¹ Jeeso choo lola naa vona vakwaame va vahumi ni va viika iimpo zaavo muchiviikiro cha malyi. ² Na vona mukulwakazi wo mufwirwa na viika tupene toovere. ³ Naa cho kuti, ''Vusakusima ni milwiira, wuuzu mufwiirwa wa viika kuzaamba voonse. ⁴ Voonse aava vazwiisa iimpo muvuungi vuveena naavo. Mmi wuuzu mufwiirwa, muvuhumanehi vwaakwe, waa zwiisa choonse cheena naacho kumuhaza.'' ⁵ Vamwi vavalyi kuwaamba cha mave maloti ava kaviiswa mwi itempere ne mpo zateni, naati, ⁶ ''Iizo ziintu zimuvweene, iizuva lyikeeza lyi kuseena iivwe lyeeti nilyi shaalye nilyisaa pindumwiinwa hewulu lye lyimwi.'' ⁷ Niva muvuuza, nivaati, ''Muruti, iizi ziintu kazi chitahalye lyihi? Hakuti iizi ziintu chizitahala chishupo nchechihi?'' ⁸ Jeeso neetava, ''Mutokomere kuti kaanzi ni muziyezwa. Vaangi kaveeze che izina lyaangu, ni vati, Njeeme; mmi, 'Iinako chiyiina hafwihi.' Musiye kuva shaala mumasulye. ⁹ Hamuzuwa inkoondo ne mifirifiri, musiye kutiya, mukuti iizi ziintu zilukeere kuchitahala intaazi, mmi ma manimani keeti ni achitahalye ahwaahwaaho.'' ¹⁰ Na vacho kuti, ''Mishovo kailyi sandukire, ne mivuso kailyi sandukire. ¹¹ Ka kuve ne zikinyeho inkaando yee inkaanda, mizivaka ziingi iinzala ne matuku ase zivitwa. Ka kuve ne ziintu zitiiza ne zishupo zikaando zo mwiiwulu. ¹² Mmi iizi ziintu niziseeni, Kava mikave ne ku misukulula, ne kumitwaala ku masinagoge ne muuntorongo, ne kumitwaala havusu vwa vasimwiine ne vavusi cheevaka lyee zina lyaangu. ¹³ Ka ive innako iindotu yo kuti muwaambe kahe iizina lyaangu. ¹⁴ Lyinu mulyemuhe munkuloo zeenu kuti musiye kulyiitavira iinako niisina havusu, ¹⁵ mukuti ka nimihe maanzwi ne maano kuti vamitoyete voonse vasiye kusampula zimuwaamba. ¹⁶ Mmi kulyi vazaazi veenu, vamukulweenu, vakweenu, ne vamweenu, mane kava mihaye. ¹⁷ Vaantu voonse ka va mitoye che iivaka lye iziina lyaangu. ¹⁸ Mmi kwiina nangati lusuki lumwiina lweeti niluzwe mu mitwi yeenu. ¹⁹ Muunkulo iinde ka muvolyerwa vuhalo vweenu. ²⁰ ''Ha muvona Jerusalema wuzimbulukitwa ne masolye, mwiizive kuti kusinywa kwaayo chikwiina hafwihi. ²¹ Lyinu veena mwa Judea vatirire ku maruundu, veena mu milyening'i mikaando vazwe mwateni, mmi veena mumiinzi vasiye kuya ku milyenengi mikaando. ²² Mukuti aawo ngamazuva wo kulyi vusuluseza, kuti ziintu zoonse zing'olyete zizuzirizwa. ²³ Veena vumayi valyihiindite ne vanyoonsa mwaawo mazuva! Mukuti masukuluka makaando munkaanda, ne ku kalyihira vaantu. ²⁴ Kave hayiwa ne mlyiinga, mane kava twaalwa vuhiikaana munkaanda zoonse, Jerusalema kayi lyatoolwa ne Veenkaanda mbwiita innako ye Veenkaanda hayimana. ²⁵ ''Ka kuve ne zishupo he zuva, ha mweezi, ne mwiinkaani, ne munkaanda. Mishovo ka iive muvukaavo, no kutiya cheevaka lya mawate ne masuunda. ²⁶ Vaantu kava kuzuminina nje lyoowa lyo kuzezerere ziintu zikeeza kuku chitahala muunkaanda. Mukuti ziho ze iwuulu kazi nyungooke. ²⁷ Lyinu kava vone Mwaana wo muuntu nakeeza mu makope che zivo ne kuveera kukaando. ²⁸ Mmi iizi ziintu hazi chitahala, muziime mulyolye wiiwuulu, mukuti kuhululwa kweenu chikwiina hafwihi.'' ²⁹ Jeeso na valwiira iingulu, ''Mulolye iisamu lye feiga, ne zisamu zoonse. ³⁰ Hazi zwiisa iinduva, muvona ne mulyemuha kuti iimbumbi chiyina hafwiihi. ³¹ Lyinu naaho, hamuvona iizi ziintu ni zichitahala, mwiizive kuti vusimwiine vwwe Ireeza chiviina hafwihi. ³² Vusakusima ni milwiira, wuulu luzuvo keeti ni lumane mbwiita iizi ziintu hakuti chiza chitahala. ³³ Iwulu ne inkaanda kazimane, mmi maanzwi aangu keeti ni amane. ³⁴ ''Mmi mulyitokomere, kuti iinkulo zeenu kaanzi ni zilyemenwa ahulu kunywa ne vunywaavi ne kuvirera zo vuhalo, kuuti iilyo iizuva kaanzi nilyi miwiiri ³⁵ siina kaswa. Mukuti kalyiize hewulu lyo wumwi ne wumwi yo hala mwiikoonde lye iinkaando yoonse.. ³⁶ Mmi mulyiverere iinako zoonse, murapere kuti mukolye ahulu kuti ni muwoolye kuhalula kweezi ziintu zoonse zeeti nizichitahalye, ne kuziima havusu vo Mwaana wo Muuntu.'' ³⁷ Lyinu mazuva avalyi kurutanga mwi tempere, mmi masiku avalyi ku yeenda cho kukekala hewulu lye iruundu lyisuumpwa Oliva. ³⁸ Kakusasana vaantu voonse vavalyi kufuminaanga kwi tempere kuku muteeka.