¹ Mmi na waamba ingulyi kuvaalyi mu va lukeere ku rapera iinako zoonse, ni vaasa suuntiki, ² naati, "Mu muzi wumwi mukaando, muatulyi ya sanaa avalyi ku tiya Ireeza maane kana avaalyi ku kuteka baantu. ³ Lyiinu ku veena mufwiirwa mowo muzi mukaando, a vaalyi kwiizaanga kwaalyi iinako zoonse, 'naacho kuti.' ⁴ Ni tusa kuti ni woolye kuchitwa neenza ku yoo nizekisa.' Chee naako iinde kana ava suni ku mutusa, mmi cho luvaakazan nalicho kuti, 'Naandi ka nityi Ireeza kapa ku kuteka muuntu, ⁵ mukuti wuuzu mufwiirwa chaa ni kataza, Mu nimutusa ku muchitira neenza, kuti kaanzi a ni suuntisa cho ku voola voola."" ⁶ Lyinu Simwiine naati, "Teeke uuzu muwatulyi ya seena vuniiti mwaacho. ⁷ Lyiinu Ireeza keeti cho lyeete kushiyama ku vaakwe vaava lyisalyiri va lyirira kwaalyi kukamwi ne masiku? Aa ka lyiyehe ahulu chaavo? ⁸ Ni milwiira kuti kaa va chitire vulotu cho kuhweera. Nangati kwiina vulyo, hakuti Mwaana wo Muuntu chookeza, aa toota keeze za waane itumero muunkaanda?" ⁹ Hape na waamba iingulyi ku vaamwi va vaalyi ku lyi lwiira kuti va shiyeeme maane ni vasaa waambi siinte vaamwi vaantu, ¹⁰ Vakwaame voovere va vayi kwii tempere ku ku rapera - wuumwi aavalyi Mufarasayi mmi wuumwi aa valyi muteresi. ¹¹ Mu Farasayi naa zima mmi nalyi raperera mwiine kaha iizi ziintu, 'Ireeza, Nilyitumera mukuti kaniswani ne vamwi vaantu va vasa, vaantu vasa shiyeeme, mahuulye, mane nangaati kuswaana noozu muteresi. Ni linyiima zilyo ko veere mu iinsunda. ¹² Ni zwiisa cho vwiikumi che zoonse zi niwana.' ¹³ Mmi muteresi, naa ziima kulye, naasa woolyi kulyi kunyemuna mmeenso ku lola kwiwuulu, mmi naali kava hachizuva, naati, 'Ireeza, ni fwiire iinse, iime ni muchitazivi.' ¹⁴ Ni milwiira kuti, wuuzu mukwaame a va voolyi kuunzuvo yaakwe na shiyamiswa kuunda woozuna wuumwi, mukuti wuumwi no wuumwi yoolyi nyemwiina kwiiwuulu kaa voozwa haansi, mmi wuumwi no wuumwi yoolyi vooza haansi ka nyemwiinwa kwiiwuulu." ¹⁵ Vaantu va vaalyi ku lyeeta kwaalyi ne vaana vaavo vanini, kuti a woolye kuva woonda, mmi vaapositola ngava voona yiichi, ni vava viinda. ¹⁶ Mmi Jeeso na vasumpa kuti veeze kwaalyi, naati, " Musiye vahwiire veeze kwaangu, mmi musiye ku va viinda. Mukuti vusimwiine vwee Ireeza mmbuva swaana naavo. ¹⁷ Vusakusima Ni milwiira kuti, yaasa taambulyi vusimwiine vwee Ireeza siina muhwiire keeti neenjire muvulyi." ¹⁸ Wuumwi wee induna naa muvuza, naati, "Muruti yo Shiyeeme, ni lukera ku chita vulye kuti ni vone vuhalo vusaamani?" ¹⁹ Jeeso na mucho kuti, "Chiinzi ho nisumpa yo shiyeeme? Ka kwiina yo shiyeeme, kuunda e Ireeza yeyeena. ²⁰ Wiizi milawo - wusiye ku chita vuhuulye, wusiye kwiihaya, wusiye kwiiva, wusiye ku zingiriza