¹ Iizi chinga zamana, Simwiine na sala vamwi veena makumi eena seveni, na vatumina vovere vovere havusu vwaakwe mumizi yoonse ne muzivaka za kaya kukuhiita muziri. ² Na vacho kuti, ''Zisiinzwa ziingi, mmi vasiinza vache. Lyinu mukuumbire Simwiine wo kusiinza a mitumine vavereki ku kusiinza. ³ Muyeende, Muvone, Ni mitumina nimulyi mumberere mukati ka vantuhu. ⁴ Kaanzi muhiindi chikwama cha malyi, kapa mukotana we zivya, kapa iinsangu, musiye kurumeresa munzira. ⁵ Iinzuvo yimwi ne yimwi yimwiinyira, mutaange muti, ' Chisemo chive heyi iinzuvo!' ⁶ Chikwiina mwaana we chisemo mwateni, chisemo mbuchive haalyi, mmi chikuseena, kachi volyere kweenu. ⁷ Mwikalye mweeyo iinzuvo, mulye ne kunywa chiva miha, mukuti yo teenda wuzaamba ituwero yaakwe. Musiye kuchincha chinca mazuvo. ⁸ Wumwi ne wumwi muzi wumwiinjira, mucho kumitaambula, mulye chi mwaheewa ⁹ ne kuhoza valwaala veena hateni. Muvacho kuti, 'Vusimwiine vye Ireeza veeza hafwihi naanwe.' ¹⁰ Ha mwiinjira mumuzi cho kuvula kumutaambula, muye munzira zaawo muti, ¹¹ 'Kulyi iisuko lyizwa mumuzi weenu lyiina kumateende eetu tulyi muunkumwiina.! Mmi mwiizive iichi: Muvuso we Ireeza wiina hafwihi.' ¹² Ni micho kuti mweelyo iizuva Sodoma kachitwa neenza kuzaamba wuuwu muzi. ¹³ Vumai mbwaako, Korazini! Vumai mbwaako, Betisaida! Kalyi miteendo milotu iiva chitwa mweenu ni vakachutwa mwa Tire ne Sidoni, ni vava sukuluhi kaalye, kwiikala muzizavalo za masaka ne hachitwe. ¹⁴ Lyinu ka kuzezererwa Tire ne Sidoni munnako ye katulo kuunda eenu. ¹⁵ Wuunwe, Kaperanauma, muzeza kuti kamuhiindirwa kwiwuulu? Nee, kamushetumwiina kwa Hadesi. ¹⁶ Yo miteeka wuni teeka, mmi yo mikaana wunikaana, mmi yo nikaana wukaana ya va nitumi.'' ¹⁷ Veena makumi eena seveni niva kavoola ni vasaangite, nivaati, ¹⁸ ''Simwiine, mane ne madimona ava tuzuwi che izina lyaako.'' Jeeso navacho kuti, ¹⁹ ''Ni valolyete Satani choowa kwiiwulu siina mumini. Muvone, Ni vamihi ziho zo kulyaatoka iinzoka ne tuvumwe, ne ziho zoonse ze chira, mane kakwiina cheeti ni chi misasamisa. ²⁰ Nangati kwiina vulyo musiye kusaangiswa vulyo iichi, kuti iinhuho ziva miteeki, kono musaange kuzaamba kuti mazina eenu a ng'olyetwa kwiwuulu.'' ²¹ Mwe iyeeyo iinnako na saanga ahulu cho Luhuho Lujolola naati, ''Ni kuteemba, Taayo, Simwiine wo wuulu ne haansi, mukuti wu vahuumbiri iizi ziintu kwavana veena maano ne vazwiwiseza mmi niwazi senwiira vasana vavarutwa, vaswana ne vahwiire. Eeni, Taayo, mukuti ziva kusaangisa mumeenso aako. ²² Ziintu zoonse ni va ziheewa ne Taayo, mane kakwiina wiizi Mwaana mbwiita Taayo, mane kakwiina wiizi kuti Taayo njeeni mbwiita Mwaane ne vaavasalyi Mwaana kumuvasenwiira. ²³ Na zookera ku varutiwa vaakwe kumbalyi navacho kuti, ''Veena mikoonde vaantu va vona ziintu zimuvweene. ²⁴ Ni milywiira kuti, vuungi vwa vaporofita ne vasimwiine vavalyi kusaka kuvona ziintu zimuvweene, mmi kana vava zivoni, ne kuzuwa ziintu zimuzuwa, mmi kana vava zizuwi. ²⁵ Muvone, chaziva womulawo wuziimeene kuti a mulyike, naati, ''Muruti, ni chite vulye kuti nive nevuhalo vusaamani?'' ²⁶ Jeeso na mucho kuti, ''Ku ng'olyetwaazi mumulawo? Wuvala vulye?'' ²⁷ Na mwiitava naati ''Wusune Simwiine Ireeza waako che inkulwaako yoonse, cho luhuho lwaako loonse, ne che ziho zaako zoonse, che italuhanyo yaako yoonse ne mwaako moona molyisuniine.'' ²⁸ Jeeso naa mucho kuti ''Wetava neenza. Wu chite vulyo, mmi kohalye.'' ²⁹ Mmi iiye, chokusaka kulyijoloza, naacho Jeeso kuti, ''Mwaangu njeeni?'' ³⁰ Jeeso na mwiitava naati, ''Unkosi wuumwi avalyi kushetumuka kwa Jerusalema na kaya kwa Jeriko. Cho kutaserwa ne vasa, vava muzwatulyi zizavalo zaakwe, ne kumukava, cho kumusiya wusaka kufwa. ³¹ Ni kwaava kuti mupirisita wumwi cho kushetumuka cheyo inzira, ngamuvona, cho kuzimbuluka. ³² Mukuswana, Mulivi naaye, ngasika hecho chivaka cho kumuvona, cho kuzumbuluka. ³³ Mmi musamaria, neena mumusipiri waakwe, chokwiiza heena. Chinga muvona, na mufwiira iinse. ³⁴ Cho kwiiza halyi naasumina ziravi zaakwe, na ziitira ioilyi ne iwaine. Na mutaantika he mberesa yaakwe, na mutwala mwi wotela, na mutokomera. ³⁵ Izuva lyichirira na hiinda denarii zovere naziha siwotera, naati, 'Mutokomere, cheeti nosinyeherwa, ha nikavoola, ka ni kuruwere.' ³⁶ Njozuhi kwaava votatwe yo zeza kuti nje mwaakwe zuna yava taserwa ne vasa?'' Naati, ³⁷ ''Ya va mufwiiri iinse.'' ³⁸ Lyinu chivaya vweenda, neenjira muwumwi muzi, mukulwakazi wumwi yo suumba Mareta, choku mutaambula munzuvo yaakwe. ³⁹ A veena mukulwe yo suumpwa Maria, ya vekalyi ha mateende a Simwiine naateka maanzi aakwe. ⁴⁰ Lyinu Mareta iiye ava patehete kuvaakanya zilyo. Neeza kwa Jeeso naati, ''Simwiine, a kovireri kuti mukulwaangu wuni siyite meemena?'' ⁴¹ Mmi Simwiine cho kumwiitava kuti, ''Mareta, Mareta, Wu virerete mane wulyi kateeza che ziintu ziingi, ⁴² mmi chiintu chimwiina cho vutokwa. Maria wa lyisalyira cho vutokwa, chiseeti ni chi hiindwa kwaalyi.