¹ Va veeza ku yimwi imbalyi ye iwate, ku chisi cha Gerasenesi. ² Ivaati Jeeso mwa suuka vulyo mu vwaato, ku ve iza unkosi yaa valyi ku ka zwa ku makumbu yaa veena inhuho imbilala. ³ Uuzu unkosi a vaalyi ku ikala ku makumbu. Ka heena ku va siina a va lyi ku woola ku mu woonda, nandi ku mu sumina che itewu. ⁴ Chaa a vaa sumiinwa kangi-kangi che zihaka ne itewu. Mmi a va pusulyi itewu ne ku kosola zihaka. Ka kwiina yaa veena ziho cho ku mu zuunda. ⁵ Masiku ne musihalyi wonse ku makumbu ne ku maruundu, a vaalyi ku lyira che lyiinzwi lyiina ku iwulu mane naa lyi fuunda cha mavwe a cheka. ⁶ Chiinga a vona Jeeso neena chivakazana, a vaa tiriri kwaalyi naa ka fukama ha vusu vwaakwe. ⁷ Naa lyira che lyiinzwi lyina ku iwulu naati, ''Ni pange nzii chaako, Jeeso, Mwaanaswiisu wiina ku iwulu mu ikaando ku vonse we Ireeza? Ni ku kumbira cha iiye mwiine Ireeza, siye ku ni sukulula.'' ⁸ Ka kuti a vaalyi ku mu cho kuti, ''Zwe mwaalyi, uuwe luhuho lu vilaala.'' ⁹ Naa mu vuuza kuti, ''Njo uwe ini?'' Naa mu itava kuti, ''Izina iyaanngu nje Vunngi-vunngi, ka kuti tu vanngi.'' ¹⁰ Naa mu kuumbiira kanngi-kanngi kuti kanzi a itumini kunze lye chisi. ¹¹ Lyinu ku veena muraka we ziguluve u vaalyi ku lya he iruundu, ¹² mmi ni za mu kuumbira, kuti, ''Tu tumine ku ziguluve; mane tu injire mu zilyi''. ¹³ Naa yi zuminina; inhuho imbilala ni zaazwa mwaalyi choku injira mu ziguluve, ni zaa ngombola cho ku suuka iruundu choku ke injira mu iwate, ziguluve zoonse nni za ka mina mu iwate zi vaalyi ku lyikana miyaanda i lyikana makumi oovere. ¹⁴ Va vaa lyiisiiza ziguluve va va ngombolyi chi ku ka wamba ku muzi mukaando ne chisi chonse. Lyinu vantu vonse ni vaa zwa cho ku yenda kuti va ka vone chi vaa chitahalyi. ¹⁵ Ni veeza kwa Jeeso cho ku vona unkosi yaa va injiirwa vunngi vunngi vwe inhuho imbilalala, na ikeere haansi, naa zweete, mane naa kwanine mu muhupulo, vantu ne vaa tiya. ¹⁶ Va vaa voni chi va pangahalyiri unkosi yaa a va injiirwa inhuho imbilala va va lwiiri vamwi chi va mu pangahalyiri konse ne che ziguluve. ¹⁷ Ni vaa tannga ku mu kuumbira kuti a zwe mu chisi chaavo. ¹⁸ Ivaati cho wu injiira mu vwaato, unkosi yaa va injirwa inhuho imbilaala naa mu kumbira kuti a yende naaye. ¹⁹ Mmi ka heena a va zuminini ichi, naa mu cho kuti, '' Kwiya ku inzuvo yaako ne ku vantu vaako, u ka va lwiire chaa ava ku chitiri Simwiine ne inse za ava ku fwiiri. ²⁰ Ava yeendi na ka waamba zikulu cha Jeeso zaa ava mu pangiri kwa Dikapolisi, mmi zumwi no zumwi naa komokwa. ²¹ Ivaati Jeeso chiinga a luutira ku imwi imbalyi, mu vwaato, ku veeza ikuunga ni lya mu zimbuluka, cho wiina ha imbalyi ye iwate. ²² Ku veena mukulwaana we isinagoge, yo u suumpwa Jairasi, a