¹ Jeeso chinga mana chimwi ne chimwi na wamba vaantu ni va mutekete, cho kwiinjira mwa Kaperanaumi. ² Mulawulyi mukulwaana wa masolye a veena muhiikaana yava sepete ahulu naaye, avalyi kulwaala mwaveena hafwihi no kufwa. ³ Mulawulyi mukulwaana wa masolye naazuwa kaha Jeeso, na mutumina vakulwaana va Majuta, kuka mukumbira kuti eeze zahoza muhikaana aakwe. ⁴ Chinga vakasika kwa Jeeso, ni vamuvuuza cho vusakusima, nivaati, ''Wulyiikeene kuti wumuchitire yichi, ⁵ mukuti wusuni vaantu veetu, mane njeye yava tuzakiri chisinagogi .'' ⁶ Lyinu Jeeso cho kuzwiira hafusu naavo. Mmi naseenikuva kulye ne inzuvo, mulawulyi wa masole na tuma valyikani vaakwe kukamucho kuti, ''Simwiine, wusiye kulyikataza, mukuti ka niyerere kuti wuuwe winjire muchituwa che inzuvo yaangu. ⁷ Cheeri ivaka kani livoni haniswanere kwiiza kwaako, mmi wuwaambe vulyo liinzwi muhikaana wangu mbwaholye. ⁸ Mukuti Naame ni muuntu ni lawulwa ne vamwi, masolye eena kuunsi lyaangu. Ni cho wuuzu, 'Yeende,' ne kuwumwi, 'Wiize,' mmi wiiza, ne kumuhiikaana wangu, ' Chite vuti,' wu chichita.'' ⁹ Jeeso chinga zuwa bulyo, na mukomokwa, cho kuzokolokokera kuchinavuungi chi vamusheere mwiisulye naati, ''Ni milwiira, mane nangati mwa Isiraele kana nivavoni itumero iswana neyi. ¹⁰ Vava tuminwa chivavoola kunzuvo vava wani muhikaana nashiyeeme. ¹¹ Mumasulye eezi, Jeeso naya kwitoropo isuumpwa Naini, varutiwa vaakwe ne chinavuungi ni vayeenda naaye. ¹² Cho sika hafwihi ne mulyaango we toropo, muvone, kuvalyi kwizwiiswa mukwaame wa fwa, yeyena mwaana wuvanyina nalyi muswiisu (vavalyi mufwiirwa), a veena ne vaantu vaangi vazwa mwitoropo. ¹³ Simwiine chinga muvona, na mufwwiire ahulu iinse mmi namucho kuti, ''Wusiye kulyira.'' ¹⁴ Na yeenda choku woonda luvalo lwe chisamu ha vava hindire muviri waakwe, vava munyemwiine cho kuzima. Naati, ''Mulombwaana, Ni kucho kuti, vuuke.'' ¹⁵ Mufu cho kwiikala tataanga kuwaamba, Jeeso cho kumuha nyina. ¹⁶ Ni veezirwa lyoowa voonse, mmi ni vazwiira havusu kuteemba Ireeza, nivati, ''Muporofita mukaando cha vuswa mukatikeetu'' mmi ''Ireeza na lola vaantu vaakwe.'' ¹⁷ Aa makande kaha Jeeso cho kwiizulankana mwa Judea yoonse ne minzi yoonse ivambeene nayo. ¹⁸ Varutiwa va Johani vava mulwiiri kaheezi ziintu zoonse. Lyinu Johani cho kusuumpa varutiwa vaakwe vovere ¹⁹ na vatuma kwa Simwiine kuti vakati, ''Aa njowe yo lukeere kwiiza, kapa to lyindire wumwi?'' ²⁰ Chinga va chuuta hafwihi ne Jeeso, vakwaame cho kucho kuti, ''Johani mukolovezi wa katutuma kwaako kuti, 'Aa njowe yo keeza kapa tu lyindire wumwi?'' ²¹ Mweeyo innako ava hoza vaantu vaangi mumatuku ne masukuluka ne inhuho imbilala, ne vaantu vaangi vava voni. ²² Jeeso na vetava naati, ''Hakuti chimu voola munzira zeenu, muka lwiire Johani chimwa vona ne chimwa zuwa. Vahofu vakweete va vona, veena vuholye chiva yeenda, ve chiseenda vakweete kujolozwa, vashushu va zuwa, vaantu vafwiire vakweete kuvuuswa, ne vahumanehi vakweete kulwiirwa maanzwi malotu. ²³ Muuntu ya sa zimiki kuzumina kwaangu chevaka lye zichintaantu zaangu wiina mikoonde.'' ²⁴ Varutiwa va Johani chiva yeenda, Jeeso chokutaanga lwiira chinavuungi kaha Johani, ''Muvayi kuka voona nzi mukati ko muzuka? A luhe lunyungooswa luhuho? ²⁵ Mmi muvalyi kweenda kukuvona nzi? Mukwaame yo zweeti zizavalo