¹ Lyinu ba kunganyi va malyi ne vamwi va vachita zivi va veeza kwa Jeeso ku ku muteeka. ² Voonse ma-Farasayi ne masikiriba va vaalyi ku vireera mukati kaavo, ni vati, " Wuuzu mukwaame u tambula va chita zivi, mane wulya naavo." ³ Jeeso naa waamba iiyi ingui ku vaalyi, naati, ⁴ ''Njoozuhi weenu, chookuti wiina imberere ziina muyaanda kuzwaaho cho ku zooverwa iimwiina, Keeti na siiye ziina makumi a mana yiyaanza ne woonne mu muzuuka, mmi che kuyeenda ku kusaka iimwiina yiizoovete mbwiita ha ka yiwaana? ⁵ Ku zwaaho nanga chaiiwaana, cho kuiiviika ha maheeta aakwe ne ku lyitumera. ⁶ Lyinu heeza kunzuuvo, wusuumpa voonse vamwaakwe ne va zaakite naavo, wu vacho kuti, 'Musaange naame, mukuti chi naaka waana yimberere yaangu seke yizoveete.' ⁷ Ni micho kuti naangati kwiina vuulyo, ka kuve ne kusaanga kwiwulu ha kuva ne muchita zivi wumwiina hasiya zivi zaakwe, kuzaamba vaantu veena makumi a maana yiyaanza ne woonne ne ba maana yiyaanza ne voone va saa lukeere ku vakira zivi zaavo. ⁸ Kapa mukulwakazi wiina vulye wiina yiikumi lyo vuwayawaya vwe silifera, chokuti wu zooveerwa yiimwiina, ya seeti cho minika yiilaambi, ku fyeera yinzuuvo, ne ku saaka neenza mbwiita ha yiwaana? ⁹ Mmi ha yiiwaana, wusuumpa va mwaakwe haamwiina ne vaazakite naavo, naati, 'Musaange naame, mukuti na waana yiiri lyaangu seeke lyizoveete.' ¹⁰ Naangati kwiina vuuly, Ni mi cho kuti, kwiina kusaanga ha vusu vwa mangiloyi ee Ireeza ha muuntu umwiina yo siya zivi zaakwe." ¹¹ Mmi Jeeso naati, "Wuumwi mukwaame a veena vaana vava swiisu voovere, mmi we chiniini naacho veesi, ¹² 'Iita, munihe chibaalyi cho vuhumi vu swaanere ku va vwaangu. ' Lyiinu cho ku vakauhanyeza zibya zaakwe hakati. ¹³ Ni kuseeni kuhita mazuva maangi, mwaanaswiisu we chinini cho ku kunganya zoonse za veena naazo na yeenda ku nkaanda yo kulye, mmi wuuko naaka siinya malyi aakwe, kuwula ziintu za saanaavalyi ku saaka, ne ku sinya maalyi muvuhaalo vwe iinkaanda. ¹⁴ Lyiinu ngamana kusinya chimwinechimwi, lwiinza lukaando ni lwa wuumba iiyo inkaanda, mi na taanga ku sukuluka. ¹⁵ Na yeenda na kalyihirisa ku wumwi muuntu we iyo inkaanda, ya va mutumini ku mawa aakwe ku ku lyisika zijiiri. ¹⁶ Mmi ava saangire kulya makaambi e nyaangu a valyi kulyiiwa ne zijiiri mukuti kana kuveena ya vamuhi chimwi cho kulya. ¹⁷ Mmi mwaanaswiisu we chiniini ngaalyi kumbulukwa, naati, 'Voolye vahikaana va taayo vahiritwa veena ziilyo ziingi kuzaaamba, mmi nina haanu , ni hayiiwa iinzaala! ¹⁸ Munizwe hunu niye kwa taayo, ni ka mucho kuti, "IIta, Ni va lewuhiri iiwulu, ne mumenso aako. ¹⁹ Ka nisi lyikeene ku suumpwa mwaanaako; ni chite wuumwi wa vahiikaana vaako va hiiritwa." ²⁰ Lyiinu mwaanaswiisu we chiniini na katuka cho kuya kwee iisi. Nasiina kulye, iisi cho kumuvoona, mmi naamufwiira iinse, na mungombweera, naa muwooda naa muxoota. ²¹ Mwaane naa mucho kuti, 'Iita, Ni va lewuheri iiwuulu ne havusu vwa meenso aako. Ka ni lyiikeene ku suumpwa mwaanaako.' ²² Iisi naacho vahiikaana vaakwe, Mulyeete cho vuhweeru iinguvo indendee iindootu, mu yimu zwaatike, mu muviike isaalye ku munwe, ne insaangu ku mateende. ²³ Lyiinu mulyeete inaamani yinunine mmi muyihaye. Tu saange tulye mukiti! ²⁴ Mukuti mwanaangu a va fwiire, mi haanu u haala. Avaa zovete, mi haanu wa waanika. 'Mmi ni vaataanga kusaanga. ²⁵ Lyiinu mwaanaakwe mukulwaana wo muswiisu aveena kuluuwa. Choo keeza ne kuchuuta hee nzuuvo, a vazuwi inziimbo ne kuzaana. ²⁶ Na suumpa wuumwi wa vahiikaana na vuuza kuti iizi ziintu kuti zitalusa inzi. ²⁷ Muhiikaana na mucho kuti, 'Mwaanchaako weeza ku muzi mi iiso wehaaya innamani inunine, mukuti wa kavoola neenza.' ²⁸ Mwaana mukulwaana a va veengi, mi kana aveenjiri mukati, mi iisi naazwiira kuunze, na mukumbira. ²⁹ Mmi mwaana mukulwaana cho kwiitava iisi cho kuti, 'Voone, iizi ziriimo zingi ni vavi muhiikaana aako, mi kakwiina mulawo waako u niva choolyi, mi kaana u va nihi nangaati ka penaana kuti ni lyitumere ne va mwaangu, ³⁰ mmi mwaanako chiingeeza, ya va kamaani zaako zoonse ne mahuulye, u mwiihaira iinamani iinunine.' ³¹ Iisi na mucho kuti, ' Mwaanaangu, wiina naame inaako yoonse, mi chimwi ne chimwi chaangu nchichaako. ³² Mmi ku swaanera kuti tulye ne kusaanga, mukuti uuzu mwaanchaako a va fwiire, mi haanu uhaala, a va zoovete, mi haanu cha va waaniki.''''