za mapa, kuteke veeso ne vaanyoko." ²¹ Yii induna naati, "Zoonse iizo ziintu ni va zikuteki muunaako yo vuloombwaana vwaangu." ²² Mmi Jeeso nnga zuuwa vuulyo, naa mucho kuti, "Chiintu chi mwiina cho sivulyite. Wu lukera ku wuuza zoonse ziwiina naazo cho ku waveerera va sukulukite, mmi koove ne vuhumi kwiiwuulu - mmi wiize, wunichirire." ²³ Mmi muhuumi chingaa zuuwa yiizi ziintu, naa zuuwa ahulu vutuku, mukuti aava humine aahulu. ²⁴ Mmi Jeeso, chiinga muvona, na zuuwa ahulu vutuku naati, "Ku kaavo vulye kwaavo vahumine ku ku keenjira muvusimwiine vwe Ireeza! ²⁵ Mukuti ku huuva kuti ikamera iinjire mulyiinso lye iinalyiti, kuundaa woo muuntu yo humine ku kwiinjira muvusimwiine vwe Ireeza." ²⁶ Aavo va va teekete nivaati, "Lyiinu njeeni yeeti naahazwa?" ²⁷ Jeeso neetava, "Ziintu zikaanga vaantu kwee Ireeza ziwoolyeeka." ²⁸ Pitorosi naati, "Kushiyeeme, tu vaasiyi zeetu zoonse mmi ni twa kwiichirira." ²⁹ Jeeso naava cho kuti, "Vusakusima, Ni milwiira kuti ka kwiina ya vasiyi iinzuvo yaakwe, mwiihyaavo, kapa va nnchiizye, kapa vazaazi vaakwe, kapa vaana vaakwe, cheevaka lyo vusimwiine vwee Ireeza, ³⁰ ya seeti na waane kuungi mwe yiinu yiinkaanda, ne muunkaanda yiikeeza, vuhaalo vusaamaani." ³¹ Chingaa hindira veena iikumi ne voovere kuumbalyi, naa vacho kuti, "Mu voone chitu taantukira kwa Jerusalema, mmi ziintu zoonse zi vang'olwa ne vaaposotola kaha Mwaana woo Muuntu kazi zichitahalye. ³² Mukuti ka heewa mu maanza a valichava, mmi ka va mushute, ne ku mufwiisa yiinsoni, ne ku muswiira mate. ³³ Hava maana ku mukava, ka va mwiihaye mmi mwiizuva lyo vuutatu kaavuuke haape." ³⁴ Kana vava zuwisesa chimwi cheezi ziintu, mmi maanzwi aakwe vava aa wuungulyerwa, hape kana vava zuwiiseza iizo ziintu za vaalyi kuwaamba. ³⁵ Ku vaavi kuti , Jeeso chinga chuuta kwa Jeriko, mukwaame wuumi ya saavoni aa vekeere kumbalyi ye iinzira naa kumbira, ³⁶ mmi chinga a zuuwa chinaavuungi ni chihiita, naa vuuza kuti kuchitahalaanzi. ³⁷ Ni va mulwiira kuti Jeeso wa Nazareta wahita aaha. ³⁸ Lyinu mukwaame ya sa voni cho kuhuwa, naati, "Jeeso, mwaana Dafita, ni fwiire iinse." ³⁹ Va vaalyi kuyeenda havusu cho ku kalyimera mukwaame woo muhofuvoni, ku mulwiira kuti aatontolye. Mmi na huwa kuzaamba, "Mwaanaa Dafita ni fwiire iinse." ⁴⁰ Jeeso naaziima cho kuvacho kuti mukwaame woo muhofu alyeetwa kwaalyi. Mmi mukwaame woo muhofu chingaa chuta hafwiihi, Jeeso na muvuuza, ⁴¹ "Wusaka kuti niku chitiree iinzi?" Naati, "Simwiine, Ni saaka ku vona." ⁴² Jeeso naa mucho kuti, "Wuu voone. Kuzumiina kwaako chi kwa kuhooza." ⁴³ Chookuhweera cho ku voona, naa mwiichirira, naa teemba Ireeza. Kuuvona yiichi, vaantu voonse choku teemba Ireeza.