zihuvahuva? Muvone, vazwata zizazvalo zamalyi ne kwiikala mu mazuvo sakata veena mumazuvo ava simwiine. ²⁶ Mmi muva yendere kukuvona nzi? Muporofita? Eeni, Ni micho kuti, mane kuzaamba muporofita. ²⁷ Wuuzu njeye ku ng'olyetwa chaakwe, 'Vone, Ni tumina mutumwa waangu havusu vwaako, yeeti na vakanya inzira havusu vwaako.' ²⁸ Ni micho kuti, kuvoonse vava puluhwa ne mukulwakazi kaakwiina mukulwaana kwa Johani. Mmi yoolyi muhwiire mu muvuso we Ireeza njo mukulwaana kwaalyi.'' ²⁹ (Vanntu voonse chinga vazuwa iinchi, koonse ne vateresi, ni vawaamba kuti Ireeza wushiyeme mukuti vava kolovezwa che kolovezo ya Johani. ³⁰ Mmi va Farasai ne vachiroki vo mulawo niva kaana kutambula maikaerero e Ireeza, mukuti kana vava kolovezwa ne Johani) ³¹ ''Nechi, lyinu, chini woolya kuswanisa vaantu voluluzuvo? Vaswana nechi? ³² Va swana ne vahwiire vazanina hamusika, veekala cho kulyisuumpa nivati, ''Twa milyizikiza kang'ombe, mmi kana mwa zaana. Twa mizimbira luziimbo lwa mafu, mmi kana mwa lyira.' ³³ Mukuti Johani wo Mukolovezi aveeza na salyi inkoko ne kunywa iwayini, mmi ni mwaati, ''Wiina idimona.' ³⁴ Mwaana wo muuntu aveeza naalya ne nanywa, mmi mucho kuti, 'Muvone, mukwaame we indiisisa mane chidakwa, mulyikani wa vateresi ne valewuhi! ³⁵ Mmi maano a voneka mu vaana vaakwe voonse.'' ³⁶ Lyinu wumwi wa va Farasai na suumpa Jeeso kuti a kalye naaye. Lyinu Jeeso chinge njira munzuvo yomu Farasai, ne kala haansi lye tafulye cho lya. ³⁷ Muvone, Kuveena mukulwakazi wo mulewuhi mu mulyeneng'i. Chinga waana kuti wiikeere haansi lye itafulye munzuvo yo mu Farasai, na lyeeta ivootoro lya mafuta a nuunka munati. ³⁸ Cho ziima hamasulye aakwe kumbalyi a mateende aakwe, nalyira, navombesa mateende aakwe che ziinsoozi zaakwe, na a siinda che insuki zaakwe cho ku muxoota ne kuasiinga mafuta a nuuka vulotu. ³⁹ Mu Farasai ya va sumpite Jeeso chinga vona iichi, na zeza munkulo yaakwe, naati, ''Kalyi wuuzu mukwame muporofita, lyinu neeziva kuti wuuzu mukulwakazi yo kweete ku muwoonda njeeni mane wiina vulye, kuti mulewuhi. ⁴⁰ Jeeso cho kwiitava naati, "Simoni, Niina chimwi chinisaka kuku lwiira.'' ⁴¹ Jeeso cho kucho kuti, ''Wumwi muuntu a valyi kukorotwa vaantu vovere. Wumwi a valyi kukorota miyanda yimana iyaanza ya madinari, wumwi makumi amana iyaanza. ⁴² Chinga vakaangwa ku muruwera, cho kuva woondera voonse. Lyinu, njozwihi muvalyi yeeti cho musuna ahulu?'' ⁴³ Simoni namwitava naati, ''Nisepa iiye yava wonderwa chikaando.'' ⁴⁴ Jeeso cho kuzokolokera ku mukulwakazi na cho Simoni, ''Wu vweene wuuzu mukulwakazi. Ne njira munzuva yaako. Kana wa niha meenzi a mateende aangu, mmi iiye wa vombesa mateende aangu che zinsoozi zaakwe ne ku azumisa che insuki zaakwe. ⁴⁵ Kana wa nixoota, mmi kuzwa che inako yinaa sika chaayo kana a ziimika kuxoota mateende aangu. ⁴⁶ Kana wa nisiinga mafuta mu mutwi, mmi iiye wasiinga mateende aangu cha mafuta a nuunka munati. ⁴⁷ Cheeri ivaka ni kucho kuti, zivi zaakwe, zivalyi ziingi, chiza wonderwa- mukuti wa nisuna ahulu. Mmi iiye yo wonderwa kaniini, wusuna kaniini.'' ⁴⁸ Mmi na mucho kuti, ''Zivi zaako chiza wonderwa.'' ⁴⁹ Va valyi kulya naaye cho kutaanga ku lyivuuza, ''Wuuzu njeeni yowoola kuwoondera zivi? ⁵⁰ Lyinu Jeeso cho kucho mukulwakazi, ''Yitumero yaako chiya kuhaza. Yeende che chishemo.''