¹ Ni kwava kuti lyimwi izuva Jeeso chokweete kuruta vaantu mwi tempere ne kuruta ivangeri vakulwaana va mapirisita ne vang'olyi niveeza kwaalyi ne vakulwana. ² Niva waamba, nivamucho kuti, ''Tulwiire kuti zihoonzi zo chita iizi ziintu chaazo, kapa njeeni ya vakuhi iizi ziho.'' ³ Ne tava naavacho kuti, "Mbuni mivuuza ipuzo, mmi muni lwiire. ⁴ Ikolovezo ya Johani: Ivalyi kuzwa kwiwulu kapa kuvaantu?'' ⁵ Ni va wambinsana muchaavo, ni vaati, "Ha tucho kuti, 'Kuzwa kwiwulu,' mbaati, 'Lyinu chiinzi ha musana muva muzumini?' ⁶ Mmi hatuti, 'Kuzwa kuvaantu,' vaantu voonse mbuva tugovolye, mukuti vava zumini kuti Johani avalyi muporofita.'' ⁷ Lyinu ni veetava kuti kaveezi kuzizwa. ⁸ Jeeso na vacho kuti, "Nangati iime keeti nimilwiire kuti nichita iizi ziintu chezihi ziho.'' ⁹ Na lwiira vaantu iiyi ingulyi, "Mukwaame ava vyalyi yiiwa lyo muwoomba, na vika vaantu valyima muwoomba, chokuya kunkaanda yiina kulye luvaka lulye. ¹⁰ Inako chinga yashiyama cho kutuma muhikaana aakwe ku mulyimi wo muwoomba, kuti vamuhe kwateni zihaantu zo muwoomba. Mmi mulyimi wo muwoomba cho kuka mukava, ne kumu vooza na seena chakweete.