¹ Lyimwi izuva Jeeso avalyi kurapera muchivaka chimwi. Chinga mana, murutiwa waake wumwi cho ku mu mucho kuti, ''Simwiine, turute kurapera moona Johani mwaava ruti varutiwa vaakwe.'' ² Jeeso na vacho kuti, ''Hakuti murapera mucho kuti, ''Isheetu, iziina lyaako lyikutekwa cho kujolola. Musimwiine vwaako viize. ³ Wutuhe chilyo cheetu che zuva ne zuva. ⁴ Tu woondere zivi zeetu, moona mu tuwoondera voonse va tu fosekeza. Siye ku tutwaala mu mulyiko.''' ⁵ Jeeso na vacho kuti, ''Njeeni weenu yi wiina mulyikani, cho kuya kwaalyi hakati ka masiku, cho ku mucho kuti, Mulyikani, niwalyime malofu wo tatwe wo vuroto, ⁶ mulikani waangu wiina mu musipiri ndyasika, mmi kaniina chi nimuha! ⁷ Lyinu yo mwiitava mukati wuti, 'Wu siye kunikataza. Chiyazo che yalwa kaye, mmi vaana vaangu, naame, tulyere. Ka ni woolyi kuvuuka cho kukuha vuroto! ⁸ Ni milwiira kuti, ne hasaavuki kukuha vuroto mukuti wu mulyikani waakwe, mmi chevaka lyo kumushaala mumasulye naasafwi isoni, mbwaa vuuke a kuhe maroto maangi woosaka. ⁹ Ni micho kuti, kumbire, mmi ko chiheewa; sake, mmi ko chiwaane; ngongote, mmi ka wiwulyirwa. ¹⁰ Muuntu wumwi no wumwi yo kumbira wuheewa; mmi muuntu yo saka wuwana; mmi muuntu yo ngongota, wi wulyirwa. ¹¹ Njozuhi iisi mwaana mukatikeenu, mwanaako ha kumbira iinswi, wumuha iinzoka kuunde lye iiswi? ¹² Kapa ha kumbira iiyi, wu muha kavumwe? ¹³ Lyinu, chikuti wuunwe muvavilala mwiizi kuha vaana veenu iimpo zishiyeeme, Isheenu wiina kwiwulu kamizambe kukumahi kuha Luhuho Lujolola kuva mukuumbiira?''' ¹⁴ Lyinu Jeeso cho hindika idimona lye chimumu. Chinga lyaazwa idimona, mukwaame we chimumu cho kuwaamba, chinavungu cho kukomokwa. ¹⁵ Mmi vamwi vaantu cho kucho kuti, ''Cha Beelzebule, simwiine wa madimona, wuhindika madimona.'' ¹⁶ Vamwi niva mulyiki kuti achite chiswupi chizwa kwiwulu. ¹⁷ Mmi Jeeso aveezi mihupulo yaavo na vacho kuti, ''Muvuso wumwi no womwi wulyi kawuheenya wusinyeha, ne iinzuvo yilyi kauheenya iiwa. ¹⁸ Chikuti Satani wulyi kawuheenya, muvuso waakwe ka wuziime vulye? Mukuti mucho kuti ni zwiisa madimona cha Beelzebule. ¹⁹ Chikuti ni zwiisa madimona cha Beelzebule, vamisheere mwisule vaa zwiisa chaani? Chee chi, ka vave vawatulyi veenu. ²⁰ Mmi chikuti nizwwisa madimona cho munwe we Ireeza, lyooho muvuso we Ireeza chiweeza kweenu. ²¹ Hakuti mukwaame yo kolyete neena zilwiiso cholyiisa iinzuvo yaakwe, zivya zaakwe zivavalyeseha, mmi mukwaame yo kolyete ²² hamuzuunda, mukwaame yo kolyete wunyanga zilwiisiso zaakwe za sepete ne kumunyaanga zivya zaakwe. ²³ Ya sa ziimeene naame wunilwiisa, ne yasa kunganyi naame wupatalaza. ²⁴ Luhuho luvilala haluzwa kumuuntu, luhita muzivaka zizuminiine cho kusaka halwiikala. Halusa waani, luchokuti, 'Ni voola kunzuvo yaangu kunikazwa.' ²⁵ Ha luvoola, luwaana iinzuvo yi feeretwa ne kukaviswa. ²⁶ Lu voola choku kahiinda inhuho zimwi zina seveni imbilala kuluzaamba zoonse chekwiiza kwiikala mwateni. Lyinu chiziimo choozo muuntu chivihala kuzaamba kataanzi.'' ²⁷ Ni kwaati, cho waamba iizi ziintu, wumwi mukulwakazi na huwa mukati ka chinavuungu na mucho kuti, ''Mikoonde ive mwiivumi lyi vaku viikite ne veere lyi vakunyoonseki.'' ²⁸ Mmi naati, ''Kono, mikoonde njaavo vazuwa liimzwi lye Ireeza no kulyi chitahaza ²⁹ Chinavuungi chi chiwereka, Jeeso na taanga kwaamba, ''Wuulu