¹ Lwe Isavata lyimwi Jeeso a valyi kuhita mu mawa eena zilyo, mmi varutiwa vaakwe vava choolyi zikunku zo mundalye, cho kuzivukusa, cho kulya muheke. ² Mmi vamwi va Mafarasai chokuti, ''Chiinzi ha muchita chiintu chi sa lukeere kuchitwa lwe iizuva lye Insavata?'' ³ Cho vetava, Jeeso naati, ''Kana muva valyi chava chiti Dafita ha va fwiire inzala, iiye ne vakwaame va vena naavo? ⁴ Ne njira munzuvo ye Ireeza cho kukhiinda vuroto a viikirwa Ireeza naalya vumwi, chokuha vakwaame va veena naavo kuti valye, nangati vu vazuminiinwa vulyo kulyiiwa ne mapirisiti.'' ⁵ Mmi naa vacho kuti, ''Mwana wo Muuntu Simwiine ne lwe Insavata.'' ⁶ Ni kwachitahala kuti yimwi Insavata ne injira mu sinagoge na ruta vaantu. Ni mwiina mukwaame ya va zuminiine yiyaanza. ⁷ Vang'olyi ne Mafarasai vava mulolyerere kuvona kuti kapa mbwaa hoza wumwi muuntu lwe Insavata, kuti va vone ivaka lyo ku muvona mulaandu. ⁸ Mmi a veezi chiva zezete mmi naacho wuuzo mukwaame yo zuminiine iyaanza, ''Katuke wu ziime hakati kuti wumwi ne wumwi a kuvone. ''Mmi mukwaame cho kukatuka naziima hateni. ⁹ Jeeso na vati, ''Ni mivuuza, a kushiyeeme kuti lwe Insavata kuchita vulotu kapa kuholofaza, kuhaza vuhalo kapa ku vusinya?'' ¹⁰ Mmi na valola mumeenso voonse voonse naacho mukwaame kuti, ''Woololye yiyaanza lyaako.'' Na chita vulyo, yiyaanza lyaakwe cho kuhola. ¹¹ Ni vaveenga maashe, ne kukandekinsana kuti Jeeso mbuva muchite vulye. ¹² Mwaawo mazuva natantukira kwiirundu ku kurapera. Na zwiira havusu masiku woonse na rapera Ireeza. ¹³ Inako yo musihalyi cho kusuumpa varutiwa vaakwe, na salya veena iikumi no vovere, cho kuvasuumpa vaapositola. ¹⁴ Mazina ava apositola avalyi Simono (ya vasumpi Pitorosi) ne mwaanche Andiria, Jakobo, Johani, Filipo, Batolonomia, ¹⁵ Mateu, Tuumasi, Jakobo mwaana Alufeyasi, Simoni ya valyi kusuumpwa Zealoti, ¹⁶ Jutasi mwana a Jakobo, ne Jutasi Isikariyota, ya vavi muveteki. ¹⁷ Jeeso cho kushetumuka naavo he iruundu na ziima kuvambana ne chinavuungi cha varutiwa vaakwe ne chinavuungu cha vaantu vazwa kwa Jutia ne Jerusalema ne kungolo ye wate lya Tire ne Sidoni. ¹⁸ Va veeza kuku muteeka ne kuhozwa matuuku aavo. Vaantu vava sukulwiirwa ne inhuho imbilala naavo vava hozwa. ¹⁹ Wumwi ne wumwi ya veena muvuungi avalyi kusaka kumuwoonda mukuti a veena ziho zo kuhoza, mmi na va hoza voonse. ²⁰ Na lola varutiwa vaakwe naati, ''Mikoonde njeenu muhumanehete, mukuti cheenu muvuso we Ireeza. ²¹ Mikoonde injeenu mufwiire inzala hanu, mukuti ka mwiikute. Mikoonde injeenu mulyira mukuti ka museke. ²² Mikoonde injeenu vaantu chi vamitoyete, chiva misalulula ne kumituka ne ku kaana mazina eenu kuti kashiyeeme, che ivaka lyo Mwaana wo Muuntu. ²³ Musaange mwelyo izuva, mukuti kamuwaane iimpo iinkaando kwiwulu, mukuti ne vesukulwaavo mu vava nyadiseza va porofita. ²⁴ Mmi vumayi mbweenu vahumi, mukuti chi muvawaani kalye kutontozwa. ²⁵ Vumayi mbweenu mwiikusi hanu, mukuti ka mufwe inzala. Vumayi mbweenu museka hanu, mukuti ka muzunguvalyirwa ne kulyira ²⁶ Vumayi mbweenu vaantu muvoonse chi vamiwaamba vuloti, mukuti vesukulweenu mu vavalyi