¹ Jeeso avenjiri no kuhita cha Jeriko. ² Muvone, kuveena mukwaame yo suumpwa Zakayiyo. Avalyi mukulwaana wa vateresi naahumine. ³ Avalyi kulyika kuvona kuti Jeeso njeeni, mmi kana avalyi kuwoola kuvona muchinavuungi, mukuti avalyi mufwihi. ⁴ Lyinu cho kung'ombweera kuvusu vwavaantu na taanta kwisamu lyo musikamuri kuti amuvone, mukuti Jeeso avalyi kuhita cheyo inzira. ⁵ Lyinu Jeeso chinga sika hecho chivaka, na lola kwiiwulu namucho kuti, "Zakayiyo, suuke cho kuhweera, mukuti suunu Ni swaneere kukeekala munzuvo yaako." ⁶ Mmi nasuuka chokuhweera na mutambula cho kusaanga. ⁷ Lyinu wumwi ne wumwi chinga avona iichi, voonse ni vavireera, nivaati, "Wa ya kukupotera muuntu wo mulewuhi." ⁸ Zakayiyo naazima na cho Simwiine kuti, "Vone, Simwiine, chibalyi chi zinikweete Ni ziha vahumanehi, mmi chikuti ni vaziyeza muuntu che chimwi, ka Ni chivooza che chilyikano choone." ⁹ Jeeso na mucho kuti, "Suunu kuhazwa chikweeza mwiyinu inzuvo, mukuti naaye mwaana wa Aburahama. ¹⁰ Mukuti mwaana wo Muuntu aveeza kukusaka ne ku haza vaantu vazovete." ¹¹ Chinga vazuwa iizi ziintu, nazwiira havusu kuwaamba mane navalwiira ingulyi, mukuti chaveena hafwihi ne Jerusalema, mmi vavazeezi kuti vusimwiine vwe Ireeza chivuvoneka ahwaahwaaho. ¹² Lyinu naati, "Wumu mukwaame wa maziimo naya kunkaanda yina kulye kukulyi tambwiira muvuso ne kukavoola. ¹³ Na sumpa vahikaana vaakwe veena iikumi na vaha mamina eena iikumi naati, 'Muchite ibizinesi mbwiita hanikavoola.' ¹⁴ "Mmi vakwaakwe vava mutoyete ni vatumina vaantu kwaalyi, ni vaati, 'Keeti ni tuzuminine wuuzu muuntu kutuvusa.' ¹⁵ Ni kwachitahala kuti chinga kavoola, chaka waana muvuso, naacho vahikaana vaakwe vava siiri malyi kuti alyeetw kwaalyi, ezive kuti vava volyerwa vukayi mwi ibizinisi yi vavalyi kuchita. ¹⁶ "Wentaazi neeza haalyi, naati, 'Simwiine, yi mina yaako iva chiti mamina eena iikumi hewulu.' ¹⁷ ''Mukwaame wa maziimo na mucho kuti, 'Wachita neenza, muhikana yo shiyeeme. Mukuti wu vasepahalyi muziintu zinini, koove ne ziho mu milyeneng'i iine iikumi.' ¹⁸ "WO vuveri neeza, naati, 'Yi mina yaako, simwiine, iva weeri imina zimana iyaanza.' ¹⁹ "Mukwaame wa maziimo naamucho kuti, 'Mbo lawulye mizi yimana iyaanza.' ²⁰ "Wimwi neeza, naati, 'Simwiine, yi mina yaako iiyi, ni vayiviikite siinte muchijira, ²¹ mukuti ni vakutiite, mukuti wu muuntu yo kataza . Wu hiinda cho sana uva viiki, mane wusiinza chosana wu vavyalyi.' ²² Mukwaame wa maziimo cho kumucho kuti, 'Mbunikuatulye cha maanzi aako, wuwe muhikaana muvilala. Wu veezi kuti ni muuntu yo sukulula, ni hiinda zinisana niva viiki, ne kusiinza zini sana ni valyimi. ²³ Lyinu