¹ Ahwaahwaaho, Vaantu vaangi vaangi chivakungana kukungana mane mbwiita ni valyilyaata, na taangira kuwaamba ne varutiwa vaakwe, ''Mutokomere chiviriso cha Mafarasai, cho vuitimukanyi. ² Mm kakwiina chihumbitwa chiseeti nichi zwiisikizwa kuunze, mane kakwiina chilyiwuungwiire chiseeti ni chiiziviwa. ³ Lyinu chimwi ne chimwi cho waamba mwii fifi kachi zuwiiwa mwiseri, hape cho vasooheri mukutwi mukati keenzuvo kachizuwiike hewuulu lye inzuvo. ⁴ Ni micho kuti, vamwaangu, musiye kutiya vehaya muviri, kuzwaaho kakusiina chova woola kuchita. ⁵ Mmi kani milwiire yimuswaneere kutiya. Mutiye iiye, yoti hamana kwihaya, wiina ziho zo kuswehera milyangalyiro. Eeni, Ni michokuti, mu mutiye. ⁶ Tuhunganvula tumana iiyaanza katuwuuzwa mapene wovere? Mmi kawiina nangati kamwiina kazivalwa mumeenso e Ireeza. ⁷ Mmi mane iinsuki ziina mumitwi yeenu zivalyitwa. Musiye kutiya. Mu sepahala ahulu kuzaamba tuhunganvula tuungi. ⁸ Ni milwiira, yo ni waamba havusu vwa vaantu, Mwaana wo Muuntu naye ka muwaambe havusu vwa mang'iloyi e Ireeza, ⁹ mmi yo nilyisampula havusu vwa vaantu kaa sampulwa havusu vwa mang'iloyi e Ireeza. ¹⁰ Yo waamba lyiinzwi ivilala cho Mwaana wo Muuntu, kalyi woonderwa, mmi yo fwiiseinsoni Luhuho Lujolola, keeti na woonderwa. ¹¹ Ha va mitwaala havusuvwa masinagoge, va hitiri, ne ha va simulawo, musiye kuvirera cheeti muka waambe mu kulyizimanina, kapa cheeti muka waambe, ¹² mukuti Luhuho Lujolola kalumirute munnakozana chi mulukeere kuwaamba.'' ¹³ Wuumwi yoozwa muchinavuungu neeza kwalyi na mucho kuti, ''Muruti, lwiire mukulwangu kuti alyikauhanyeza muswa naame.'' ¹⁴ Jeeso na mucho kuti, ''Mukwaame, njeeni ya va nisalyi kuva muwatulyi kapa muzimanini waako?'' ¹⁵ Na vacho kuti, ''Mutokomere kuti mulyikawuhanya ne iinkulo inkaando, mukuti muhalo vo muuntu kavulyiviikite ha ziintu zeena naazo.'' ¹⁶ Jeeso na valyiira iingulyi, naati, ''Iiwa lyo mukwaame wo muhumi lyi vaavikite ahulu, ¹⁷ naazeza, naati, 'Muni chite vulye, mukuti kaniina chivaka cho kuviika zilyo zaangu?' ¹⁸ Naati, 'Munichite vuti, muni wiisa zishete zaangu cho kuzaaka zikaando, Cho kuviika mwateni mundalye ne zimwi zoonse zaangu. ¹⁹ Cho kucho luhuho lwaangu, ''Luhuho, wiina zivya ziingi ziviikiirwa zirimo ziingi. Huuze, lye, nywee, wu saange.''' ²⁰ Mmi Ireeza cho kumucho kuti, 'Mukwaame muholo, anu masiku luhuho lwaako luhiindwa, mmi ziintu ziwa vaakanya, mbuzive zaani?' ²¹ Mukwiina muuntu ha lyiviikira vuhumi vwwa naasa humine kwe Ireeza.'' ²² Jeeso naacho varutiwa vaakwe, ''Mmi ni milwiira, musiye kuvirera cho vuhalo vweenu, cheeti mulye; kapa muviri weenu, cheeti muzwaate. ²³ Mukuti vuhalo vuzaamba zilyo, mane muviri wuzaamba zaaparo. ²⁴ Muzeze vangwalolye, kava lyimi mane kava siinza. Kavena ziviikiro kapa zishete, mmi Ireeza wuvalyera. Wuunwe musepahala kukumahi kuzaamba zizuni! ²⁵ Njeeni kweenu yo woola kuweera nagati kakokola kuvuhalo vwaakwe? ²⁶ Chikuti ka muwoolyi kuchita kaantuzana kaniini, chiinzi ha muvireezwa zoonse? ²⁷ Muvone wuntuntungala - mwiikulyira. Kazi teendi, kapa kuhosa zaaparo. Mmi ni micho kuti, mane kulyi Solomoni mukuvereenga kwaake kanaa zwaati siina njeyimwi yaazo. ²⁸ Chikuti Ireeza wuzwaatika lyaani munkaanda, zihala suunu, mmi izoona zisoherwa mumulyiro, wuunwe ka mizwatike vulye, Wuunwe ve itumero iniini! ²⁹ Musiye kusaka cheeti mulye ne cheeti munywee, mane musiye kuvirera. ³⁰ Mukuti voonse vasazumini vasaka iizi ziintu, mmi Isheenu wiizi kuti muzisaka. ³¹ Mmi musake muvuso wo kwiiwulu, mmi