kuchita va porofita va mapa. ²⁷ ''Mmi ni milwiira wuunwe mutekete, musune zira zeenu mane muchite neenza va mitpyete. ²⁸ Musewuhaza va mikuta mmi muraperere va misukulula. ²⁹ Yo kuwopa he tama muhe lyimwi nalyo. Muuntu ha hiinda iijansi lyaako, wusiye ku kaana ne chaparo chimwi. ³⁰ Wuhe wumwi ne wumwi yo ku kumbira. Chikuti muuntu haahinda chiuuntu chaako, wusiye kumuchokuti a chikuvozekeza. ³¹ Moona mo sakira kuti vaantu va kuchitire, naawe wu chite cho kuswana. ³² Chikuti wusuni vulyo vaantu va kusuni, wu volyerwanzi? Mukuti kulyi valewuhi naavo vasuni va vasuni. ³³ Choochita vuloti kuvaantu va kuchita vulotu, wuvolyerwanzi? Mukuti kulyi valewuhi mu vachita. ³⁴ Cho korotisa vulyo vanntu vo vona kuti vawoola kuku ruwera, wu volyerwanzi? Mukuti kulyi valewuhi vakorosita valuwuhi kuninaavo, kuvolyerwa malyi a swana. ³⁵ Mmi musune zira zeenu mane muvachite neenza. Walyime, nosasaki kuvoolyerwa chimwi, mmi ka muvolyerwa kukaando, mane kamuve vaana va Simwiine wiina Kwiwulu, mukuti iiye ku shiyeeme kuvasalyitumeri mane ne vaantu va vilala. ³⁶ Muve neense, moona Isheenu mweena iinse. ³⁷ Musiye kuwatula, naanwe keeti ni muwatulwa. Musiye kunyaansa, naanwe keeti ni munyaanswa. Muwoondere vamwi, kuti naanwe ni muwoonderwa. ³⁸ Muwave, naanwe ka muheewa. Chilyikanyo chiingi-hachiweerwa, hazikopanywa ziyuvuntika- chokwiitikira hazivero zaako. Chirikanyo cho teendesa, ncheeti nichiteendeswa kwaako.'' ³⁹ Lyinu na valwiira ingulyi, ''Aa muuntu ya sa voni wu woola kuhitira muhofu kuninaakwe? Chikuti wuwoola, voonse va woola kuwiira mwiikoomba, aa keeti? ⁴⁰ Murutiwa ka kulyiri muruti waakwe, mmi wumwi ne wuumwi harutwa wuswana ne muruti waakwe. ⁴¹ Wu lolyeranzi kaani keena mulyiinso lyamwaako, mmi kolyemuhi chisamu chiina muliinso lyaako? ⁴² Wuuteeranzi mwaako, 'Mukwaangu, mme nikuzwiiza kaani keena mulyiinso lyaako,' mmi wuuwe nosa lemuhi chikuni chiina mulyiinso lyaako? Wuuwe muitimukanye! taange taanzi wuzwiise chikuni chiina mulyiinso lyaako, lyuni ndyeti wuvone siinte kaani keena mulyiinso lyamwaako. ⁴³ Kawiina chisamu chilotu chiviika zihaantu zivolyete, kapa chisamu chivolyete chiviika zihaantu zilotu. ⁴⁴ Chisamu chimwinechiwi chiizivwa chezihaantu zaacho. Vaantu kava cheri ifeige kuchisamu chemiiya, kapa kuchera magirepi kuchivuna chiina miiya. ⁴⁵ Muuntu yo shiyeeme sinkulo ishiyeeme wuuchita zishiyeeme, mmi muuntu muvilala sinkulo imbilala wuchita ziintu zivilala. Mukuti chiizwiire munkulo yo muuntu chaawaamba chakaholo kaakwa. ⁴⁶ ''Chiinzi ha munisuumpa, 'Simwiine, Simwiine, mmi ni musa chiti ziintu zini milwiira? ⁴⁷ Muuntu wumwi ne wumwi wiiza kwaangu ne kuzuwa maanzi aangu ne kuechirira, mbuni milwiire kuti wiinavulye. ⁴⁸ Wuswana ne mukwaame yo zaaka inzuvo, yoosa lukwiimba hewuulu lye iivwe likolyete. Mendayi heeza, masuunda nehaakava henzuvo keeti chiinyunguntika, mukuti yiiva zaakwa neenza. ⁴⁹ Mmi muuntu yozuwa maanzwi aangu nasa echirirk, wuswana ne muuntu yo zaaka iinzuvo hewulu lyeevu ni kuseena lukwiimba. Mmi haikavwa masuunda ameenzi, mpohonaaho yiwa, mmi kisinyeha kwaayo kukulu.''