¹ Muchirimo chovu 15 cho kuvusa kwa Tiberiyasi Kaisara- Pontiyasi Pilato naalyi muhitizi wa Judea, Heroda avalyi muhitizi wa Galaliya, mwaanche Filipo a vahitire chiraranda cha Ituria ne Tirachonitisi, Lyisania naye avalyi muhitizi wa Abilene, ² munako yo mupirisita mukulwaana Annasi ne Kayafasi - lyiinzwi lye Ireeza ni lyeza kwa Johani mwaana Zakaria nena munkaanda. ³ Na ya muziraranda zoonse zi zimbulukite Jorodani, na ruta ikolovezo yo kusikuluha ko kuwoonderwa zivi. ⁴ Moona muku ng'olyetwa mwiivuka ya maanwi a muporofita Isaya, ''Lyiinzwi lyo wumwi yo kuwa munkaanda, 'Muvakanya iizira ya Simwiine, muwololye inzira zaakwe. ^{5 6} Ikaanda lyimwi ne lyimwi kalyi lamiwa, ne irundu lyimwi ne lyimwi ne chiwulu kazi patalazwa, inzira ziteenzi kazi wololwa, zivaka zisa shiyeeme ka muchitwa iinzira, mmi vaantu voonse ka va vone kuhaza kwe Ireeza.''' ⁷ Mmi Johani na cho chinavuungu chivakeeza kuku kolovezwa naaye, ''Wuunwe vaana ve inzoka! Njeeni wa kamulwiira kutiya vukalyi vukeeza? ⁸ Chikwiinavulyo, muchite miteendo yiswanere vaantu va chivava vaki, mmi musiye kulyilwiira kuti, 'Twiina Aburahama Isheetu; ni milwiira kuti Ireeza wuwoola kuzwisikiza Aburahama vaana mwaa mavwe. ⁹ Nahanu vuti iimbezo iviikitwa hembalyi lye mihisi ya masamu. Kuti isamu lyimwi ne lyimwi lyisa viiki zihaantu zilotu lyitemwa ne kusweherwa mumulyiro.'' ¹⁰ Chinavuungi nichazwiira havusu ku muvuuza, nivati, ''Lyinu tuchite vulye?'' ¹¹ Na vetava naati, ''Chikuti wuumwi wiina zizavalyo zovere, alyikawuhanyaza ne wuumwi yaseena, mane wiina chilyo achite chiswana.'' ¹² Va simutero naavo niveeza kuku kolovezwa, ni va mucho kuti, ''Muruti, tulukeere kuchitanzi?'' ¹³ Na vacho kuti, ''Musiye kuhiinda malyi maangi kuzaamba a muva teewa.'' ¹⁴ Masolye vamwi naavo ni vamuvuuza, ni vaati, Lyinu wuuswe? Tuchite vulye?'' ¹⁵ Lyinu mukuti vaantu chivava suluheere kwiiza kwa Kirisiti, wuumwi ne wuumwi chava virerete munkulo yaakwe cha Johani, kapa njeye Kirisiti. ¹⁶ Johani na vetava navacho kuti, ''Hairi Ime, ni mikoloveza cha meenzi, mmi wuumwi wu keeza wiina ziho ku-Ni zaamba, Ime mane kani yerere kusumununa kakwere ke insaangu zaakwe. Ka mikoloveza cho Luhuho Lujolola ne cho mulyiro. ¹⁷ Wuntumba wiina mwiyaanza lyaakwe ka joloza he kaviro lyaakwe ne kuviika mahira muchishete chaakwe. Mmi kasumike zinyowe mumulyiro wuseeti ni wuve ne yeeti nawoolye kuwuzima.'' ¹⁸ Munzira zimwi zoonse ze kutazo hape, Johani a valyi kulwiira vaantu makande malotu. ¹⁹ Herodi muhitizi ava kalyimererwa kusesa muka mwaanche Herodiyasi, ne zoonse zimwi ziint zivilala za vachiti Herodi, ²⁰ ave zuzirikiza zoonse iizi, mane cho kwiinjirika Johani muntorongo. ²¹ Mmi kuvaati, vanntu voonse chi va kolovezwa, Jeeso naaye na kolovezwa, mmi avati chokwete wurapera, yiwulu cho kwiwuuka, ²² mmi Luhuho Lujolola cho kusuukira hewulu lyaakwe muchiswano che inkuva, mmi liinzwi cho kuzwa kwiwulu, ''Wu mwaanaangu yo sunitwa. Ni lyitumeere chaako.'' ²³ Jeeso cho taanga muteendo waakwe wo kuruta vaantu, cha veena zirimo ziyeendera kuchita makumi wotatwe. A valyi mwaana wa Josefa wo muswisu (mukuva zezererwa) , mwaana wa Heli, ²⁴ mwaana wa Matati, mwaana wa Livi, mwaana wa Meleki, mwaana wa Jannai, mwaana Josefa. ²⁵ Josefa avalyi mwaana wa Matati, mwaana wa Amosi, mwaana wa Nahumi, mwaana wa Esli, mwaana wa Nagai, ²⁶ mwaana wa Maate, mwaana wa Matatiasi, mwaana wa Simeini, mwaana wa Joseki, mwaana wa Joda. ²⁷ Joda avalyi mwaana wa Joanani, mwaana wa Resa, mwaana wa Zerubabele, mwaana wa Salatiele, mwaana wa Neri, ²⁸ mwaana wa Meleki, mwaana wa Adi, mwaana wa Kosama, mwaana wa Elimadama, mwaana wa Eri, ²⁹ mwaana wa Joshuwa, mwaana wa Eliezere, mwaan wa Jorimu, mwaana wa Matata, mwaana wa Jorimi, mwaana wa Livi. ³⁰ Livi avalyi mwaana wa Simioni, mwaana wa Juda, mwaana wa Josefa, mwaana wa Jonami, mwaana wa Eliakimi, ³¹ mwaana wa Melea, mwaana wa Menna, mwaana wa Matata, mwaana wa Natani, mwaana wa Dafita, ³² mwaana wa Jesi, mwaana wa Obeti, mwaana wa Boazi, mwaana wa Salumoni, mwaana wa Nahashoni. ³³ Nahashoni avalyi mwaana wa Aminadaba, mwaana wa Adimini, mwaana wa Arani,mwaana wa Hezironi, mwaana wa Perezi, mwaana wa Juda, ³⁴ mwaana wa Jakobo, mwaana wa Isaka, mwaana wa Aburahama, mwaana wa Terahi, mwaana wa Nahori, ³⁵ mwaana wa Serugi, mwaana wa Reu, mwaana wa Pelege, mwaana wa Ebere, mwaana wa Shelaha. ³⁶ Shelahi avalyi mwaana wa Kainani, mwaana wa Arifaxadi, mwaana wa Shema, mwaana wa Nuwe, mwaana wa Lameki, ³⁷ mwaana wa Metusela, Mwaana wa Enoki, mwaana wa Jaredi, mwaana wa Mahalalelu, mwaana wa Kainani, ³⁸ mwaana wa Enosi, mwaana wa Seta, mwaana wa Adama mwaana we Ireeza.