zoonse ka muziwererwa. ³² Musiye kutiya, imberezana zaangu, mukuti Isheenu wulyi tumerere ku muha muvuso. ³³ Muwuuza zeenu zoonse muhe vasukulukite. Mulyichitire zikwama ziseeti nizituluke-vuhumi vo kwiiwulu vusaamani, kuseenjiri musa, kakwiina ne munaanzi wusinya. ³⁴ Mukuti vuhumi vwaako kuvwiina ne inkulo yaako nkuyiva. ³⁵ Musumine iintuunga zenu zikolye ³⁶ ne kuminika malaambi eenu, muswane siina vaantu valyiindire simwiine aavo hakuti wukavoola kumukiti we seso, kuti hasika a ngongoti, chovuheeru va muyalwiire mulyaango. ³⁷ Veena mikoonde vahikaana veeti nawaane simwiine valyiindire. Muvakusima ni micho kuti, kalyi baante mumuunda ne kuvekalyika haansi lye taafulye, mmi keeze zavahe zilyo. ³⁸ Chikuti simwiine wiiza hakati ka masiku, kapa inkuku chizilyira, chokuvawaana vamulyiindire, veena mikoonde aavo vahikaana. ³⁹ Mmi mutaluhanye kuti, siinzuvo kalyi neezi yiinako ya keeza musa, nasana ava siyi inzuvo yaakwe kuti itululwa. ⁴⁰ Naanwe mulyibaakanya, mukuti Mwaana wo Muuntu wuukeeza chenako yimusa lyiverere.'' ⁴¹ Pitorosi naati, ''Simwiine, yiyi ingulyi wi ilwiira vulyo wuuswe, kapa wumwi ne wumwi?'' ⁴² Simwiine naati, ''Njeeni muhitiri yo sepahala ne kutalyifa yeeti simwiine aakwe wumuviika hewulu lyivamwi kuti avahe zeemba zaavo che inako ishiyeeme? ⁴³ Wiina mikoonde wuuzo muhikaana yeti simwiine wumuwaana nachita vulyo. ⁴⁴ Vusakusima ni michokuti kamuviike hewulu lye ziintu zaakwe zoonse. ⁴⁵ Mmi muhikaana halyicho munkuloyaakwe, Simwiine wulyiyehete kuvoola,' chokutaanga kukava vahikaana vava kwaame ne vakulwakazi ne kulya ne kunywa cho kukolwa, ⁴⁶ simwiine woozo muhikaana keeze mwiizuva lyasa mulyindire ne munako ya seezi mmi kamukosoolyea zipisipisi ne kutwaala kuchivaka chiva seena vusakusima. ⁴⁷ Muhikaana, chiwiizi chisunitwa ne infumwe ne kusa chivaakanya ne kuchichita mukuswaneere, wumu titika che infayindi. ⁴⁸ Mmi yaseezi ne kuchita ziswaneere mulaandu, kakavwa che infayindi iinche. Mmi wumwi no wumwi yava heewa ziingi, kuvalyi kusakwa ziingi, aavo vava heewa ziingi ahulu, kakusakwa ziingi kuzaamba. ⁴⁹ Ni veeza kuku bukula mulyiro muunkaanda, muni suniine kuti kalyi chiwu lyakantika. ⁵⁰ Mmi niina ikolovezo yinisaka kukolovezwa chaayo, mane kamu Ni sasaminiinwa mbwiita chiya mana. ⁵¹ Muzeza kuti ni veeziri kulyeta kuzuwaana muunkaanda? Nee, Ni milwiira, kono ku kawuhana. ⁵² Mukuti kuzwa hanu kuya kuvusu vamana iyaanza muunzuvo vakauheene-vaantu vootatwe kava fapaane ne vaantu voovere, vaantu voovere kavafapaane ne vaantu vootatwe. ⁵³ Kava kawuhane, Iishoomuuntu wufapana ne mwaane womuswiisu ne mwaanaswiisu wufapaana neesi, nyinamuntu wufapana ne mwaane wo mukazana ne mwaanakazana wufapaane ne nyina, nyinazala muuntu wufapaana ne mukazivalaakwe ne mukazivala wufapaana ne nyinazala.'' ⁵⁴ Jeeso avalyi kucho ne chinavuungi, ''Hamuvona iikope lyizwa havwiimino, mpohonaho muchokuti, Invula ikeeza,' mmi kuchitahala. ⁵⁵ Luhuho lovuhaati vwamalyo haluhuunga, muchokuti, 'Mbuku hiisa ahulu.' mmi kuchitahala. ⁵⁶ Vaitimukanyi, mwiizi kutalusa chiziimo che inkaande ne wulu, mmi chiinzi hamusawoolyi kwiiziva kutalusa chiziimu cheyinu inako? ⁵⁷ Chiinzi hamusawoolyi kuwatula chishiyeeme muveene? ⁵⁸ Hooya havusu vomulawulyi ne yo kuzekisa, chimwiina munzira wulyike kuzumiinzana naye kuti asiye kukutwaala kumuwatulyi, ne kuti muwatulyi kaanzi akutwaalyi kumapolisa, kuti mapolisa vaswehere muntorongo. ⁵⁹ Ni michokuti, keeti nimuzwe mwateni mbwiita hakuti chimwaruwera malyi a mamanimani''