¹ Ni kwachitahala kuti mumasulye eezo Jeeso na zimbuluka mu matoropo ne mumizi cho kusiyana kwayo, na ya vuruta ne kuwaamba maanzwi malotu kaha muvuso we Ireeza. Neena ne veena 12, ² ne vakulwakazi vamwi va vahozwa kunhuho imbilala ne matuku: Maria ya valyi kusuumpwa Magadelina, ya vazwiiswa madimona eene 7; ³ Joanna, muka Chuza, muhitizi wa Heroda; Susana; ne vamwi vaangi, avo, vavalyi kuvaha zivavalyi kusaka, kuzwa mumuvalyi kweetere. ⁴ Ivaati iikunga lya vaantu chilyi kungana, vaantu ni veeza kwaalyi kuzwa mu matoropo woonse, naava lyiira iingulyi: ⁵ ''Mulyimi naya kukuvyala imbuto yaakwe. Cho vyala, yimwi cho kuwiira mumbalyi yenzira mmi niya lyaatolwa chamateende, mmi zizuni zo mwiiwulu cho kwiilya. ⁶ Yimwi niya wiira mumavwe, mmi chinga yakula, niyafwa, mukuti kana yiveena vukola. ⁷ Yimwi cho kuwiira mumiya, mmi miiya chokukula hamwiina ne mbuto mmi cho kututumina, ⁸ Mmi yimwi cho kuwiira mwiivu ilotu ni ya viika zilyo ziingi kuzaamba miyanda miingi.'' Jeesu chinga mana kuwaamba iizi ziintu, cho kukuwa naati, ''Wumwi no wumwi wiina matwi a zuwa, a zuwe.'' ⁹ Vatutiwa vaakwe cho kumuvuuza kuti iiyi ingulyi iyalusanzi. ¹⁰ Naati, ''Izivo ye zilyiwuungwiire zo vusimwiine vye Ireeza mwa vuheewa, mmi kuvamwi niwaamba che ingulyi, kuti 'kuvona keeti chiva vavona, ne kuzuwa keeti chiva zuwiseza.' ¹¹ Lyinu iiyi nje taluso ye ingulyi: Imbuto nje lyiinzwi lye Ireeza. ¹² Yiina kumbalyi lye inzira mbavana vavazuwi, mmi diavulosi chokwiiza kuhiinda lyiinzwi munkulo zaavo kuti kaanzi vazumini ne kuhazwa. ¹³ Yiina mumavwe mbaavo vati, havazuwa lyiinzwi, valyitambula cho kusaanga. Mmi kaveena mihisi; vazumina vulyo luvakazana, mmi munako ye tiko vawa. ¹⁴ Imbuto yiwiira mumiya vaantu vati havazuwa liinzwi, mmi chiva kulyiyeendera munzira zaavo, vadinkwa ne zivavirera ne vuhumi ne munyaka woovunu vuhalyo, mmi zihaantu zaavo kazikulyi. ¹⁵ Mmi imbuto yiwiira mwiivu lyishiyeeme, ava mbava vati, havazuwa liinzwi che inkulo iina vusakusima ne kushiyama, iiwoonda neeza ne kuva nezihaantu che iinkulo nde nekuzimaina ziziimo. ¹⁶ "Kakwiina yeti cho minika ilaambi cho kulyiwuumba cha kasuva kapa kulyiviika mwikoonde lye tafulye. Mmi, wulyiviika hewulu lye chizimanino chaalyo kuti wumwi no wumwi wiinjira a woolye kuvona iseri. ¹⁷ Mukuti kakwiina chiwungwiirwa chiseeti nichizivwa, kapa ikunutu yeeti nivulye kwiizivwa kapa kuzwiira mwiiseri. ¹⁸ Lyinu muteeke neenza, mukuti iiye wina, ziingi ka weerwa, mmi yaseena, kulyi chateere kuti wiina naacho kachi hiinda kwaalyi.'' ¹⁹ Lyinu vaanyina ne vaanche chokwiiza kwaalyi, mmi kana vava woolyi kuchuta kwaalyi cheevaka lye chinavuungi. ²⁰ Ava teewa kuti, "Vanyoko ne vaanche vaako vaziimene haanze, valyiindire kukuvona.'' ²¹ Mmi Jeeso navetava naati, "va mayo ne vaanche vaangu mbavana vazuwa lyiinzwi lye Ireeza ne kulyichita." ²² Lyinu lyimwi izuva cho kwiichira muvwaato ne varutiwa vaakwe, mmi navacho kuti, "Tu lutiree kwishiilya lye iziva." Ni va taanga kuzuha. ²³ Mmi chivaya vuzuha iiye cho kulala. Ihuho cho kuhuunga mwi iziva, mane vwato vwaavo chokutaanga kwiizula meezi, mmi chokuva ne muvukaavo. ²⁴ Lyinu varutiwa va Jeeso chokwiiza kwaalyi ni vamuvuusa, ni vaati, "Simwiine! twiina hafwihi no kufwa!" ²⁵ Lyinu na vacho kuti, "Itumero yeenu yiinahi?" ²⁶ Ni va zuhira ku chiraranda cha Gerasinesi, chiina kwishilyra lye iziva lyizwa kwa Galilea. ²⁷ Lyinu Jeeso chinga siika ne kulyaata haansi, na kopaniswa ne wumwi mukwaame yavalyi kukazwa kumulyeneng'i ya veena madimona. Che inako iinde nasazwati sizavalo, mane kanavalyi kwiikala munzuvo mbwiita