¹ Lyinu Jeeso, chingezula Luhuho Lujolola, cho kuzwa ku Lwiizi lwa Jorodani na hitiirwa ne Luhuho kuya muunkaanda, ² kwa va lyikwa mazuva eena makumi woonne ne diavulosi. Ka kwiina cha valyi kulya mwaawo mazuva, mmi mamanimani na woondwa inzala. ³ Diavulosi na mucho kuti, ''Chikuti womwaana e Ireeza, lawulye aa mave ave vuroto.'' ⁴ Jeeso na mwiitava, ''Kung'olyetwa, 'Muuntu kahalyi cho vuroto vovona.''' ⁵ Lyinu diavulosi na twaala Jeeso hewulu na mutondeza muvuso woonse we inkaanda munakozana. ⁶ Lyinu diavulosi namucho kuti, ''Munikuhe muvuso woonse ne kuverenga kwateni koonse, mukuti niva ziheewa, mane niwoola kuziha woomwi ne woomwi yi Ni saka. ⁷ Lyinu hanu, haiva no sungama cho ku nifukamina, kazive zaako.'' ⁸ Mmi Jeeso ne tava namucho kuti, ''Ku ng'olyetwa, 'Ko fukamine Simwiine Ireeza waako, mmi kotendere yiiye vulyo.''' ⁹ Lyinu diavulosi na twaala Jeeso kwa Jerusalema na mutantika he wulu lyo muzaako we tempere kwiwulu ahuluhulu, na mucho kuti, ''Chikuti wumwaana we Ireeza, lyiziindire hanu haansi. ¹⁰ Mukuti kung'olyetwa, 'Ka lawulye mang'iloi aakwe chaako, ku kusirereza,' ¹¹ mmi, 'Kava kunyemune mu maanza aavo, kuti kaanzi wugunki iiteende lyako heevwe.''' ¹² Choo mwiitava, Jeeso avati, ''Kuvatewa kuti, ' Wuusiye kulyika Simwiine Ireeza aako mwitiko.''' ¹³ Lyinu diavulosi chingaamana kulyika Jeeso, na yeenda na musiya mbiita inako yimwi. ¹⁴ Lyinu Jeeso cho kuvoolyera kwa Galileya che ziho zo Luhuho, mmi makande chaalyi naa hasana zivaka zoonse ze chiraranda. ¹⁵ Mmi na taanga ku ruta mu masinagoge mmi voonse ni va muteemba. ¹⁶ Neeza mwa Nazareta, mwaava kulyiri, mmi, mukuti avalyi itwayero yaakwe, ne njira mwi sinagogi lwe Insavata na ziima na valyira kwiiwulu. ¹⁷ Na heewa iivuka yo muporofita Isaya. Na wuumbula iivuka mmi nawana ha va ng'olyetwa, ¹⁸ ''Luhuho lwe Ireeza lwiina naame, mukuti a va nisingi iolyi kuti ni waambe maanzwi malotu ku vavotana. Ava ni tumi kuti niize ni waambe itukuluho ku vawoondetwa ne kwiiwula meenso avahofu, kuhulula vana vasumiina, ¹⁹ ku waamba che chirimo cha Simwiine cho kuzuwiirwa vutuku.'' ²⁰ Lyinu cho kuvuunga ivuuka, cho kwiivozekeza vayitokomera. Voonse va veena mwii sinagoge niva mutwa meenso. ²¹ Na tannga kuva lwiira, '' Suunu iilyi ing'olo lyezuzirikizwa mumatwi eenu.'' ²² Wumwi no wumwi ya veena hateni ava waambi vulotu chaakwe ni vakomoketwa ku maanzwi malotu azwa mukaholo kaakwe, mmi niva vuuza, ''Kana wuuzu kaheena iiye mwana wa Josefa?''' ²³ Na vacho kuti, Vusakusima mbu muwaambe iiyi ngulyi kwaangu, 'Ing'aanga, lyisirike. Chimwi ne chimwi chi tuvazuwi mwa Kaperanaumi, muchite chiswana mumuzi weenu.''' ²⁴ Mmi naati, ''Vusakusima ni micho kuti, kakwiina muporofita yo tambulwa mu muzi waakwe. ²⁵ Mmi vuniti nkokuti kuveena vazike vaangi munnako ya Elija, iiwulu halyive yeerwa zirimo zotatwe ne miyezi imana iiyaanza ne kamwiina mmi iinzala iinkaando niya wuumba inkaanda yoonse. ²⁶ Mmi Elija kakwiina kuyava tuminwa, mbwiita kwa Zarefita mwa Sidoni, ku muzike wikala mwateni. ²⁷ Kuveena vaangi veimbingwa mwa Isiraere munnako ya Elisha wo muporofita, mmi kakwiina ne wuumwiina waavo ya vajolozwa kuunda a Naamani wo Mu-Siriya.'' ²⁸ Vanntu voonse mwi sinagogi vava veengi ahulu chinga vazuwa iiizi ziintu. ²⁹ Ni va ziima, ni vamuhindika mwi toropo, ni va mutwaala hewulu lye iruundu ha uvazakitwa muzi waavo, kuti va muziindire kuunsi lye iruundu. ³⁰ Mmi cho kuhita mukati kaavo cho kuya kuchiingi chivaka. ³¹ Lyinu na shetumukira kwa Kaperanaumi, mulyeneng'i wiina mwa Galileya, na tanga kuva ruta kaha Insavata. ³² Vava komokwa kaha kuruta kwaakwe, mukuti a valyi kuwaamba che ziho. ³³ Mmi mwi sinagoge kuveena mukwame ya veena luhuho lusashiyeeme lwa madimona, na huwa che lyiinzwi liina kwiwulu, ³⁴ ''Aa! Tuchiteenzi chaako, Jeeso wa Nazareta? A weeza kuku tu sinya? Niizi kuti njoowe iini-yo Jolola we Ireeza!'' ³⁵ Jeeso cho kukalyimera madimona, naati, ''Kanzi wu waambi! Wuuzwe mwaalyi!'' Idimona chinga lya muswehera haansi mukati kaavo, ni lyaazwa mwaalyi, mmi kana lyi va muholofaza hape. ³⁶ Vaantu voonse vava komokwa, mmi nivazwiira havusu ni vawambinsana chateni. Ni vaati, ''Maanzi ahi eena vuti? Wu kalyimera luhuho luvilala cha maziimo ne ziho mmi zizwa.'' ³⁷ Lyinu makande ne chaakwe ni ahasana muzivaka zoonse zina mweecho chiraranda. ³⁸ Lyinu Jeeso cho kuzwa mwi sinagoge ne njira munzuvo ya Simoni. Vanyinazala vava kweetwa ifiiva inkalyi, mi ni vamukumbirira. ³⁹ Cho kuziima hembalyi aakwe cho kukalyimera ifiiva, mmi ni ya zwa. Cho vuhwehweru cho ku vuuka ne ku vaha zilyo. ⁴⁰ Izuva chilyimina, vaantu cho kulyeti kwa Jeeso vaantu voonse va matuku ashirene kuti eeza a vahoza. Na vaviika wuumwi no wuumwi maanza na vahoza. ⁴¹ Madimona naawo naazwa chovuungi ku vaantu, ni a huwuura kwiwulu ni ati, ''Wu mwaana we Ireeza" Jeeso cho ku kalyimera madimona ne ku a viinda kuwaamba, mukuti eezi kuti njeye Kirisiti. ⁴² Izuva chinga lyazwa, naya kuchiva chitoontweere. Vaantu va valyi ku musaka mane niva kasika hachivaka chaa vena. Ni valyika kumuviinda kuti a siye kuzwa havalyi. ⁴³ Mmi na vacho kuti, ''Ni lukeere kuruta ivangelyi cho muvuso we Ireeza mu milyening'i yimwi, mukuti ilyi ndyevaka lyi Ni va tuminwa kunu.'' ⁴⁴ Lyinu cho kuzwiira hafusu na ruta mu masinagoge woonse a Judia.