¹ Wusiye ku kalyimera mukulukwaame. Kono, wumu yereza sina yo yereza veeso. U yereza valoombana sina vanche vaako, ² vachembere sina vanyiineenu, vakazana siina vanchizyeenu, muku jolola koonse. ³ Kuteke vazike, vazike tota. ⁴ Mmi chikuti mufwiirwa wiina vaana ne vezukulu, avo vataange kulituta kukuteka vavekala naavo mumazuvo. Valyihe vazazi vaavo, mukuti iichi chisaangisa Ireeza. ⁵ Mmi muzike toota, yo sheere yeyena, na lyiviikite kwe Ireeza na zwiirire havusu mu kusepahala ne kurapera masiku ne kukakwi, ⁶ mmi mukulwakazi yo halyira mu munati wu fwiire nangati wuhala. ⁷ Mu vezivisa kaheezi ziintu zoose, kuti kaanzi ni vanyanswa. ⁸ Mmi muuntu chasa tokomeri vakwaakwe, sihulu venzuvo yaakwe. Ava kaani itumero mane vuvilala vwaakwe vuzamba yasarumere. ⁹ Mukulwakazi a ng'olwa vuzike chiwiina kuunsi e zirimo ziina makumi a manaiyaanza ne ikumi lyimwiina, mukulwakazi wo mukwaame wumwiina. ¹⁰ Nee zivitwa cho kuchita miteendo yishiyeeme, kapa ngo kutokomera vahwiire, kutambula veene, kushanza mateende a vaantu ve Ireeza vajolola, kuhumburikiza vazuwiire vutuku, kapa avalyi kuchita miteendo milotu. ¹¹ Mmi vazike va vakazanaana, mukaane kuvang'ola mwi vuuka. Mukuti hakuti kunuungwa ko minati yo muviri ha kuvenjihira vashandukire Kirisiti, chi vasaka kuseswa. ¹² Lyinuaho chi valyi vona mulandu chokusiya ziintu zivava zumiinzani ne vaantu. ¹³ Mane valyituta vukata ne kupotapota mumazuvo a vaantu. Kaheena vukata vulyo, ne kupateha muku vawaba ziintu zi vasaswaneere kuwaamba. ¹⁴ Lyinu nisaka kuti vakazanaana va seswa, vave ne vaana, vatokomere marapa aavo, kuti vasiye kuha chira chaavo chivaka chokuvavona mulyaandu. ¹⁵ Mukuti vamwi chivavazwi muvusakusima cho kwiichirira Satani. ¹⁶ Chikuti mukulwakazi wo murumeri wiina mufwiirwa, a mutusa, kuti ikereke kaanzi ilyemenwa, kuti yiwoolye kutusa muzike toota . ¹⁷ Vahitizi vachita neeza valukeere kuhewa ikute ikaando ahulu, sihulu vateenda che liinzwi ne kuruta, ¹⁸ Mukuti ivangelyi iiti, ''kannzi wuviiki iitoomu mukaholo ke pulu chiitafuna mahira'' mmi muvereki wuswaneerwa kuwana ituwero yaakwe.'' ¹⁹ Wu siye kuzumina kunyaanswa ko mukulwana mbwiita chikwiina vashupi vovere nandi vo tatwee. ²⁰ Kalyimere valewuhi havusu vwa vaantu voonse kuti vamwi naavo vatiye. ^{21 22} Ni ku kalyimera, havusu vwe Ireeza ne Kirisiti Jeeso ne mang'iloi asalyitwa, kutokomera wuuku kukalyimerwa nikuseena kusensempa, ne kusachita ziintu che sovozi. Wu siye kuhwerera kuviika muuntu maanza. Wusiye kulyinjirika muzivi zavanntu vamwi. Wi kalye no jolweere. ²³ Wusiye kunywa meenzi vulyo, Mmi, wukunywaga tuwini zana chevaka lye ivumu lyaako ne kulwaalalwaala. ²⁴ Zivi zavamwi vaantu zizivwa chovuhweeru, mmi zizivwa ikatulo niiseeni kuva hateni. Mmi zimwi zivi zivashaala mumasulye. ²⁵ Mukuswana, miteendo yimwi milotu ivoneka cho , mmi kulyi yimwi keeti chiwuungulwa.