¹ Ni kwaati vaantu chi vasikungeene ha Jeeso ni vatekete liinzwi lye Ireeza, na ziimeene he ziva lya Genesareta. ² Na vona maato wovere na siikite he rizo lye ziva. Vayaambi ni suukite mu maato ni vashaanza tunyandi twaavo. ³ Jeeso ne chira muvumwi vwaato, vwa Simoni na mucho kuti a fweekulye vwato chivakazana kuzwa herizo. Mmi ne kala haansi kuruta vaantu veena kuunze lyo vwaato. ⁴ Chingamana kuwaamba, nacho Simoni, ''Siikulye vwaato wuvutwaalye hengala mmi mushwehere tunyandi muyaambe.'' ⁵ Simoni ne tava naati, ''Simwiine, twa teenda masiku woonse mi kakwiina chitwa woonda, mmi che lyiinzwi lyaako muni swehere tunyandi.'' ⁶ Chingavachita vulyo, ni vacheesa iinswi ziingi, mane tunyandi chituvalyi kuhaluka. ⁷ Lyinu chusuumpa vamwaavo vaveena muvumwi vwaato kuti veeze ze vavatusa. Ni veeza kwiizuza maato woonse, mane chi vavalyi kwiitikira. ⁸ Simoni Pitorosi, chinga vone iichi, choku lyiwisikiza ha mazwi a Jeeso, naati, ''Wu zwe kwaangu, mukuti ni mukwaame wiina chivi, Simwiine.'' ⁹ Iiye ne voonse vaveena naavo vava komokerwa iinswi zi vava woondi. ¹⁰ Hape kuveena Jakobo ne Johani, vaana va Zebedia, vavalyi valyikani va Simoni. ¹¹ Chinga valyeta maato aavo herizo, chokusiya chimwi ne chimwi cho ku mwiichirira. ¹² Kuvati chiwiina mu mulyeneng'i wuumwi, kuvena ne mukwaame we mbingwa. Chingaa vona Jeeso, na wiira mateende aakwe chovusu na murapera , naati, ''Simwiine, chosuni, wu woola ku ni joloza.'' ¹³ Mmi Jeeso cho kuwolola iyaaza lyaakwe, naati, '' Ni saka. Wu jololye.'' Cho vuhweeru iimbingwa cho kumana. ¹⁴ Na mulayerera kuti kaanzi a lwiiri muuntu mmi na mucho kuti, ''Lyi yendere, mmi wukalyi toondeza ku mupirisiti kuti akuhe chitavero cho kujolozwa, kuya kaha mwa va lawiiri Mushe, kuva vupaki kkuvalyi'' ¹⁵ Mmi iinkuwa yakwe ni ya hasana muzivaka zo kulyere, mmi vaantu cho vuungi niva kungana kwiiza kuzuwa cho ruta ne kwiiza kusirikwa matuku aavo. ¹⁶ Mmi innako zoonse a valyi kulyikungula ne kuya muunkaanda ku kurapera. ¹⁷ Ku vaavi kuti lyimwi izuva cho ruta, Vafarasai ne varuti vo mulawo vave keere hateni va valyi kuzwa mumizi yoonse ya Galilea ne Juda ne vazwa kwa Jerusalema. Ziho za Simwiine zo kuhoza ziveena naaye. ¹⁸ Vamwi vakwaame cho kwiiza ni va kulyikite mukwaame yo zuminine muviri, ni vasaka iinzira kuti vamususikiza mukati cho kumuviika havusu vwa Jeeso. ¹⁹ Kana vava vweene iinzira yo ku mwinjirika mukati mukuti vaantu va valyi vaangi, lyinu ni vaya kuchituwa che inzuvo ni va zwiisa matiyilyi cho kumu shetumwiina, neena havulo vwaakwe, mukati ka vaantu, heene ha vusu vwa Jeeso. ²⁰ Chinga vona itumero yaavo, Jeso naati, ''Mukwaame, zivi zaako chiwaziwoonderwa.'' ²¹ Va ng'olyi vo mulawo ne va Farasai ni vatanga kulyivuuza, nivati, ''Njeyeni wuuzu yo waamba kanyanso? Wo woola kuwoondera zivi kuunda Ireeza yeyena?'' ²² Mmi Jeeso, ngeziva zivava zezete, na vetava naati, ''Chiinzi ha mulyivuuza iizi munkulo zeenu? ²³ Chihuva ku kuwaamba nchechihi? 'Zivi zaako chiwazi woonderwa' kapa kucho kuti 'Ziime wu yeende'? ²⁴ Mmi mwiizive kuti mwaana wo Muuntu wiina ziho zo kuwoondera zivi,''- nacho mukwaame yo zuminiine muviri-''Ni kulwiira kuti, ziime, hiinde bulyo vwaako wuye kunzuvo yaako.'' ²⁵ Mpohonaho cho kuzima muvusu vwaavo na kutola vulo vwa valyere havulyi. Chokuya kunzuvo yaakwe, na teeba Ireeza. ²⁶ Wumwi ne wumwi ava komokwa mane niva teemba Ireeza. Ni venjirwa lyoowa, nivaati, ''Twavona ziintu zikomosa ahulu suunu.'' ²⁷ Yiizi ziintu chinga zachitahala, Jeeso cho kuzwa hateni na vona muteresi yo suumpwa Livi neen mwitente ya vateresi. Na mucho kuti, ''Ni chirire.'' ²⁸ Livi cho kukatuka na mwiichirira, nasiya chimwi ne chimwi kwiisulye. ²⁹ Livi cho kuchitira Jeeso mukiti mukaando munzuvo yaakwe. Kuveena vaterisi vaangi ne vaantu vamwi va valyi kulya he tafulye naaye. ³⁰ Mmi Vafarasai ne vang'olyi vaavo vavalyi kutoongoka ku varutiwa vaakwe, nivati, ''Chiinsi ha mulya ne vaterisi ne vachita zivi?'' ³¹ Jeeso nee tava, ''Vaantu va lwaala kava saki ing'anga; mba valwaala vulyo. ³² Kana niveeza kuku saka vashiyeeme, kono kuti vachita zivi kuti valyi kwataye. ³³ Ni vacho kuti, ''Va rutiwa va Johani vavalyi kulyinyima zilyo ne kurapera, ne varutiwa va Mafarasai va valyi kuchita chiswana. Kono varutiwa vaako valya mane vanywa.'' ³⁴ Jeeso na vacho kuti, ''Kana kwiina yeeti cho viinda valyikani va yosesa kulya zilyo iiye yo sesa nasiina naavo? ³⁵ Mmi izuva lyikeeza lyeeti na hiindwa yo sesa mukati kaavo, lyinu mwaawo mazuva kava linyime zilyo.'' ³⁶ Lyinu Jeeso naye na valwiira iingulyi. ''Ka kwiina yo halula chijira chihya cho kuchilukira ha chizavalo chikululu. Mmi hachita vulyo, ka halulye chizavalo chihya, mmi chibalyi che chijira che chaaparo chihya keeti chi chiyerere ha chaaparo chikulukulu. ³⁷ Ka kwiina yo viika iwayini inhya muziikotana zikulukulu. Ha chita vulyo, iwayini inhya ipatulye zikavi, mmi iwayini iitika, ³⁸ mmi zikotana ze wayini zisinyeha. Mmi iwayini iinhya ilukeere kuviikwa mu mikotana ya makavi mihya. ³⁹ Ka kwiina yoti hanywa iwayini inkulukulu cho saka iinhya, mukuti wuti, 'yakalye yiina vutuka.''