¹ Lyinu mwaawo mazuva, ni kwachitahala kuti Sizari Augasitasi atumine mulayezo wucho kuti muntu wumwi no wumwi hala munkaanda yoonse a valwa. ² Avalyi njo kuvalwa kweentazi Kwiriniasi na sivusa mwa Siria. ³ Lyinu wumwi ne wumwi chokuya kunkaanda yaakwe ku kulying'oliseza kuvalwa. ⁴ Josefa naaye nakazwa kwa Galilea, mumulyeneng'i wa Nazareta, kuya kwa Judea, ku mulyeneng'i wa Dafita, wusuumpwa Betelehema, mukuti avalyi we inzuvo ne luzuvo lwa Dafita. ⁵ Na ya kukulying'olisa hamwiina ne Maria, yava veereza mane nalyi hiindite. ⁶ Ni kwaava kuti chi vasiinaho, iinako niyeeza yokuti muhwiire a huzumukwa. ⁷ Na puluha muswiisu, mwaane we intaanzi, na vuvungira mumajira malyere cho ku mulyalyika muchitevulye che iing'ombe, mukuti kana kuveena inzuvo mwi wotera. ⁸ Kuveena valyisani mweecho chivaka vavalyi kwiikala muluwa, ni valyiisiza zilyerantu zaavo masiku. ⁹ Ing'iloi lye Ireeza chokuvonka kuvalyi, mmi kuveera kwa Simwiine ni kwa mina haveena, mmi nivenjirwa lyoowa ikaando. ¹⁰ Lyinu ing'iloi cho kuvacho kuti, ''Misiye kutiya, mukuti ni kamilyeetere makande malotu eeti a letere kusaanga ku kaando muvaantu voonse. ¹¹ Suunu mwa zalyirwa Simwiine mu mulyeneng'i wa Dafita! Njeye Kirisiti Simwiine! ¹² Iichi nche chishupo cheeti muheewa: Mbumuwaane muhwiire yo zingitwa majira malyere na lyere muchitevulye.'' ¹³ Mpohonaho hamwiina ne ing'iloi chinavuungi chizwa kwiwulu, cho kuteemba Ireeza nivaati, ¹⁴ ''Kuteembwa Ireeza wiina kwiwulu, mane kuve ne kuzuwaana mukati kavaantu hanu haansi kuvoonse va musangisa.'' ¹⁵ Nikwava kuti mang'iloi chinga azwa muvalyi kuya kwiwulu, valyisani ni valyiwaamba kuti, ''Tweende kwa Betelehema hahanu tukavone iichi chiintu cha chitahala, Cha tutoondeza Simwiine,.'' ¹⁶ Ni vahweerera kwateni chookawana Maria, Josefa, ne muhwiire, na lyere muchitavule. ¹⁷ Chinga vamana kumuvona, ni vezivisa zivavalwiirwa kaha muhwiire. ¹⁸ Voonse vavazuwi vava komokwa chivawaambwa kuvalyi ne valyisani. ¹⁹ Mmi Maria cholyiviikira ziintu zoonse ze ziintu za vazuwi, ni zisumiine munkulo yaakwe. ²⁰ Valyisani chokuvoola, ni valyitumere ne kuteemba Ireeza muchimwi ne chimwi chi vava voni ne kuzuwa, moona muvava lwiirwa. ²¹ Iizuva lya manimani lyo vu 8, chinge njira mumupato, na wulyikwa kuti nje Jeeso, izina lya va heewa ne ing'iloi naseeni ku kosolwa. ²² Mazuva a sakahala wo kujolozwa chinga amana, kuya chomulawo wa Mushe, ni va mutwaala kwi tempere kwa Jerusalema kumutwaala havusu vwa Simwiine. ²³ Mukung'olyetwa mumulawo wa Simwiine, ''Wumwi ne wumwi Mwaanasuswi yiwi wuula izalyiro ka viikirwa Simwiine hembalyi.'' ²⁴ Lyinu ni vazwiisa chitavero kuya kaha chivawaambwa mumulawo wa Simwiine,'' inkuva zovere kapa tunkwirimba tovere.'' ²⁵ Muvone, kuveena nkosi mwa Jerusalema ya valyi kusumpwa Simioni, wuuzu nkosi ava shiyeeme ne kusepahala. Ava lyindire muhazi wa Isiraele, Luhuho ²⁶ Lujolola luveena naaye. Luhuho Lujolola luva