¹ Mane naa taanga ku wamba manzwi ku imbalyi lye iwate. Mmi ikuunga lya vantu vaangi nni lyi mu zumbulukite, mmi na tanta mu vwaato vu veena mu iwate cho ku ikala. Ikuunga lya vantu vaangi nni lyiina he imbalyi ye iriizo. ² Mmi naa va lwiira zintu zingi che ingulyi, nna waaba nnavo muku ruta kwaakwe, ³ Mu teeke, mulyimi a va yendi ku ku viala intaanga zaakwe. ⁴ Cho usi viala, ziimwi ntaanga ni za wiira mu inzira, mmi zizuni ni ze iza cho ku lya intaanga. ⁵ Mmi ziimwi ni za wiira mu mangomwe, ku sena ku veena ivu lyingi. Hoo hwaaho cho ku mena, ka kuti keheena ku veena ivu lyingi. ⁶ Mmi izuva chiinga lyaa zwa, zi va hiyi, ka kuti keena zi veena mihisi, ni za manina chi za zuma. ⁷ Mmi zimwi intaanga ni zaa wiira mu miiya. Zisamu zo miiya chiinga za kula cho ku tutumiza intaanga, cho ku kangwa ku zwiisa zihaantu. ⁸ Zimwi intaanga zi va wiiri mu shiyeeme ni za taanga ku viika zihaantu chi zi kweete ku kula, mane ni ze injiha, zimwi choku viika vuungi vwa makume oo tatwe hee iwulo, zimwi makume a mana iyaanza nne kaamwiina, zimwi mwaanda." ⁹ Mane naa ava cho kuti, " wiina matwi o ku zuwa, a zuwe." ¹⁰ Mmi Jeeso cho wiina ye yeena, va veena ha fwihi naaye ni veena ikumi ne tooveere va vaa mu vuuza che ingulyi. ¹¹ Naa va cho kuti, "Uunwe mu heerwa zi lyi wunngwiire zo muvuso we Ireeza. Kwaavo veena hanzee chimwi ne chimwi ingulyi, ¹² ka kuti ha va lola, vusakusiima va loola, mmi ka va voni, ne ku zuwa va zuwa, mmi ka va zuwisisa, mbwita hava sandumukira kwe Ireeza kuti a va wondere." ¹³ Mmi na vaa cho kuti, "Mane mu zuwiisiiza iyi ingulyi? Mmi lyinu mu mu zuwiisiiza vulye zimwi ingulyi? ¹⁴ Mulyimi yoo viala intaanga njeye njo viala manzwi. ¹⁵ Zimwi nje izo zi wiira he imbalyi ye inziira, ha va vialwa inzwi. Mane ha valyi zuwa, Cho vuhweeru Saatani wu iza cho ku hinda lyiinzwi lyi va vialwa mu valyi. ¹⁶ Mmi zimwi njeizi zi va vialwa mu mangomwe, njaava, ha va zuwa manzwi, hoo hwaaho va lyi tambula cho ku sanga. ¹⁷ Mmi ka ziina mu hise mwaazo, mmi cho ku hala inako infwiihi. Lyinu milyiko ne ku nyaandiswa ziiza che ivaka lye lyinzwi, ku zwaaho cho ku chuunchuuna. ¹⁸ Mmi zimwi nje zii zi vaa vialwa mu miiya. Va zuwa manzwi, ¹⁹ mmi va suni ze inkanda, iziyezi yo vuhumi, ku avera zintuzana ku injira cho ku diinka lyinzwi, mane cho ku sa haa. ²⁰ Mmi kwiina ziina zi va vialwa mu ivu lyi shiyeme. Va zuwa manzwi cho ku a tambula mane cho ku zwiisa zihantu: vamwi makumi oo taatwe, mane vamwi makumi a mana iyaanza ne lyimwiina, mane vamwi mwaanda." ²¹ Jeeso na va cho kuti, mmu woola ku lyeeta kamparamba mu inzuvo cho ku ka viika mu ituundu, nandi mu ikonde lyo mumbeta? U ka lyeta cho ku ka viika ha meikalyiro a teni. ²² Ka kwiina chi lyi wungwiire che ite ni chi vulye ku iziviiwa, mame ka kwiina chipiri cheeti ni chi vulye ku iziviiwa. ²³ Mmi wiina matwi o ku zuwa, mu siye a zuwe!" ²⁴ Na va cho kuti," mu teeke ahulu kuzi mu zuwa, chilyikanyiso cho lyikanya chaacho, ko lyikaanywa chaacho, mane nne ku weererwa chaa cho. ²⁵ Mmi wiina, kwaakwee ka heewa vuungi, mane ya senna, kwaalyi ka hindirwa nne che nna naacho ." ²⁶ Mmi nna cho kuti," Muvuso we Ireeza u kola unkosi a va vialyi intaanga mu lukaanda. ²⁷ U laala masiku cho ku vuuka ha lyaazwa, mmi intaanga zi mena mane cho ku kula, mmi na se izi kuti vulye. ²⁸ Inkaanda iviika zilyo ka ha vuhaayo: Ku taanga ikova, ku zwaaho zihantu, mane nne vuheke mu zihantu. ²⁹ Mmi lyinu zihantu ha zi vizwa cho ku hweera u tuminiza ijeekiso, ka kuti ku siinza chikwaa sika." ³⁰ Mmi na va cho kuti," Tu woola ku swanisa vulye muvuso wee Ireeza, naandi tu woola ku tendesa ihii ingulyi ku taarusa? ³¹ Ku kola lutaanga lwe masitade, chi lu vierwa, nje lutaanga lu ninni ku zamba zonse mu inkaanda. ³² Mmi, ha zi vialwa, zi kula mane cho ku zaamba zivialo zo mu luwa, zi panga mitavi mikando, kuti tuzuni twe iwulu tu pange zizumbo mu minzunde yaazo." ³³ Che ingulyi ziingi zi swaana ne iyi a va wambi manzwi ku valyi, ku vona va vaalyi ku woola ku zuwisisa, ³⁴ mmi ka heena a va wambi naavo ne ku seena ingulyi. Mmi cho wiina ye yeena, nna tarusa chimwi ne chimwi ku varutwana vaakwe. ³⁵ Uulo luzuva, chi lyi mmina, na va cho kuti, "Tu ye kwe yina yimwe imbalyi." ³⁶ Ni va siya inkuunga, mmi nni va hiinda Jeeso naavo, ka kuti a venna kalye mu vwaato. Maato a mwii a ve nna naaye. ³⁷ Mmi ni kweeza kanyuudwe ka vilala mane masunda nni a taanga kui njiira mu vwaato mmi vwaato cho ku manina chi vu izwiire menzi. ³⁸ Mmi Jeeso iyee a veena ku masulye, nna lyeere ha mushaamo. Mmi nii va mu vuusa, ni vaati, "Muruti, ko wiina isipe kuti chi tu fwa?" ³⁹ Mmi, na vuuka, nna kalyimera luhuho naati ku iwate, "Ikozo, ku tontolye. "Mmi luhuho ni lwa ziima, cho ku tontoza a hulu. ⁴⁰ Mmi na va cho kuti, Mu tiya nzi? Na hanu ka mwina itumero? ⁴¹ Ni ve njirwa lyoowa lyiingi niva tanga ku lyi cho kuti." Nje nni uzu, mukuti nne luhuho ne iwate lyi mu teeka.?"