chiinzi hosana wuva viiki malyi aangi mwii banga, kuti cchinika voola niiza ni a hiinda cha awereka?' ²⁴ Mukwaame wa mazimo naacho vava zimeene hembalyi, 'Mu munyaange imina iiyo, muyihe zuna yiwiina imina ziine ikumi.' ²⁵ "Ni vamucho kuti, 'Simwiine, wiina imina zina iikumi.' ²⁶ ""NI micho kuti, wumwi ne wumwi yo saka kaheewa kuzaamba, mmi iiye ya seena, mane kulyi chakweete kachi hiindwa kwaalyi. ²⁷ Mmi izi zira zaangu, vana vasana vavasuni kuti ni vavusa, muvalyeete hanu mane muvehaye havusu vwaangu."" ²⁸ Chinga mana kwaamba iizi ziintu, na zwiira havusu, kuya kwa Jerusalema. ²⁹ Ni kwaava kuti chinga sika kumbalyi a Bethapage ne Bethani, kwi iruundu lyisuumpwa Olivasi, na tuma varutiwa vaakwe vovere, ³⁰ naati, "Muye hamuzi wichirira. Mumwiinjira vulyo, mbu muwaane kadonki kaseeni kutaantwa. Muka sumunune mukalyeete kwaangu. ³¹ Chikuti muuntu mbwamuvuuza, "Chiinzi hamuka sumununa?' Muti, 'Simwiine wukasaka."" ³² Vava yeendi vava kawaani moona Jeeso mwava valwiiri. ³³ Chiva sisumununa kadonki, infumwaateni naati, ''Chiinzi ha musumununa kadonki?" ³⁴ Ni vaati, "Simwiine wukasaka ." ³⁵ Ni vakalyeeta kwa Jeeso, ni vaviika zaparo zaavo hewulu lya kadonki mmi ni veekalyka Jeeso he wulu lwateni. ³⁶ Chokaya, ni vazala zizavalo zaavo munzira. ³⁷ Chichoo chutira kuchivaka ha shetumukira Iirundu lya Olivasi, Marutiwa voonse vaveena cho kutaanga kulyitumera ne kuteemba Ireeza cha maanzwi ena kwiwulu che miteedo yoonse mikaando yivava voni, ³⁸ ni vati, ''Mikoonde inja simwiine ya veeza mwizina lya Simwiine! Chisemo kwiiwulu ne kuverenga kwiwulu lyo kwiwulu!" ³⁹ Vamwi va Mafarasai vaveena muchiinavuungi ni vamucho kuti, "Muruti, kalyimere varutiwa vaako."' ⁴⁰ Jeeso neetava naati, "Ni milwiira, kalyi aava vatontweere, mavwe naa hureza."' ⁴¹ Jeeso chinga sika mumulyeneng'i, na wulyirira, ⁴² naati, "'Kalyi muveezi mwaa mazuva, mane naanwe, ziintu zimilyetera kusanga! Mmi hanu ziwuungwirirwa meenso eenu. ⁴³ Mmi mazuva kaamizire hakuti zira zeenu chiva mizakiriza ne kumizumbuluka ne kumi lyatiriza imbalyi zoonse. ⁴⁴ Ka vakuwisikiza haansi, hamwiina ne vana vaako. Keeti nivasiye iivwe nilyina hewulu lye iivwe lyimwi mukuti kana wuvezivi iinako yo vapoteerwa chaayo." ⁴⁵ Jeeso chokwiinjira mwi tempere nataanga kuhindeeka vavalyi kuwuza, ⁴⁶ na vacho kuti, ''Kung'olyetwa, 'Inzuvo yaangu kaive inzuvo ye tapero,' mmi chimuvaisandulyi ikoomba lya vasa.'' ⁴⁷ Lyinu Jeeso avalyi kuruta iizuva ne iizuva mwi tempere. Vakulwaana va mapirisita ne vang'olyi vavalyi kusaka kumwiihaya, ⁴⁸ mmi kana vavalyi kuwoola kuwaana inzira yo kuchita vulyo mukuti vaantu voonse vava muteekete neenza.