¹ Jeeso haape naacho vaapositola, "Kuveena mukwaame umwi wo muhumi ya veena mutokomeri, mi ku va waambwa kwalyi kuti uzu mutokomeri u kweete ku sinya zibya zaakwe. ² Lyinu mukwaame wo muhumi na musuumpa naati kwaalyi, ' Chiinzi iichi chini zuwiire kwaako? Uhe vuikaravero vye ziintu zo tokomere, mukuti keeti u voolye u ve u mutokomeri.' ³ Mutokomeri na mucho kuti, 'Ni chite vuulye, mukuti infuumwaangu u ni hindira muteendo waangu wo vutokomeri? Ka nina ziho zo kusa, ne kufwaa insooni ku kumbira. ⁴ Niizi cheeti ni chite, ha kuti chi naazwiiswa mu muteendo waangu wo vutokomeri, vaantu ka va ni tambulye mu mazuvo aavo. ⁵ Kuzwaaho Mutokomeri cho kusumpa wumwi no wumwi ya valyi ku korota simwiine aakwe, na vuuza weentaanzi, ' Vukayi yo korota simwiinaangu?' ⁶ Naati, 'Chilikanyo cho mwaanda cha mafuta e olivi.' Mi naa mucho kuti, 'Hiinde ipampiri lyaako lye chikoroti, wikalye haansi cho kuhweera, mmi u ngolye makumi a maana iyaanza.' ⁷ Kuzwaaho muhitiri naacho wumwi, 'Lyinu uuwe vukayi yo korota?' Naacho kuti, 'Chilyikanyo cho Mwaanda che hwiiti,' Na mucho kuti, 'Hiinde ipampiri lyaako lye chikoroti u ngolye ka maana iyaanza ne minwe yoo tatwe.' ⁸ Simwiine na teemba muhitiri ya sa shiyeeme mukuti ava chiti cha maano. Mukuti vaana ve yinu inkaanda ba talifite ahulu hakuti va teendinsaana ne va mwaavo ku zaamba vaana ve iseri. ⁹ Ni micho kuti, mu lyichitire valyikani naanwe che inzira yi sa shiyeeme ya malyi, nkokuti hakuti chaa mana , ni va woolye ku mitambula mu meekalo a sa mani. ¹⁰ Iye yo sepahala mu chinini u sepahala ne mu chikaando, mi ya sa sepahalyi ku chinini ka sepahalyi ne ku chikaando. ¹¹ Chokuti ka na u valyi kusepahala ku ku teendesa malyi a sa shiyeeme, yeeti na kusepe muvuhumi vusepahala injeeni? ¹² Hape chokuti kana u vaalyi kusepahala ku ku teendesa malyi a vamwi vaantu, Injeeni yeti na kuhe malyi aako umwiine? ¹³ Ka kwiina muhyikaana yo woola ku teenda vasimwiine vo vere, mukuti uwoola ku toya wuumwi cho kusuna wuumwi, haamwi u woola kukakatira wuumwi cho ku siya wuumwi. Keeti cho teendera Ireeza ne vuhumi." ¹⁴ A hohwaaho ba Farasayi, va va suni malyi, ni va zuwa zoonse izi ziintu, ni va museka. ¹⁵ Mmi na vacho kuti, "Unwe mulyichita va shiyeeme mu meenso a vaantu, mi Ireeza wiizi inkulyo zeenu. Chi lolyeeka vukaando mu meenso a vaantu, chivilala mu meenso Ireeza. ¹⁶ Mulawo ne va porofita zi vaalyi kuteenda mbwiita Johani chi ngeeza. Kuzwa che iyeyo inako, ivangeri yo muvuso we Ireeza cho urutwa, Wumwi no wumwi ulyika ku patamiza inzira yakwe muyiri. ¹⁷ Imi kuhuva kuti yiwulu ne inkaanda zimane kunda yitaka yimwiina yo mulawo kuti yisinduke. ¹⁸ Wumwi no wumwi yo kaana mwihyaavo cho kusesa wumwi uchita vuhuulye, mane iye yo sesa yo va kaanwa ne mwihyaavo u chita vuhuulye. ¹⁹ Lyinu ku veena wumwi wunkosi wo muhumi ya va zweete ipulupere ne lineni imi a valyi ku lyi kusangire vuhumi vwaakwe izuva ne izuva. ²⁰ Wumwi wo muhumanehi ya valyi kusumpwa Lazarasi a va viikitwa ha mulyaango, nezwiire ziravi, ²¹ a va nungitwa kulya fufwafwaalyi vu valyi kuwa he tafulye yo mukwaame wo muhumi- imi kundaaho, vambwa va valyi kwiiza ni va koomba ziravi zaakwe. ²² Ni kwaava kuti muhumanehi cho kufwa mi nahindirwa kwiwulu ne mangiloyi ku imbalyi ya Aburahama. Mukwaame wo muhumi naaye cho kufwa na wuungwa, ²³ chiwina mwi Bimbiro, cha sukuluka, na nyemuna meenso aakwe na vona Aburahama neena kulye mi Lazaro neena ha chizuva che. ²⁴ Na huwa naati, 'Taayo Aburahama, nizuwiire vutuku tume Lazaro, kuti eenike iinxwe yo munwe waakwe mu meenzi eeze a tontoza lulyimi lwaangu, mukuti chinaa sukuluka mweelyinu ibimbiro.' ²⁵ Lyinu Aburahama naa cho kuti, 'Mwaanaangu, zeze kuti mu vuhalo bwaako u va tambulyi ziintu zilotu, mi Lazaro chokuswaana a va tambulyi zivi. Lyinu hanu wutontozwa, mi wuwe wina mu masukuluka. ²⁶ Kundaa eezi zonse, masukuluka makaando a vaavi hateni, kuti aavo vasaka ku luta kuzwa kunu kwiiza uko kwaako keeti chi va woola, naaho kaakwiina yeti na woolye kuluuta naazwa wuuko kwiiza kweetu.' ²⁷ Mukwaame wo muhumi naati, 'Ni ku kuumbira, Taayo Aburahama, kuti wumutume ku inzuuvo ya taayo- ²⁸ mukuti nina va mukulwaangu va mana iyaanza vakwaame- kuti a woolye ku ka vlwiira, ku tiya kuti naavo kaanzi ni veezi muchivaka meechinu chivaka cha masuluka.' ²⁹ Mmi Aburahama naa cho kuti, ' Veena Mushe ne va porofita; va va teeke. ³⁰ 'Mukwaame womuhumi neetava kuti, 'Naanta, Taayo Aburahama, mmi wuumwi wa vafu haaya kuvalyi yoozwa ku vafu, ka va siye zivi zaavo.' ³¹ Mmi Aburahama na mucho kuti, 'chokuti ka va teeki Mushe ne vaporofita, mmi keeti ni va zuwe chokuti muntu wa vuuka ku vafu."'