kuma kuumbu. ²⁸ Chinga vona Jeeso, na huwa cho kuwiira havusu vwaakwe naati che lyiinzwi lyiina kwiwulu, "Wu saka kuchitanzi chaangu, Jeeso, Mwaana e Ireeza Mukaando wiina Kwiwulu? Ni kukumbira, wusiye kuni sukulula." ²⁹ Mukuti Jeeso ava lawulyi inhuho imbilala kuzwa ku mukwaame. Mukuti che inako iinde ni lumumu kataza, nangati avalyi kusuminwa che macheyini ne kwere na lyiiswa inako zoonse, ava kosolyi yicheyini zaakwe ne kutwaalwa ne madimona munkaanda. ³⁰ Lyinu Jeeso cho kumuvuuza, "Izina lyaako njeeni?" Lijiyoni, ³¹ Ni a zwiira havusu ku mukumbira kuti asiye kuahindika kuti aye mwiikomba. ³² Lyinu mutapi mukaando we ziguluve wuvalyi kulya he iruundu. Ma dimona cho kumukumbiira kuti a keenjire kuziri, cho kuzizuminina. ³³ Lyinu madimona cho kuzwa mu mukwaame ne kuya kuziguluve, mmi mutapi woonse cho kushetumukira mwiiziva cho kumina. ³⁴ Mmi vavalyiisiza ziguluve chinga va vona chachitahala, ni vang'ombola cho kukawaamba mumulyening'i ne mumizi kahateni. ³⁵ Lyinu vaantu cho kuyeenda kuka vona chachitahala, ni veeza kwa Jeeso ni vawana mukwaame ya vazwiiswa madimona. Ave keere ha mateende a Jeeso, na zweete ne kulyiingana; mmi niva tiya. ³⁶ Lyinu va vavoni cho kuwaamba chiva chitahalyihakuti mukwaame yava kweetwa madimona cho hozwa. ³⁷ Lyinu vaantu voonse ve chiraranda cha Gerasinesi cho kukumbira Jeeso kuti azwe muvalyi, mukuti vava komokwa ne kuva nelyoowa ahulu. Lyinu neechira muvwaato cho kuvoola. ³⁸ Mukwaame ya vazwiiswa madimona na mukumbiira kuti a musiye a yeende naaye, mmi Jeeso cho kumuhindika, naati, ³⁹ "Wu voolye kumuzi waako wukahe vupaki viizwiire kuti Ireeza wa kuchitiraanzi." Mukwaame cho kuyeenda inzira yaakwe, naya vuwamba mumuzi woonse Cha va muchitiri Jeeso. ⁴⁰ Lyinu Jeeso chinga voola, chinavuungi cho kumutaambula, mukuti voonse vava mulyiindire. ⁴¹ Muvone, mukwame yo sumpwa Jairasi, ya valyi wumwi wa vahitizi ve sinsgoge, neeza cho kuwiira ha mateende a Jeeso, na mukumbira kuya kunzuvo yakwe, ⁴² mukuti mwaane yeyena wo mukazana, mukazana wezirimo zihanerera kuva iikumi ne minwe yovere, avalyi kufwa. Jeeso chosina munzira, vuungi vwa vaantu niva mukakatiza ni va muzimbulukite. ⁴³ A hwaho kuveena mukulwakazi ya valyi kuzwiiza malaha zirimo zina ikumi ne minwe yovere nikuseena yo woola kumusirika. ⁴⁴ Neeza kumasulye a Jeeso na woonda munkundo we ijansi lyaakwe, mpohonaaho malaha aakwe chokuziima. ⁴⁵ Jeeso cho kuti, "Njeeni wuuzu waniwoonda?" ⁴⁶ Mmi Jeeso naati, "Kwiina wa niwoonda, mukuti nazuwa ziho nizizwa kwaangu." ⁴⁷ Mmi mukulwakazi chinga vona kuti kakwiina mweeti a lyiwuungulye, neeza naya vuchachalyika na wiira havusu vwaakwe. Havusu vwa vaantu voonse nalyiwaamba mwa vamuhoonderi ne mwaava holyeri ahwaahwaaho. ⁴⁸ Lyinu na mucho kuti, "Mwaanangu, itumero yaako chiyakuhoza. Yeende che ikozo." ⁴⁹ Chisikweete kuwamba, wumwi cho kukazwa kunzuvo yo muhitizi we chinagoge, naati, "Mwaana aako chafwa. Wu siye kukataza muruti lyinu." ⁵⁰ Mmi Jeeso chinga zuwa vulyo, ne tava Jairasi, "Wusiye kutiya; wuzumine vulyo, mmi mbwaa holye." ⁵¹ Chinga sika kunzuvo, na viinda kuti kakwiina winjira naaye, mbiita Pitorosi ne Johani ne Jakobo, ne veesi muhwiire ne vanyina. ⁵² Lyinu voonse vavalyi kumulyirira ne kuvokolola, mmi naati, "Musiye kulyira; kafwiire mmi wulyeere." ⁵³ Mmi nivataanga ku museka, chokwiiziva kuti wufwiire ⁵⁴ Mmi na muwoonda kwiiyaanza namusumpa, naati, "Muhwiire, vuke!" ⁵⁵ Luhuho lwaakwe choku voola, navuuka cho vuhweeru. Na vacho kuti vamuhe chimwialye. ⁵⁶ Vazaazi vaakwe niva komokwa, mmi na vacho kuti kaanzi valwiiri muuntu cha chitahala.