musenwiiri kuti keeti na vone lufu naseeni ku vona Simwiine Kirisiti. ²⁷ Na hitirwa no Luhuho, Simioni cho kwiinjira mwi tempere. Vazazi chiva lyetete muhwiire Jeeso, kuku chitwa kuya kaha itwaero yo mulawo, ²⁸ na muwoonda mumaanza cho kuteemba Ireeza, naati, ²⁹ ''Lyinu wusiye muhikaanaako alalye che chisemo, Simwiine, kuya che liinzwi lyaako. ³⁰ Mukuti meenso aangu chiavona kuhazwa, ³¹ ko va vakanya mumeenso a vaantu voonse: ³² Iseri lyo kutoondeza va Malyichava ne kuveera kwa vaantu va Isiraele.'' ³³ Veesi ne vanyina vaa komoketwa chivalyi kuwaambwa chaakwe. ³⁴ Simioni na vatohonolofaza naacho Maria va nyina, ''Vone, wuuzu muhwiire ava salyirwa kuwa ne kuvuuka kwa vaantu va Isiraele ne kuva chishupo chokuti ava kaanwa- ³⁵ nukuti chihai kachai kachihweeze luhuho lwaako- kuti mihupulo ye nkulo zavaantu vaangi ni zisenulwa.'' ³⁶ Muporofita wo mukulwakazi yo sumpwa Anna mpwaaveena. A valyi mwanakazana wa Fanuwele wo luzuvo lwa Ashere. A valyi mukulwaana. A vekalyi ne mwiihyaavo zirimo ziina 7 chozwa muchikenge, ³⁷ mane aveena zirimo ziina 84 naalyi mufwiirwa. Kana ava siyi itempere kono avalyi kuteenda cho kulyinyima zilyo ne tapero, masiku ne kukamwi. ³⁸ Cheyo innako neeza he mbalyi yaavo natanga cho kulyitumera kwee Ireeza, na wamba kaha muhwiire kuwumwi ne wumwi ya va lyindire kuhazwa kwa Jerusalema. ³⁹ Chinga vamana chimwi ne chimwi chivalukeere kuchitwa kuya cho mulawo wa Simwiine, na va volyera kwa Galilea, kumuzi waavo wa Nazareta. ⁴⁰ Muhwiire na kula ne kuva neziho; nezwiire maano, ne chisemo che Ireeza nichi muwuumbite. ⁴¹ Vazazi vaakwe vavalyi kuya kwa Jerusalema chirimo ne chirimo Mukiti we Ipaseka. ⁴² Chiwiina zirimo ziina 12, hape niva volyera kwateni che innako yo mukiti we chizo. ⁴³ Chinga vekala mazuva ava viikiirwa mukiti, ni vataanga kuvoola kumuzi. Mmi mushwiisu chokushaala mwa Jerusalema vazaazi vaakwe ni vaseezi. ⁴⁴ Ni vazeeza kuti mweendi wiina muchitopa chivaya vweenda naavo, nivayeenda musipiri weezuva lyoonse. Lyinu nivataanga kumusaka muvakwaavo ne vamwaavo. ⁴⁵ Chinga vamuvula, niva volyera kwa Jerusalema cho kutaanga kumusaka mwateni. ⁴⁶ Mmi nikwachitahala kuti iizuva lyo vutatu cho kumuwaana mwi itempere, ne keere mukati ka varuti, na vateekete ne kuva vuuza iipuzo. ⁴⁷ Voonse vava muzuwi vava komoketwa kutaluhanya kwaakwe ne kutava kwiitava kwaakwe. ⁴⁸ Chinga vamuvona, va vafwinsoni. Vanyina ni vamucho kuti, ''Mwaanaangu, chiinzi hawa tuhiinda chenzira yiina vuti? Vone, veeso naame tuvakusaki koonse.'' ⁴⁹ Na vacho kuti, Chiinzi ha muvalyi ku ni saka? Kana muveezi kuti ni lukeere kuva mumu teendo wa Taayo? ⁵⁰ Mmi kana vava taluhanya chavalyi kucho chaawo maanzwi. ⁵¹ Navoolya naavo kumuzi kwa Nazareta naa lyiviika kuunsi lyaavo. Nyina va viika zoonse iizi ziintu munkulo yaakwe. ⁵² Mmi Jeeso nazwiira havusu muku kuweera maano ne kukula muviri, nazwiira havusu mukusunwa ne Ireeza ne vaantu.