¹ Na sumpa vamaneyaanza no vovera na vaha ziho ne maziimo zo kuhindika madimona ne kuhoza matuku. ² Na vatumina kuruta vusimwiine vwe Ireeza ne kusirika valwaala. ³ Na vachokuti, ''Musiye kuhiinda chimwi mumusipiri- nangati zibya, kapa chikwama, kapa chilyo, kapa malyi, mane nechaaparo. ⁴ Muunzuvo yeeti ni musikire, mwiikalye mwateni mbiita hakuti chimukaya. ⁵ Hamwinehamwi hava samutaambilyi, hakuti mukatuka mweeyo itoropo, mulyikunkumune iisuko kumateende kuva vushupi kuvalyi.'' ⁶ Mmi nivakatuka kuya mumizi, kuhasa ivangelyi ne kuhoza hamwi ne hamwi. ⁷ Heroda muvusi we chiraranda nazuwa zikweete zichitahala, na ziyereha, mukuti vamwivavalyi kuchokuti nje Johani chakavuka kuvafu, ⁸ vamwi nivati nje Elija wa voneka, vamwi nivaati njowumwi wa maporofita wakalyekalye wa zikuka. ⁹ Heroda naachokuti, ''Ni vakosolyi Johani mutwi. Njozwihi woozo yinizuwiire chaakwe?'' Mmi nalyika kumuvona. ¹⁰ Va apositola chinga vakavoola, ni va mulwiira zoonse zivavakachiti. Naava hiinda nayeenda naavo, niva lovokera kwiitoropo yisuumpwa Betesida. ¹¹ Mmi vaantu chinga vazuwa, ni va mwiichirira. Na vatambula cho kuvalwiira cho vusimwiine vwe Ireeza, na hosa vavalyi kusaka kuhozwa. ¹² Izuva chilyiya kukwiimina, veena iikumwi ne vovere chokuya kwaalyi ni vaati, ''Vooza vaantu vaye muminzi ne kumawa kuti vaklyi sakire malaalo ne zilyo, mukuti twiina hanu halyiwuungwire.'' ¹³ Mmi vacho kuti, '' Muvahe chimwi valye.'' ¹⁴ (Vavalyi vakwaame vayendera zikiti zimana iiyaanza.) Naacho varutwana vaakwe, ''Muvacho vekalye haansi chezitopa ziina makumwi a mana iiyaanza chimwi ne chimwi.'' ¹⁵ Mmi niva chita vulyo, chokuveekalyika haansi. ¹⁶ Cho kuhiinda maroto amana iiyaanza ne iinswi zovere, na lola kwiiwulu, na zitohonolofaza cho kuzicholola tubalyi, chokuha varutiwa kuti vahe vaantu. ¹⁷ Voonse vavalyi cho kwiikuta, mmi zivashaalyi zivatotolwa - zizuma ziina iikumi ne zoovero zo tufwafwalyi. ¹⁸ Mmi kuvaati Jeeso cho kweete wurapera yeyena kumbalyi, varutiwa va veena naaye, Na vavuza, naati, '''Chinavuungu chichokuti njemeeni? ¹⁹ Ni veetava, '' Johani Mukolovezi, Mmi vamwi vati Elija, mane vamwi vati wuwwumwi wa vaporofita vakalyekalye ya va vuuki.'' ²⁰ Lyinu navacho kuti, ''Lyinu wuunwe mucho kuti njeemeni? ²¹ Mmi nava kalyimera kuti kaanzi ni valwiiri muutu, ²² naacho kuti, ''Mwaana wo muuntu wulukeere kusukuluka muziintu ziingi mane ne kukaanwa ne vahitizi ne vapirisiti vakulwaana ne vang'olyi, mane ke hayiwa mmi mwiizuva lyo vutatu cho kuvuuswa.'' ²³ Lyinu nava lwiira voonse naati, ''Wumwinewumi yosaka kuniichirira, alyi tovohe akulyike chifapaano chaakwe izuvanezuva anichiirire. ²⁴ Wumwinewumwi yovavalyera vuhalo vwaakwe ka vumuzovera, mmi yo zoverwa vuhalo vwaakwe chaangu kavuhazwa. ²⁵ Wu voolyerwaanzi muuntu yo huma inkaanda yoonse mmi cho kumayiva kapa kulyihaya mwiine? ²⁶ Wumwinewumwi yo ni fwiira insoni kapa maanzwi aangu, wuuzo Mwaana wo Muuntu ka mufwiire insoni hakuti wukeeza muku verenga kwaakwe ne kuverenga kwa Taayo ne mangiloi a jolola. ²⁷ Mmi vusakusima ni michokuti, kwiina vamwi vazimeene aaha vaseeti ni va vone lufu nivaseeni kuvona muvuso we Ireeza.'' ²⁸ Mumasulye a mazuva amana iyaanza ne wotatwe Jeeso chingamana kuwaamba awo maanzwi, na hiinda Pitorosi ne Johani ne Jakobo ni vatantukira hewulu lye iruundu ku kurapera. ²⁹ Cho rapera, chiziimo che chifatuho chaakwe cho kusaanduka, zaparo zaakwe cho kutuva wo kuveera. ³⁰ Muvone, vakwaame vovere vavalyi kuwaamba naye, Mushe ne Elija, ³¹ vaveeza