veeza, chinga vona Jeeso, cho ku fukama ha mateende akwe. ²³ Naa mu kumbiira kanngi-kanngi, kuti, ''mwaana-kazana wangu cho u fwa. Ni ku kumbiira kuti, wuize zo u mu viike maanza kuti a holye mane a halye.'' ²⁴ Naa yenda naye, ne ikuunga ni lya mu shaala mu masulye ni lyi chuutiire ahulu mwaalyi ku mu zimbuluka. ²⁵ Ku veena mukulwakazi ya vaalyi ku itika malaha mwaaka yi woonda ikumi ne toovere. ²⁶ A vaa nyaandi ahulu mane mwa ava avi mu maanza e inganga ziingi naa teendesa chimwii ne chimwii cha veena nacho kuti a holye, kunze lyo kuti a ve ne mazimo malotu chizimo cho ku vihalyira ku vusu. ²⁷ Ka cha a va zuwiire cha Jeeso. Choku izira masuulye mukati ko vuungi hakati ke ikuunga, na gunka chizavalo chaakwe. ²⁸ Ka kulyi a va cho kuti, '' chi na gunka zizavalo zaakwe, mu ni hoolye.'' ²⁹ Chiinga mu gunka, malaha a va ziimi ku itika, naa zuwa mu muviri waakwe kuti cha hozwa mu masukuluka aakwe. ³⁰ Mane hoo hwaaho Jeeso na zuwa kuti ziho chi za azwa mwaalyi. Na chevuka mukati ke ikuunga cho ku vuuza kuti, ''Njeeni wa ni gunka?'' ³¹ Varutwana vakwe ni va mu cho kuti, ''Ko u vweene ikuunga lyonse ilyi lyi ku zumbulukite, ku zwaaho u cho kuti, 'Njeni wa ni gunka?''' ³² Mmi Jeeso na lola-lola kuti a vone waa panga vulyo. ³³ Uuzu mukulwaakazi, choku iziva cha mu pangahalyira, a va tiite mbwiiteri na chachalyika. A veeza naa wa ha vusu vwaakwe naa mu lwiira vusakusima voonse. ³⁴ Naa mu cho kuti, ''Mwaanakazana waangu, itumero yaako chi ya ku hoza. Yende che ikozo mane u hozwa mu vutuku vwaako.'' ³⁵ Ivaati cho u sii wamba, nni kwe iza vantu va vaalyi ku kazwa ku mukulwana we isinagoge, Ni vaati, '' Mwaana kazana wako chaa fwa. Chiinzi hoo sii kateeza muruti?'' ³⁶ Ivaati Jeeso chiinga zuwa mu va wamba vantu, cho kucho muruti we isinagoge kuti, ''Siye ku tiya. Uuwe zumine vulyo. ³⁷ Cho ku saa zuminina zumwi no zumwi ku mu sindikiza, kunze lya Pitorosi, Jemusi, ne Johani, mukulwa Jemusi. ³⁸ Va ve iza ku inzuvo yo mukulwana we isinagoge cho ku vona vantu ni va tolyiya ahulu; ne va lyira ne ku boonda. ³⁹ Chiinga injira mu inzuvo, a va vacho kuti, ''chinzi chi mu sasamiisa inkulo ne ku lyira? ''Uuzu muhwire ka a fwiire mmi u lyeere.'' ⁴⁰ Va va mu seki. Mmi na zwiisikiza voonse kunze cho ku shala ne vesi ne vaanyina muhwiire, ne vaa veena naavo, ni ve injira mwaa veena muhwiire. ⁴¹ A vaa hindi iyaanza lyo muhwiire naa mu cho kuti, ''Talitha Koum,'' ichii ku cho kuti, ''Mukazanaana, ni kucho kuti, ziime.'' ⁴² Hoo hwaaho muhwiire naa ziima cho ku yeenda (a veena zirimo zi woonda ikumi ne toovere). Nni vaa komokwa ahulu. ⁴³ A vaa wambi cho ku koza lyinzwi kuti kaanzi va lwiiri vantu chaa pangahala. Naa vacho kuti va muhe cho kulya.