luzuvo luzuvo luvilala. Lusaka chishupo, kakwiina chishupo cheeti ni vavone kuunze acha Jona. ³⁰ Moona Jona mwavaavi chishupo ku veena Ninive, naaye Mwaana wo Muuntu kave chishupo koolu luzuvo. ³¹ Simwiine wo Vuhaati vwa malyo kaziime cho kuwatula vakwaame ve lunu luzuvo ne kuva nyaansa, mukuti wu kazwa ku mamanimani ee nkaada ku kuzuwa maano a Solomoni, ne kuvona, wumwi mukulwaana kwa Solomoni wiina hanu. ³² Vakwaame va Ninive ka vaziime va watulye vanu vaantu vo lunu luzuvo ne kuvanyaansa, mukuti vava sukuluhi ha kuruta kwa Jona, muvone, wuumwi mukulwana kwa Jona wiina hanu. ³³ Kaakwiina, yo minika ilaambi, yo lyiwuungula kapa kulyiviika kuunsi lye chidanda, kono hewulu lye tafulye, kuti veenjira va woolye kuvona iseri. ³⁴ Liinso lyaako nje seri lyo muviri. Liinso lyaako chilyi shiyeeme, muviri woonse wizwiire iseri. Mmi chikuti lyiinso lyaako kalyishiyeeme, muviri waako wiina kafifi. ³⁵ Lyinu, wutokomere kuti iiseri lyiina kwaako kalyivi kafifi. ³⁶ Chikuti muviri waako woonse wizwiire iseri, nuuseena chimwi mwiififi, lyinu muviri waako woonse kawu swane sina iseri lye ilaambi lyiku minikira.'' ³⁷ Chingaa mana kuwaamba, mu Farasai wuumwu na mukumbira kukalya naaye kuunzuvo yaakwe, Jeesu ne injira cho kwiikala haansi. ³⁸ Mu Farasai na komokwa kuti Jeeso kanaa saamba kumaanza naa seeni kulya. ³⁹ Mmi Simwiine naa mucho kuti, ''Lyinu hanu, Wuunwe mu Mafarasai mushaanza iinkomoki ne tusuva kuunze, mmi mukati keenu mwiizwiire vusa ne vuvilala. ⁴⁰ Wuunwe vakwaame museena maano! Ya vachiti kuuze kanjeena ya vachiti mukati? ⁴¹ Muhe ziinamukati kuvahumanehi, lyiinu ziintu zoonse kazi jololye. ⁴² ''Mwiina vumayi Mafarasai, mukuti muvooza cho vwiikumi che minti ne rue ne chimwi ne chimwi zoonse zo mwiigadeni, kono mulyitokomolosa vusakusima ne irato lye Ireeza. Kushiyeeme ku chita chishiyeeme ne irato lye Ireeza, ni musaakaangwa kuchita zimwi ziintu. ⁴³ Mwiina vumayi Mafarasai, mukuti masuni zipura zokuvusi mwiikereke ne kurumereswa cho kuhiindirwa kwiihulu ne zivako zo mumisika. ⁴⁴ Mwiina vumayi, mukuti muswana siina makuumbu aseena luswayo mukuti vaantu vayeenda hewulu lyaawo ni vaseezi.'' ⁴⁵ Wuumwi yo chirokete mumulawo na mucho kuti, ''Muruti, zo waamba naaswe zitutukuka.'' ⁴⁶ Jeeso naati, ''Mwiina vumayi, muvaruti vo mulawo! Mukuti mwiihaza vaantu miziiyo wuva lyemena kukulyika, mmi ka muwoolyi kulyi kuwoonda miziyo cho minwe yeenu. ⁴⁷ Vumayi mbweenu, mukuti muzaakira vaporofita makuumbu, mmi veesikulweenu mbavavehayi. ⁴⁸ Lyinu muvashupi va muameha mumuteendo wuvee sikilweenu, mukuti vunita vava vehayi chingi muzaaka mkuumbu aavo. ⁴⁹ Cheeri ivaka, Maano ee Ireeza avaati, 'Ka nivatumine vaporofita ne vaapositila, mmi ka vava sukululye ne kwiihaya vamwi vaavo.' ⁵⁰ chikwiina vulyo, wuulu luzuvo kalu watwiirwa malaho woonse ava porofita vatiki kuzwa ku mataangiro ee inkaanda, ⁵¹ kuzwa kumalaha a Abele kuya kumalaha a Zakaria, ya vehairwa hakati ke chihalalyero ne tempere. Eeni, Ni micho kuti, wuulu luzuvo kaluvonwa mulaandu. ⁵² Mwiina vumayi vachiroki vo mulawo, mukuti muvahiindi inkiyi ya maano; mmi ni musenjiri mukati, mane mukaanisa vasaka kwiinjira.'' ⁵³ Jeeso chingaa zwaho, vang'olyi ne va Farasai cho ku mukanana ne kukanginsana che ziintu ziingi, ⁵⁴ kulyiindira kuti vamucheesa mcheeti a waambe.