku yenda. Idimona chi lyaa zwa mu mwaanakazana waako. ³⁰ Nna voola ku inzuvo yaakwe nna ka waana muhwiire u fupi ha mumbeta, mane ne idimona ne lyi zwiire mwaalyi. ³¹ Mmi nna voola na zwa mu chisi cha Tire, mmi naa zamba chisi cha Sidon naa ya ku iwate lya Ghalaliya ku ka ya ne ku chisi cha Dekapolisi. ³² Mmi ni va mu lyeetera muntu yaa seena a valyi ku zuwa mane neena vukaavo vo ku wamba, ni va mu kumbiira kuti a mu viike iyaanza. ³³ A va mu hindiri ku imbalyi ne ku seena yo u vweene, mane ne injirika munwe waakwe mukutwi kwaakwe, chiinga a mana ku swa mate, naa wonda lulyimi lwaakwe. ³⁴ A vaa lolyi ku iwulu, nna kwiita luhuho cho ku mu cho kuti, ''Ephphatha,'' Icho nje ku cho kuti, ''Iiwuke!'' ³⁵ Mane hoo hwaaaho ku zuwa kwaakwe cho ku iwuka, mane chi vaa wondete lulyimi lwaakwe chi vaa fwi, nna taanga ku waamba sinte. ³⁶ Nna va lwiira kuti sanzi va lwiiri muntu. Mmi mu ku va lawiira vulyo, aavo mane mu va valyi ku wambiira ahulu chaayo. ³⁷ Va vaa komokwa ahulu, ne vaa cho kuti, ''U pangiite chimwi ne chimwi nenza. Mane u woola ku panga kuti va saa zuwi va zuwe, va saa wambi va wambe.''