Ikauhanyo 3

1 Mmi hape nne njira mu isinagoge mu veena unkosi yaa veena iyaanza lyi nyonyoveere. 2 Vantu vamwi nni vaa chuuta ku vambana naaye ku vona kuti mwaa muhoza lwe Insavata ku chitira kuti va woolye ku muvona mulandu. 3 Jeeso nna wamba nne unkosi we iyaanza lyi nyonyoveere'', Ziime aha mukati ka vantu voonse". 4 Ku zwaaho nna wamba nne vantu,'' Aa kwiina kaha mulao ku panga vulotu luzuva lwe Insavata naandi ku sasamisa, ku haza, naandi ku ihaya? Mmi nni va tontola. 5 Nna lola imbalyi zoonse nna vengete, mmi nna sasamiswa nne ku zuminina inkulo kwaavo, mane nna cho unkosi,'' wololye iyaanza lyaako.'' Nna lyi wolola, mmi iyaanza lyaakwe nni lya voola mu maziimo. 6 Vafarasayi nni veena Heroda cho ku zwiira haanze ku vona kuti va woola ku mu ihaya vulye. 7 Jeeso nne varutwana vaakwe, nni vaaya ku iwate, mmi ikuunga lya vantu vaangi nni lya mushaala mu masulye kuzwa kwa Galaliya nne kuzwa kwa Judiya 8 nne kuzwa kwa Jerusalema nne kuzwa Idumiya mane vulyo nne ku zaamba Jorodani nne ku zimbuluka Taya nne Sidona. Chiinga va zuwa zintu zaa vaalyi ku chita, vuungi vuungi vwa vantu nni vweeza kwaakwe. 9 Mane nna kumbiira varutwana vaakwe kuti va mu vakanyeza vwato vu niini che ivaka lya vantu vaangi, ku chitira kuti saanzi va mu lyaatoolyi. 10 Ka kuti a va hoza vaangi, muku vaku chita kuti zumwi ne zumwi ya veena ku katazeha nna mu chuutira kuti a mu wonde. 11 Kumwe nne kumwe vulyo Inhuho imbilaala kuzi valyi ku muvona, zi vaalyi ku wiira haansi ha vusu vwaakwe choku huwa, nni zicho kuti, u Mwaanaswiisu we Izeera." 12 Nna zi kalyimera kuti saanzi zi mu izivisa ku vantu. 13 Naaya ku iwulu lye iruundu, choku sumpa vaa vaalyi ku saka, mmi nni veeza kwaalyi. 14 Nna sala veena ikumi ne toovere (vaa vaati nna suumpa va Apositoloyi), kuti va woolye kuva naaye mane nne kuti ava tume kuka waamba mulayeza, 15 nne kuva nne ku laula ko ku zwiisa madimona. 16 Mmi nna sala veena ikumi nne toovere: Sayimoni, iiye waa vaahi izina lya Pitorosi; 17 Jemusi mwanaswiisu wa Zebediya, nne Johani mwaancha Jemusi, iiye wavaahi izina lya Boanerigesi, lyi landununwa kuti vaana vo ku tiimba; 18 nne Enduru, Filiipi, Batholomiyu, Mateu, Toomasi, Jemusi mwanaswisu wa Alufeyaasi, Thaddaeusi, Sayimoni we impuupu 19 nee Judaasi Isikariyota, yaa vaa keeza kuku mu wuza. 20 Mmi nna ya ku irapa, mmi ikuunga nni lyeeza ha mwiina, mu va vaalyi kusa woola kulya zilyo. 21 Lyiinu vee irapa lyaakwe chiinga va zuwa kaha iichi, nni va yeenda kuti vaka mu woonde, ka kuti va vaacho kuti, cha zoverwa ku zeeza.'' 22 Vangolyi vazwa kwa Jerusalema nni vaacho kuti, "Wi njiirwa Baluzebule," mane, "U zwiisa madimona cha simwiine wa madimona." 23 Jeeso naa va suumpira kwaalyi choku wamba naavo che ingulyi naati, "Saatani u zwiisa vulye Saatani? 24 Mmi haiva muvuso nni ulyi sandukira uuwo wiine, uuwo muvuso keeti chiwu ziima. 25 Haiva inzuvo ilyi sandukire iiyo yiine, iiyo inzuvo keeti chiyi ziima. 26 Haiva Saatani wa ziima iiye mwiine cho kulyi sandukira, keeti cho woola kulyi zimanina, mane wiizi cha a sika ha kumana. 27 Mane ka kwiina yo woola ku injira mu inzuvo yo unkosi yo kolyete choku kuiiza zivyiea zaakwe kwanda kuti a sumine yoo yo uuzu mukwaame piri, mmi ku zwaaho nje cha woola kuyiva. 28 Cho vusakusima nni mulwiirite, zivi zoonse kazi wonderwa vaana va vantu, mane nne ku tukana koonse kuva tukana, 29 mmi zumwe ne zumwe yeeti nna tuke luhuho lu jolola keeti na wonderwa, mmi wiina mulaandu we chivi chi saa mani." 30 Jeeso nna wamba vuti ka kuti va vaalyi kucho kuti, '' wiina luhuho luvilaala." 31 Mmi lyiinu va nyina nne va mukulwe nni veeza ku ziima haanze. Nni va tuminina vantu, kuti vaka mu suumpe. 32 Mmi nna zimbulukitwa ne vantu vaangi, vava mucho kuti, "Va nyoko nne vaanche vaako veena haanze, mane kete vaku saka." 33 Mmi nna ave itava kuti, ''vaa mmayo nne vaanche vaangu nji vaani? 34 Na lola ikuunga lyiva mu zimbulukite cho kucho kuti, "Vone, aava nje va mmayo nne vaanche vaangu! 35 Mmi lyiinu zumwe nne zumwe yoo panga ku suna kwe Ireeza, uuzo muntu nje mwaachaangu, nne nchiishjaangu, nne va mmayo."