mukuverenga, nivawaamba naye cholufu lwaaka, chavalyi kumaniniza chaacho mwa Jerusalema. ³² Pitorosi ne vaveena naavo vava lyatiriizwa ne iing'ozi, mmi chinga vasisimuka, ni va vona kuverenga kwaakwe ne vakwaame vovere vava zimeene naavo. ³³ chinga vaazwa ha Jeeso, Pitorosi naamucho kuti, ''Simwiine, kushiyeeme kuti tuti tuve honu. Tuchite zikaanka zotatwe, chimwi nchaako, chimwi ncha Mushe, chimwi ncha Elija.'' (Kana aveezi cha waamba.) ³⁴ Moona mwavalyi kuwaamba, iikope chokwiiza kuva wuumba, mmi nivenjirwa lyoowa chingaveenjira mwiikope. ³⁵ Lwiinzwi chokuzuweeka mwiikope, nilyiti, ''Wuuzu Mwaanaangu, yiniva salyi; mumuteeke.'' ³⁶ Lyiinzwi chinga lyawaamba, Jeeso na shaala yeyena. Nivatontola ni vasalwiiri muuntu mwaawo mazuva kaha chiva vavoni. ³⁷ Mmi mwiizuva lyiichirira, chivasuka kwiirundu, chinavuungi ni chamukopanisa. ³⁸ Muvone, mukwaame ya veena muvuungi na huwa, naati, ''Muruti, Ni kukumbira vone mwaanaangu, njeye mwaanaangu vulyo. ³⁹ Wuvweene, wulawulwa luhuho luvilala kuzwaaho wuvokolola; kumuchita kuti a chachalyike no kuzwa ifulu mukaholo. kalumuzwi mane mane lumuguvoola maaswe. ⁴⁰ Na kumbira varutiwa vaako kuti valuzwiisa, mmi kana vawoola.'' ⁴¹ Jeeso neetava, ''Wuunwe mumushobo wusazumini muvilala, ni vaavi naanwe luvaka lukumahi ninikala naanwe? Lyeete kunu mwaanaako. '' ⁴² Muswiisu chokeeza, madimona chokumu swehera haansi naamunyunga cho kuchachalyika. Mmi Jeeso cho kuhindika luhuho luvi muswiisu cho kuhola, cho kumvozekeza veesi. ⁴³ Voonse ni vakomokwa vukaando vwe Ireeza. Chiva sikomoketwa zoonse za chita, nacho varutiwa vaakwe, ⁴⁴ '''Aa manzwi eenjire mukati kamatwi eenu: Mwaana wo Muuntu kaheewa mumaanza avaantu.'' ⁴⁵ Mmi kana vavazuwi iichi chiambo. Ziva wuungwiirwa kuvalyi, kuti vasiye kwiiziva italuso yateni, mane vava tiyi no kuvuza kaha chaambo chateni. ⁴⁶ Lyunu ni vataanga kulyikananisa kuti njeeni mukatikavo yo lukeere kuva mukulwaana. ⁴⁷ Mmi Jeeso, chokwiiziva ziina munkulo zaavo, naahinda muhwiire na muviika he mbalyi yaakwe ⁴⁸ naavacho kuti, '' Yo tambula muhwiire mwiizina lyaangu, wunitaambula; mmi yonitambula, wutambula ya vanitumi. Mukuti yoolyi muhwiire kweenu muvoonse njo mukulwaana.'' ⁴⁹ Johani neetava, ''Simwiine, twaavona muuntu na kakaniza madimona kuzwa mwizina lyaako mmi na muviinda, mukuti kayenderinzaani naaswe.'' ⁵⁰ ''Wusiye kumukaanisa,'' Jeeso naati, ''mukuti wumwinewumwi yasa tukananisa wiina naaswe.'' ⁵¹ Mazuva wo kuhindirwa kwiiwulu cheena hafwihi, na manisa kuti wukaya kwa Jerusalema. ⁵² Na tuma vaantu havusu vwaakwe, niva keenjira mumuzi wa Samaria kuka muvaakanyeza chimwi ne chimwi. ⁵³ Mmi vaantu kana vava mutambulyi mukuti chaava maniisa kuta wukaya kwa Jerusalema. ⁵⁴ Varutiwa va Jakobo ne Johani chinga vavona iichi, nivaati, '' Simwiine, wu saka kuti tu lawulye mulyiro kuzwa kwiiwulu zowu vahiisa? ⁵⁵ Mmi naachevuka na vakalyimera, ⁵⁶ chokuya kuwumwi muzi. ⁵⁷ Chivaya vweenda munzira, wuumwi naamucho kuti, ''Mu nikwiichirire koonse ko kaya.'' ⁵⁸ Jeeso na mucho kuti, ''Vaasiibwe veena malyiidi, zizuni ziina mwiiwulu ziina zizuumbo, mmi mwaana wo Muuntu keena ha viika mutwi.'' ⁵⁹ Mmi naacho wumwi, ''Ni chirire.'' ⁶⁰ Mmi na muchokuti, ''Wusiye, Wusiye vafu vawuunge vafu vaavo. mmi wuuwe, yeende wukawaambe koonse zo muvuso we Ireeza.'' ⁶¹ Wumwi naacho kuti, '' Mbuni kwiichirie, Simwiine, kono wu nisiyetaanzi nikalaye veena kumuzi.'' ⁶² Jeesu na mwiitava, ''Kakwiina yo kweete chikekere naa chevooka yo swaneere kwiinjira mumuvuso we Ireeza.''